शालिनी सिनेटानमधील दोन्ही भूखंड आरक्षित करण्याचा प्रस्ताव घाईगडबडीने नामंजूर करणाऱ्या कारभाऱ्यांच्या विरोधात काँग्रेस-राष्ट्रवादी काँग्रेसच्या नगरसेवकांनी दंड थोपटले आहेत. सिनेटोनमधील जागा स्टुडिओसाठीच आरक्षित करावी आणि यापूर्वी नामंजूर केलेला प्रस्ताव रद्द करावा यासाठी काँग्रेस आघाडीच्या नगरसेवकांनी सह्यांची मोहीम सुरू केली आहे. त्यामध्ये मंगळवारी पहिल्याच दिवशी २४ नगरसेवकांनी सह्या केल्या आहेत. नगरसेवकांना अंधारात ठेवून परस्पर निर्णय घेणाऱ्या कारभाऱ्यांच्या मनमानी कामकाजाला हा एका अर्थी चाप असल्याचे नगरसेवकांचे म्हणणे आहे. फेरप्रस्तावासंदर्भात बुधवारी (ता.२७) आयुक्तांना निवेदन सादर करण्यात येणार आहे.
शालिनी सिनेटोनमधील भूखंड क्रमांक पाच आणि भूखंड क्रमांक सहाची जागा सिनेटोनसाठी राखीव ठेवण्यात आली आहे. या जागेच्या वटमुखत्यारांनी त्या अनुषंगाने हमीपत्र दिले आहे. महापालिका प्रशासनाने हे दोन्ही भूखंड स्टुडिओसाठी आरक्षित करण्याचा प्रस्ताव तयार करून महासभेच्या मान्यतेसाठी सादर केला होता. मात्र महापालिकेतील काही कारभाऱ्यांनी ही जागा बांधकाम व्यावसायिकांच्या घशात घालण्याचा खटाटोप सुरू केला आहे. यासाठी कारभाऱ्यांनी कोट्यवधी रुपयांचा सौदा केला. शिवाय सर्वसाधारण सभेत प्रशासनाच्या प्रस्तावावर कसलीही चर्चा न करता नामंजूर केला.
सिनेटोनसाठी राखीव जागेची विक्री करण्याचा घाट घातल्याचा प्रकार लक्षात आल्यानंतर नगरसेवकांत कारभाऱ्यांच्या कृत्याविषयी चीड निर्माण झाली आहे. दोन्ही काँग्रेसमधील नगरसेवक सिनेटोनचे अस्तित्व कायम ठेवण्यासाठी एकवटले. मंगळवारी त्यांची एकत्रित बैठक झाली. या बैठकीत शालिनी सिनेटोनची जागा आरक्षित करण्याचा फेरप्रस्ताव सादर करावा आणि बारा डिसेंबर रोजी कारभाऱ्यांनी नामंजूर केलेला ठराव विखंडीत करावा, यासाठी मोहीम सुरू केली. पहिल्याच दिवशी २४ नगरसेवकांनी त्यामध्ये सहभाग नोंदवित सह्या केल्या. सह्यांचे निवेदन महापौर, आयुक्तांना देण्यात येणार आहे. यामध्ये नगरसेवक दिलीप पोवार, भूपाल शेटे, प्रताप जाधव, सुभाष बुचडे, अशोक जाधव, संजय मोहिते, श्रावण फडतारे, संदीप कवाळे यांचा सहभाग आहे. परिवहन समिती सभापती नियाज खान, नगरसेवक राहूल चव्हाण यांच्याही त्यावर सह्या आहेत.
स्टुडिओ वाचविण्यासाठी नगरसेविकाही अग्रभागी
शालिनी सिनेटोनची जागा सिनेटोनसाठी आरक्षित संदर्भात फेरप्रस्ताव सादर करावा, यासाठी सुरू झालेल्या सह्यांच्या मोहिमेत नगरसेविकांचा सहभाग लक्षणीय आहे. नगरसेविका सुरेखा शहा, जयश्री चव्हाण, सूरमंजिरी लाटकर, दीपा मगदूम, माधुरी लाड, मेघा पाटील, शोभा कवाळे, प्रतिज्ञा निल्ले, वृषाली कदम, माधवी गवंडी, उमा बनछोडे, रिना कांबळे, अनुराधा खेडकर, सरिता मोरे आदींच्या सह्या आहेत. जुलै २०१७ मध्ये झालेल्या सर्वसाधारण सभेत दोघा नगररसेविकांनी जयप्रभा स्टुडिओ, शालिनी सिनेटोनची उर्वरित जागा सिने निर्मिती व स्टुडिओसाठीच आरक्षित करावा, असा सदस्य ठराव मांडला होता. सभागृहाने हा सदस्य ठराव मंजूर केला होता.
विरोधी आघाडीही स्टुडिओ टिकवण्याच्या बाजूने
विरोधी भारतीय जनता पक्ष, ताराराणी आघाडीची भूमिका ही शालिनी सिनेटोनची जागा स्टुडिओसाठीच आरक्षित राहावी, अशीच आहे. यासंदर्भात भाजप, ताराराणी आघाडीची भूमिका स्पष्ट असून सिने निर्मितीसाठीच दोन्ही भूखंड आरक्षित राहावेत यासाठी प्रयत्नशील असल्याचे ताराराणी आघाडीचे गटनेते सत्यजित कदम यांनी सांगितले. मात्र, महासभेत ठराव आल्यांनंतर याच आघाडीने मौन बाळगणे पसंद केल्याने भूमिकेविषयी संभ्रम निर्माण झाला होता.
मोबाइल अॅप डाउनलोड करा आणि राहा अपडेट
