अनिकेत कोथळे प्रकरणी अटक करण्यात आलेल्या बाळासाहेब आप्पा कांबळे (वय ४८) याला कोर्टाने सोमवारी पंधरा दिवसांची न्यायालयीन कोठडी सुनावली. या प्रकरणातील प्रमुख संशयित आणि बडतर्फ पोलिस उपनिरीक्षक युवराज कामटे याच्याशी मामे सासऱ्याचे नाते असलेल्या कांबळेला सीआयडीने तपासा दरम्यान अटक केली आहे. अनिकेतचा मृत्यू झाल्यानंतर कामटेने कांबळेला बोलावून घेतले होते. कांबळेकडे झालेल्या तपासाबाबत मात्र अधिक माहिती मिळू शकली नाही.
अनिकेत कोथळे प्रकरणाचा तपास अंतिम टप्प्याकडे निघाला असून, कॉल डिटेल्सचा आधार घेत तपास अधिकारी उपअधीक्षक मुकुंद कुलकर्णी यांनी घटनेच्या दरम्यान संशयितांनी संपर्क साधलेल्यांची कसून चौकशी सुरू केली आहे. संशयितांनी पलायन केल्याचा गुन्ह्याचाही सीआयडीच तपास करीत असून, पोलिस निरीक्षक गीता बागवडे यांनी या तपासावर लक्ष केंद्रीत केले आहे. अनिकेत प्रकरणी गुन्हा दाखल होताच पाच पोलिसांसह सहा जणांना अटक केली. त्यानंतर तपासादरम्यान बाळासाहेब कांबळेचा सहभाग असल्याचे उघडकीस आले. या कांबळेकडेच कामटे वापरत असलेले वाहन ठेवल्याचेही समोर आले आहे. या शिवाय अनिकेतचा मृत्यू झाल्यानंतर कामटेने फोन करुन कांबळेला पोलिस ठाण्यात बोलावून घेतले. त्यानंतर अनिकेतचा मृतदेह घेऊन संशयित विश्रामबागमधील खासगी हॉस्पिटलमध्ये गेले होते, त्याही ठिकाणी कांबळे वावरत असल्याचे सीसीटीव्हीच्या माध्यमातून समोर आले आहे. कांबळेच्या अटकेमुळे संशयितांची संख्या सातवर गेली असून, संशयितांची संख्या वाढणार असल्याचे सुतोवाच सीआयडीने केले आहे. त्यामुळे आणखी कोण कोण गजाआड होणार, याकडे सर्वांचे लक्ष लागले आहे.
मोबाइल अॅप डाउनलोड करा आणि राहा अपडेट