‘खासगी सावकारी, खुनाचा प्रयत्न, मारामारी, लूटमार अशा गंभीर गुन्ह्यात पोलिसांच्या रेकॉर्डवर असलेल्या गुन्हेगारांना जिल्ह्यातून हद्दपार करण्यासाठी पोलिसांनी प्रस्ताव सादर केले आहेत. यात शहरातील १० टोळ्यांमधील १२२ जणांचा समावेश आहे. जिल्हाधिकारी, पोलिस अधीक्षक आणि प्रांताधिकाऱ्यांकडे प्रस्ताव सादर केले आहेत. लवकरच हद्दपारीची कारवाई होणार आहे’, अशी माहिती शहर पोलिस उपअधीक्षक डॉ. प्रशांत अमृतकर यांनी दिली.
वाढती गुन्हेगारी रोखण्यासाठी पोलिसांनी अक्शन प्लॅन तयार केला आहे. पोलिसांच्या रेकॉर्डवरील गुन्हेगारांकडून पुन्हा-पुन्हा गुन्हे घडत आहेत, त्यामुळे सराईतांना जिल्ह्यातून हद्दपार करण्याचे प्रस्ताव तयार केले जात आहेत. शहरातील चार पोलिस ठाण्यांच्या अंतर्गत १० टोळ्यातील ८१ गुन्हेगारांवर कलम ५५ प्रमाणे, ४० गुन्हेगारांवर कलम ५६ आणि ५७ प्रमाणे, तर झोपडपट्टीदादा कलमांतर्गत २ अशा एकूण १२२ गुन्हेगारांना हद्दपार करण्याचे प्रस्ताव तयार केले आहेत.
कलम ५५ प्रमाणे कारवाईचे प्रस्ताव पोलिस अधीक्षक कार्यालयात सादर केले आहेत. कलम ५६, ५७ चे प्रस्ताव प्रांताधिकारी कार्यालयात पाठवले आहेत. तर काही प्रस्ताव प्रांताधिकाऱ्यांकडे पाठवले आहेत. प्रकाश बागडे (रा. मोरेवाडी) व मनोहर मिणेकर (रा. मोरेवाडी) यांच्यावर झोपडपट्टी अॅक्टनुसार कारवाई करण्याचा
प्रस्ताव जिल्हाधिकाऱ्यांकडे पाठवला आहे.
शहर उपअधीक्षक डॉ. प्रशांत अमृतकर यांनी पोलिस ठाण्यांकडून हे प्रस्ताव तयार करून वरिष्ठांकडे पाठवले आहेत. यातील काही प्रस्ताव याआधीच मंजूर झाले असून त्यातील ज्यांची मुदत संपली आहे, त्यांच्यावर फेरप्रस्ताव पाठवले आहेत. संघटीत गुन्हेगारी मोडून काढण्यासाठी पोलिसांकडून हे प्रयत्न सुरू आहेत, अशी माहिती डॉ. अमृतकर यांनी दिली. दरम्यान, या प्रकारामुळे शहरातील गुंडगिरीला आळा बसण्यासाठी प्रयत्न होतील अशी अपेक्षा आहे.
हे होणार हद्दपार
मटका अड्ड्यांचा बुकी विजय लहू पाटील याच्यासह ६ साथीदार, बशीर अब्बास पटेकर याच्या टोळीतील १४, अजित संपत बागलसह ८, राहुल बाबू गायकवाडसह ५, आयुब खुदबुद्दीन जमादार याच्यासह २२, बबन कवाळेसह ५, सलीम मुल्लासह ६ अशा १२२ जणांचा यात समावेश आहे.
मोबाइल अॅप डाउनलोड करा आणि राहा अपडेट
