कोल्हापूर टाइम्स टीम
‘कोल्हापूरची विमानसेवा, नवे रेल्वे टर्मिनस, नवा उद्योग, जीएसटीतील फेररचनेसह कोल्हापूर व्हिजनसाठी सरकारने तातडीने प्रयत्न करणे गरजेचे आहे. ‘मेक इन कोल्हापूर’ अशी अनेक उत्पादने आहेत. कोल्हापूरच्या विकासासाठी मास्टर प्लॅन तयार करा. पर्यटन, आयटी, उद्योग, व्यापारी, कोल्हापूर ब्रॅण्डला संधी देण्यासाठी केंद्र आणि राज्य सरकारने प्रयत्न करणे गरजेचे आहे,’ अशी अपेक्षा उद्योजक, व्यापाऱ्यांनी अपेक्षा व्यक्त केली. ‘वेस्टर्न महाराष्ट्र चेंबर ऑफ कॉमर्स अॅण्ड इंडस्ट्रिज (वेसमॅक) आणि कोल्हापूर चेंबर ऑफ कॉमर्सतर्फे निर्यात वृद्धीस प्रोत्साहन देण्यासाठी राजर्षी शाहू स्मारक भवनात मंगळवारी आयोजित विशेष परिसंवादात या अपेक्षा व्यक्त झाल्या.
कोल्हापूरचा विकास हा राजकीय उदासीनता आणि नेतृत्वाअभावी रखडला आहे. विमानसेवा, नवे रेल्वेस्थानक, सुपर फास्ट रेल्वे, मोठा उद्योग येण्याची गरज आहे. मात्र गेली अनेक वर्षे केवळ आश्वासनांशिवाय दिली जात आहेत. वाहतूक व्यवस्था भक्कम नसल्याने निर्यातीवर मोठा परिणाम होत आहे. कोल्हापूरची उत्पादने जगभर प्रसिद्ध आहेत. मात्र ती इच्छितस्थळी वेळेवर पोहोचविण्यासाठीची जलद आणि सक्षम वाहतूक व्यवस्था नाही. प्राथमिक सुविधेत विमानसेवा सुरु करणे अत्यावश्यक आहे. त्यानंतर कार्गो विमानसेवा दिली जाऊ शकते. रेल्वेकडून रो-रो सेवा दिल्यास निर्यातीला पोषक वातावरण निर्मिती होईल. स्थानिक उद्योजकांच्या उत्पादनाला बळ दिले जात नाहीत. स्थानिक ब्रॅण्डला जागतिक स्तरावर स्थान उपलब्ध करुन देण्याची गरज आहे. केंद्र सरकारतर्फे उद्योजक आणि व्यापाऱ्यांसाठी लागू केलेल्या विविध योजनांची माहिती सूक्ष्म, लघु, मध्यम उद्योजकांपर्यंत पोहोचण्याची गरज असल्याचा सूर परिसंवाद उमटला.
चेंबरचे अध्यक्ष ललित गांधी म्हणाले, ‘विमानतळाचा प्रश्न कायम आहे. खासदार आणि आमदारांसह हवाई उड्डाणमंत्री अशोक राजू यांच्याकडून विमानसेवा सुरू होण्यासाठी तारखांची आश्वासने दिली जात आहेत. १५ डिसेंबरपर्यंत विमानसेवा सुरू न झाल्यास उद्योजक आणि व्यापारी विमानतळावर आंदोलन करतील. औद्योगिक आणि व्यापार क्षेत्रातील अनेक मागण्या प्रलंबित आहेत. त्याची पूर्तता झाली पाहिजे.
खासदार संभाजीराजे यांच्या हस्ते मनोरमा इन्फोसोलुशनच्या सीइओ आश्विनी दानिगोंड यांचा सत्कार झाला. त्यांना ब्रिटन संसदेत आयोजित केलेल्या भारताच्या ‘टेक समिती २०१७ च्या इंडिया टेक्नॉलॉजी मन्थ,’ या कार्यक्रमात मार्गदर्शन करण्याची संधी मिळाली आहे. ब्रॅण्ड कोल्हापूर पोर्टल आणि अॅपचे सादरीकरण करण्यात आले. आयएमसीच्या सहायक व्यवस्थापिका ख्याती नरवणे, चेंबर ऑफ कॉमर्स इंडस्ट्रीचे महाव्यवस्थापक अरविंद प्रधान यांनी निर्यातदारांना विविधी संधीची माहिती सांगितली. स्मॅकचे अध्यक्ष राजू पाटील, गोशिमाचे अध्यक्ष सूरजितसिंग पवार, कोल्हापूर इंजिनीअरिंग असोसिएशनचे अध्यक्ष बाबासाहेब कोंडेकर, उद्योगपती सचिन मेनन, चेंबरचे माजी अध्यक्ष प्रदीपभाई कापडिया, चंद्रकांत जाधव, जयेश ओसवाल, धनंजय दुग्गे, शिवाजीराव पोवार, आदी उपस्थित होते. जयेश ओसवाल यांनी सूत्रसंचालन केले. चेंबरचे उपाध्यक्ष संजय शेटे यांनी आभार मानले.
विविध योजनांची माहिती
जाणून घ्या ः चतुर्वेदी
इम्पोर्ट एक्सपोर्ट बँक ऑफ इंडिया (एक्झिम बँक) चे मुख्य व्यवस्थापक समर्थ चतुर्वेदी म्हणाले, ‘केंद्र सरकारतर्फे निर्यातीसाठी लागू केलेल्या अनेक प्रोत्साहनपर योजना आहे. मात्र अनेक योजनांची माहिती उद्योजक आणि व्यापाऱ्यांना नाही. सूक्ष्म, लघु, मध्यम उद्योगांना निर्यातीची बाजारपेठ मिळण्यासाठी निर्यातदारांना प्रोत्साहन दिले जात आहे. युवकांसाठी काही विशेष योजना आहेत. भारतीय निर्यातदारांना दोन वेर्ष कर्ज परतफेडीचा कालावधी परदेशी बँकाकडून दिला जात होता. एक्झिम बँकेकडून पाच ते सहा वर्षांचा परतफेडीचा कालावधी दिला जात आहे. अन्य कोणत्याही बँकाकडून दिले जाणार कर्ज एक्झिम बँककडे वर्ग केले जाते. कोल्हापुरातील टेक्सटाइल, लेदर आणि स्पोटर्स शूजसाठी कर्ज दिले जात आहे. फार्मा, आयटीसह नवीन संशोधनासह परदेशात कंपनी स्थापन करण्यासाठी कर्जाची सुविधा उपलब्ध करुन दिली जाते. क्लस्टर फायनान्स केले जात आहे. त्याचा लाभ घेतला पाहिजे.
निर्यातदारांना चांगली संधी ः अंबस्था
एक्स्पोर्ट क्रेडिट गॅरंटी कार्पोरेशनचे उपमहाव्यवस्थापक सृष्टीराज अंबस्था यांनी ‘संधी आणि व्यवस्थापनातील धोके,’ या विषयावर मार्गदर्शन केले. ते म्हणाले, ‘काही उद्योजक, निर्यातदारांना कर्ज देताना त्यांचा बँकिंगमधील पूर्वेइतिहास आणि आर्थिक स्थिती पाहिली जाते. मात्र निर्यातदारांना नव्या निर्णयानुसार चांगली संधी उपलब्ध करुन देण्यात आली आहे. कोणत्याही कागदपत्रांसाठी निर्यातदारांना त्रास दिला जात नाही. कोल्हापूर जिल्ह्यातील निर्यातदाराना मोठी संधी उपलब्ध आहे. अर्थसहाय्य नसल्यामुळे अनेकदा निर्यातीता टक्का घसरतो. मात्र पश्चिम महाराष्ट्रातील निर्यातदारांना चांगली संधी उपलब्ध आहे. त्या संधीचा लाभ घेण्याची आवश्यकता आहे.
उद्योगविकासाला कोल्हापूर पोषक ः कनोडिया
इंडियन मर्चंटस् चेंबरचे अध्यक्ष आणि आयटी उद्योजक डॉ. ललित कनोडिया ‘छोट्या शहरात आयटी उद्योग विस्ताराच्या संधी’ विषयावर मार्गदर्शन केले. ते म्हणाले, ‘मुंबई, पुण्यानंतर कोल्हापूर हे महत्त्वाचे डेस्टिनेशन आहे. कोल्हापूरचे वातावरण उद्योगवाढीसाठी पोषक आहे. अनेक नवे उद्योग या ठिकाणी येऊ शकतात. विशेष म्हणजे कोकण आणि कर्नाटकला जोडणारे हे महत्त्वाचे शहर आहे. येथील उद्योग, व्यापार, इंजिनीअरिंग, आयटी, कृषी, वस्त्रोद्योग, आभूषण क्षेत्रात अग्रेसर आहे. या क्षेत्रातही अनेक संधी उपलब्ध आहेत. केंद्र आणि राज्य सरकारने या निर्यातदार आणि व्यापाऱ्यांसाठी विशेष योजना तयार केल्या आहेत. मात्र अंमलबजावणी केली जात नाही. उद्योग उभारणीसाठी प्राथमिक सुविधा तातडीने उपलब्ध करुन दिल्या पाहिजेत. त्यासाठी इंडियन मर्चंटस् चेंबर प्रयत्नशील आहे. पुण्यानंतर कोल्हापूर आयटी हब होऊ शकते. अनेक मोठ्या कंपनींची कामे कोल्हापुरातील आयटीला सहाय्यभूत ठरणाऱ्या घटकांकडून होऊ शकतात.’
कोल्हापूरचे व्हिजन द्या ः संभाजीराजे
परिसंवादाचे उद‍्घाटक, खासदार संभाजीराजे छत्रपती म्हणाले, ‘कोल्हापूरपेक्षा औरंगाबाद, नागपूर या शहरांचा औद्योगिक आणि व्यापारी दृष्ट्या झपाट्याने विकास झाला. त्या तुलनेत कोल्हापूरची का पिछेहाट झाली याचे चिंतन करण्याची गरज आहे. कल्याणी, टाटा, बिर्ला, होंडासारखे मोठे उद्योग कोल्हापुरात येत नाहीत. येथे प्राथमिक सुविधा, वातावरण अनुकूल असतानाही उद्योग येण्यासाठी धाडस करीत नाहीत. इचलकरंजीत ५ हजार टेक्स्टाइल, एक लाख पॉवरलूम आणि दररोज ५० कोटींचा टर्नओव्हर असलेले शहर आहे. मात्र कोल्हापूरच्या व्हिजनमध्ये त्याचा कधीही उल्लेख होत नाही. स्थानिक उद्योजक, कारागीरांत मोठे टॅलेंट आहे. मात्र पुरेसे पाठबळ मिळत नाही. पर्यटनक्षेत्रातही कोल्हापूर मागे आहे. औद्योगिक आणि व्यापाऱ्यांच्या काही प्रलंबित मागण्या आहेत. त्यासाठी समिती स्थापन करावी. ही समिती कोल्हापूरचे व्हिजन तयार करेल. त्यामध्ये महत्त्वाच्या मागण्यांच्या समावेश करावा. त्या मार्गी लावण्यासाठी पाठपुरावा करू.’
विमानसेवा सुरू करा, अन्यथा हिसका दाखवू
चेंबरचे अध्यक्ष ललित गांधी यांनी कोल्हापूरची विमानसेवा सहा वर्षे बंद आहे. केंद्र सरकारने १५ डिसेंबरपर्यंत विमानसेवा सुरू करण्याचे आश्वासन दिले आहे. ती सुरू न झाल्यास आंदोलनाचा इशारा दिला. त्या वेळी खासदार संभाजीराजे म्हणाले, ‘आंदोलन करणारी समिती आणि माणसे वेगळी आहेत. उद्योजक आणि व्यापाऱ्यांनी आंदोलनात अमूल्य वेळ घालवू नये. विमानसेवा सुरु करण्यासंदर्भात सोमवारी मुख्यमंत्री देवेंद्र फडणवीस यांच्यासोबत चर्चा झाली आहे. एअर डेक्कनची विमाने १५ डिसेंबरपर्यंत येणार आहेत. येत्या २२ किंवा २३ डिसेंबरपर्यंत विमानसेवा सुरु करण्यासाठी प्रयत्न सुरु आहेत. या वर्षात विमानसेवा सुरु न झाल्यास कोल्हापुरी हिसका दाखवू, असा इशारा खासदार संभाजीराजे यांनी दिला. रेल्वेस्थानकाचाही विकास केला जाणार आहे. मुख्य हेरिटेज इमारत सोडून स्थानकावर सॅटेलाइट टर्मिनल उभारण्यासाठी प्रयत्न केले जाणार आहे. कोल्हापूर-पुणे, कोल्हापूर-मुंबई मार्गावर सुपरफास्ट सेवा देण्यासाठी विचार सुरु आहे. त्या संदर्भात चर्चा सुरु आहे. त्यासह नवे उद्योग येताना टेंडर पास करा, कार्यकर्त्यांना नोकऱ्या लावा, असा सल्ला कोणताही पुढारी देत असल्यास यापुढे त्यांची गय केली जाणार नाही. चेंबरने अशा पुढाऱ्यांची नावे सांगावीत, त्याचा बंदोबस्त केला जाईल,’ असेही त्यांनी बजाविले.
मोबाइल अॅप डाउनलोड करा आणि राहा अपडेट
