अनिकेत कोथळेचा पोलिस कोठडीत खून केल्यानंतर गुन्हा लपविण्यासाठी अनिकेत आणि अमोल भंडारे या दोघांनी पोलिसांच्या तावडीतून पलायन केल्याचा गुन्हा शहर पोलिस ठाण्यात दाखल करण्यात आला होता. आता या गुन्ह्याचा तपासही सीआयडीकडे वर्ग करण्यात आला आहे. सीआयडीच्या पोलिस निरीक्षक गीता बागवडे यांच्याकडे या गुन्ह्याचा तपास देण्यात आला आहे. अनिकेतच्या खुनाचा तपास आगोदरपासूनच उपअधीक्षक मुकुंद कुलकर्णी यांच्याकडे आहे. त्यामुळे आता अनिकेत कोथळेच्या संपूर्ण प्रकरणाचा तपास सीआयडी करणार असल्याचे स्पष्ट झाले आहे.
लुटमार केल्याप्रकरणी अनिकेत कोथळे आणि अमोल भंडारे या दोघांना ६ नोव्हेंबर रोजी पहाटे शहर पोलिसांनी अटक केली. कोर्टाने त्या दोघांना तीन दिवसांची पोलिस कोठडी सुनावल्यानंतर त्यांना पुन्हा शहर पोलिस ठाण्यातील कोठडीत ठेवण्यात आले. त्याच रात्री आठ वाजण्याच्या सुमारास तपास अधिकारी या नात्याने बडतर्फ उपनिरीक्षक युवराज कामटे याने अनिकेत आणि अमोलला कोठडीतून बाहेर काढले. थर्ड डिग्रीचा अमानुष वापर केला गेल्याने अनिकेतचा मृत्यू झाला. त्यानंतर कामटे आणि इतर संशयितांनी अनिकेतचा मृतदेह पोलिस गाडीतून हलविला. काही वेळाने अनिकेत आणि अमोल या दोघांनी पोलिसांच्या हाताला हिसडा मारून पलायन केल्याचा आभास निर्माण करण्यात आला. शहरात नाकाबंदी लावली. तत्कालीन उपअधीक्षक डॉ. दिपाली काळे यांनी नियंत्रण कक्षाला दोन आरोपींनी पलायन केल्याची सूचना दिली. सात नोव्हेंबर रोजी सकाळी साडेसात वाजण्याच्या सुमारास कामटेने दोन आरोपींनी पलायन केल्याची फिर्याद देऊन गुन्हा दाखल केला. या गुन्ह्याचा प्राथमिक तपास पोलिस उपनिरीक्षक रोहित चौधरी यांच्याकडे देण्यात आला. दुपारपर्यंत अनिकेतचा घातपात झाल्याची बातमी शहरभर पसरली. नातेवाईकांसह जनसमुदायांतून संतापाची लाट उसळल्याची दिसताच आरोपी पलायन प्रकरणाचा तपास स्थानिक गुन्हे अन्वेषण शाखेकडे देण्यात आला. या, दरम्यान कामटे आणि त्याचे साथीदार पळून गेलेल्या दोघांपैकी अमोल भंडारे हा कर्नाटकात सापडल्याचा दावा करीत त्याला घेऊन सांगलीत आले. स्थानिक गुन्हे अन्वेषण शाखेचे निरीक्षक राजन माने यांनी अमोल भंडारेची कसून चौकशी केल्यानंतर कामटेसह सहा जणांनी केलेले गंभीर कृत्य उघडकीस आले. माने यांनी त्यांच्या विरुद्ध गुन्हा दाखल करुन त्या सर्वांना अटक केली.
पोलिस कोठडीतील अनिकेतच्या खुनाच्या गुन्ह्याचा तपास तत्काळ सीआयडीकडे वर्ग करण्यात आला होता. परंतु संशयितांनी पुरावा नष्ट करण्याच्या हेतूने अनिकेत आणि अमोल या दोघांनी पलायन केल्याचा गुन्हा दाखल केला होता. या गुन्ह्याचा तपास अद्यापही सांगली पोलिसांकडेच होता. आता हा तपास सीआयडीच्या निरीक्षक बागवडे यांच्याकडे देण्यात आला आहे.
ते दोघे कोण?
अनिकेतचा कोठडीतच मृत्यू झाल्यानंतर कामटेसह इतर संशयितांनी पुरावा नष्ट करण्याच्या हेतूने केलेल्या हालचालींचा पाठपुरावा सीआयडीने करायला सुरुवात केली आहे. सांगलीत नदीकाठी दोघांनी अमोल भंडारे याला काहीकाळ धरून ठेवले होते. ते दोघे कोण याचा शोध अद्यापही लागलेला नाही. त्यामुळे तपास अधिकारी उपअधीक्षक मुकुंद कुलकर्णी यांनी कॉलडिटेल्सच्या सहाय्याने घटनेच्या वेळी संशयितांच्या संपर्कात आलेल्यांची कुंडली काढायला सुरुवात केली आहे. आतापर्यंत दहा ते बारा जणांची चौकशी झाल्याचे समोर येत आहे. अवैध धंद्यांच्या निमित्ताने पोलिसांच्या संपर्कात असलेल्यांपैकी कोणीतरी अमोलला धरून बसण्याचे काम केले असावे, असा संशय आहे.
मोबाइल अॅप डाउनलोड करा आणि राहा अपडेट
