म. टा. प्रतिनिधी, कोल्हापूर
आमदार सतेज पाटील यांचा ‘गोकुळ’मध्ये राजकारण आणून आंबा पाडण्याचा डाव आहे. कोल्हापूरच्या जनतेनेच त्यांना सूर्यांजी पिसाळाची पदवी यापुर्वी दिली आहे. लोकांमध्ये गैरसमज, भांडण लावून सत्ता मिळविण्याचे उद्योग त्यांनी बंद करावेत, राजकारणासाठी गोकुळचा वापर न करता हिम्मत असेल तर नवा संघ काढा. ज्यांनी दूध संघ बंद पाडले, सभासदांचे कोट्यवधी रूपये बुडवले, तेथे मोर्चा काढा असे आव्हान खासदार धनंजय महाडिक यांनी भाषणात दिले. निषेध मोर्चात त्यांनी ‘स्वार्थी राजकारणासाठी पाच लाख शेतकरी कुटुंबांच्या चुलीत पाणी ओतू नका,’ असे आवाहनही त्यांनी केले.
खासदार महाडिक यांनी या सभेत पाटील यांच्यावर जोरदार हल्ला चढवला. ते म्हणाले, ‘गोकुळ दूध संघ देशात टॉपचा आहे. तरीही दोन महिने सतत संघावर टीका करत आहात. ‘गोकुळ’ वाचवण्यासाठी धडपड सुरू असल्याचा कांगावा करत आहात, तो वाचवायला कधी बंद पडलाय, कुणाचे पैसे तटवलेत का? उलट तुमच्यासारख्या करंट्यांच्या मागे असलेल्यांनी दूध संघ बंद पाडले, त्याबद्दल तुम्ही बोलत नाही, तेथे मोर्चा काढत नाही. तुम्हाला ‘गोकुळ’ची माहिती हवी आहे ना, ते मिळवण्यासाठी कायदेशीर मार्ग आहेत. मोर्चा काढून स्वार्थासाठी बदनामी कशाला करत आहात, आंबा पाडण्यासाठीच तुम्ही हे सारे करत आहात. ज्यांची लायकी नाही, ऐपत नाही, ज्यांचा दूध व्यवसायाशी संबंध नाही, अशा लोकांना व्यासपीठावर आणून टीका करायला लावता, असे सांगून ते म्हणाले, राजकारणात आपले वैर आहे. त्यामध्ये ‘गोकुळ’ला बदनाम करून राजकारण करण्याची गरज नाही.’
ते पुढे म्हणाले, ‘राजकारणात कधीही काहीही होऊ शकते. त्यामुळे जरा सबुरीने घ्यावे. त्यांच्याकडे ऐश्वर्य, श्रीमंती आहे, मात्र ते असे का वागतात, याचा उलगडा झालेला नाही. ऊठसूट महाडिक घराणे आणि गोकुळवर बोलण्याचे आमदार सतेज पाटील यांनी थांबवावे. गोकुळ वाचविण्यासाठी आमदार पाटील प्रयत्न करीत असल्याची व्हिडिओ क्लिप व्हायरल झाली आहे. मात्र गोकुळवर झालेले सर्व आरोप खोटे आहेत. पाटील यांनी केलेले सर्व आरोप बिनबुडाचे आहेत. गोकुळ संस्था व्यापाऱ्यांची नाही. शेतकरी आणि उत्पादकांच्या श्रमातून निर्माण झालेला हा संघ आहे. काटकसर करत असल्यानेच व्यवस्थापन खर्च केवळ १८ टक्के आहे. स्कार्पिओ गाडीतून संचालक फिरतात, डॉक्टरांनीही या वाहनांचा वापर केल्याचा आरोप केला आहे. मग जनावरांचा जीव वाचविण्यासाठी डॉक्टर एसटीने जाईपर्यंत मुक्या जनावरांचा जीव राहील का? असा सवाल करून ते म्हणाले, या सर्व वाहनांवर व्यवस्थापनात एकूण खर्चाच्या पाव पैसा खर्च येतो. सत्तेच्या काळात आमदार सतेज पाटील यांच्या कामासाठी गोकुळची वाहने २५ वेळा मुंबईला गेली. त्याचा हिशोब का सांगितला जात नाही?’
...तर सहन होणार नाही
ऐश्वर्य, संपत्ती असलेल्या मोठ्या घराण्यात जन्मलेल्या आमदार सतेज पाटील सतत महादेवराव महाडिक यांच्यावर टीका करू नये, असा इशारा देत ते म्हणाले, ‘वडिलधाऱ्यावर बोलण्याची आमची संस्कृती नाही, वैयक्तिक बदनामाही सहन केली जाणार नाही, तुमच्या वडिलांवर बोललो तर सहन होणार नाही, त्यामुळे भविष्यात गोकुळ अथवा वैयक्तिक बदनामी खपवून घेणार नाही. पैशाच्या मस्तीवर हे करत असाल तर जशास तसे उत्तर देवू.’
‘तर सगळे सुपरवायझर बावड्याचे’
खासदार धनंजय महाडिक म्हणाले, ‘५० वेळा तीच तीच कॅसेट वाजवून लोकांसमोर गैरसमज निर्माण केला जात आहे. गोकुळ संघ आमदार सतेज पाटील यांच्या ताब्यात गेला असता तर कसबा बावड्याचे सुपरवायझर नेमले असते. सर्वच कर्मचाऱ्यांना त्यांच्या तालावर नाचायला लागले असते. मग पंचायत समिती, ग्रामपंचायत, सोसायटीची निवडणूक लढवायची नाही.’ असे चित्र गोकुळमध्ये निर्माण केले असते.
महाडिकांचा एकही टँकर नाही
गोकुळमध्ये एकही टँकर किंवा गाडी माजी आमदार महादेवराव महाडिक यांची नाही, त्यांची ट्रान्स्पोर्ट कंपनी आहे, त्यामुळे अनेक कार्यकर्त्यांचे टँकर आहेत, असा खुलासा करताना खासदार महाडिक म्हणाले, ‘ वस्तुस्थिती वेगळी असताना त्यांच्या पोटात पोटशूळ का उठतो, असा प्रश्न आहे. त्यांनी तोंड उघडले की आरोप आणि वाईट विचारच बाहेर पडतात. कधी तरी चांगलं बोला, असे आवाहन करून ते म्हणाले, खोटं बोलायची तरी किती? खोट बोल पण रेटून बोल अस त्यांचे झाले आहे. गोकुळमध्ये चहाच्या बिलाची नोंदही केली जाते. सर्व कामकाजाचा अहवाल पारदर्शी आहे. गोकुळवर आरोप करणाऱ्यांना जिल्ह्यात काहीच हाती लागले नसल्याने केवळ आंबा पाडण्याचा डाव आहे. त्यासाठी गटबांधणी आणि लोकांना भडकविण्याचे काम सुरु आहे.
दरवाढीचा विषय अधिवेशनात मांडणार
मला जत्रेतील ट्रॅक्टर म्हणून टीका केली. संसदरत्न पुरस्कार मिळवलेला मी खासदार आहे. मी दूध दरवाढीच्या विरोधात असल्याची खोटी टीका केली जात आहे. पण दरासाठी मीच आवाज उठवणार आहे. १५ डिसेंबरपासून हिवाळी अधिवेशनाची सुरुवात होत आहे. अधिवेशनात पहिला प्रश्न हा गाय दूध खरेदीस पाच रुपये अनुदान थेट उत्पादकांच्या खात्यावर जमा करण्याची मागणी करणार आहे.
‘आम्हाला तुम्ही शिकवू नका’
काँग्रेसचे जिल्हाध्यक्ष पी. एन. पाटील म्हणाले, ‘गोकुळ संस्था हकनाक बदनाम होईल, अशी कोणतीही टीका आमदार सतेज पाटील यांनी करू नये. राजकारणासाठी गोकुळचा वापर करू नये. अनेक संस्था उभारुन बंद पाडण्याचे काम जिल्ह्यात झाले आहे. त्यामुळे गोकुळचा कारभाराविषयी आरोप करणाऱ्यांनी शिकविण्याची गरज नाही. दूध संघ काढणाऱ्याची वाईट परिस्थिती झाली आहे. दूध उत्पादकांना फसविण्याचे काम कोणीही करू नये.’
मोबाइल अॅप डाउनलोड करा आणि राहा अपडेट
