मध्यावधी होणार

December 1, 2017, 1:30 pm

≫ Next: सीबीएस परिसरात मोबाइल स्नॅचिंग

≪ Previous: कोंडिग्रेत महिलेची दोन मुलांसह आत्महत्या

$

0

0

म. टा. प्रतिनिधी, कोल्हापूर

राज्यातील सध्याचे वातावरण पाहता पुढील वर्षी मध्यावधी निवडणुका होण्याची शक्यता आहे. ही निवडणूक दोन्ही काँग्रेस एकत्रित येऊन लढणार असल्याचे काँग्रेसचे प्रदेशाध्यक्ष अशोक चव्हाण यांनी शुक्रवारी स्पष्ट केले. व्यक्त केली. कोल्हापूर दौऱ्यावर आलेल्या चव्हाण यांनी पत्रकारांशी संवाद साधताना सरकार ऑफलाइन झाल्याची टीका केली.

चव्हाण यांनी म्हणाले, ‘राज्य सरकारची अवस्था सध्या भरकटल्यासारखी झाली आहे. गु​जरात निवडणुकीच्या निकालानंतर राज्यात बरेच बदल होण्याची शक्यता आहे. या राज्याच्या निकालावरच बरेच काही अवलंबून राहणार आहे. सध्याचे वातावरण पाहता २०१८ मध्ये मध्यावधी निवडणुका होण्याची दाट शक्यता आहे. भाजपचा पराभव करायचा असेल तर दोन्ही काँग्रेस एकत्र येणे आवश्यक आहे. यामुळे सध्या वरिष्ठ पातळीवर एकत्र येण्याची प्रक्रिया सुरू आहे. तशी चर्चाही सुरू झाली आहे.’

गेल्या तीन वर्षांत राज्य सरकारने अनेक योजना राबवल्या, पण त्यातील एकही योजना यशस्वी झाली नाही, अशी टीका करून ते म्हणाले, ‘कर्जमाफीची योजना तर पूर्णपणे फसली आहे. ८९ लाख शेतकऱ्यांना ३४ हजार कोटींची कर्जमाफी देण्याची घोषणा सरकारने केली, पण ऑनलाइन प्रक्रियेतील गोंधळामुळे शेतकऱ्यांना भयंकर त्रास सहन करावा लागत आहे. आतापर्यंत केवळ तीन ते चार हजार कोटीची रक्कम शेतकऱ्यांच्या खात्यावर जमा झाली आहे. यंत्रणा ऑफलाइन झाल्याने उर्वरित कर्जमाफी होण्याची चिन्हे दिसत नाही. शेतकऱ्यांच्या उत्पादनाला हमीभाव मिळत नाही. एकूणच हे सरकार शेतकऱ्यांना सूडबुद्धीने वागवत आहे. ’

मनसेचे कृत्य भ्याड

मुंबईत मनसेने काँग्रेस कार्यालयावर केलेला हल्ला भ्याडपणाचे लक्षण असल्याचा आरोप चव्हाण यांनी केला. देश सर्वांचा आहे. त्यामुळे प्रांत आणि भाषा यांबाबत वाद होता कामा नये. हा वाद वाढवत काहीजण दंगल माजवण्याचा प्रयत्न करत असल्याचा आरोप करत या हल्ल्याची चौकशी करण्याची मागणी त्यांनी केली.


मुख्यमंत्र्यांनी भूमिका जाहीर करावी

सांगली, सातारा व नांदेड येथील प्रकरणामुळे राज्यातील पोलिसांची प्रतिमा मलीन झाली असल्याचे सांगून पानसरे हत्या प्रकरणातील अधिकाऱ्यांच्या सततच्या बदल्याबाबत त्यांनी सरकारवर संशय व्यक्त केला. याबाबत मुख्यमंत्री देवेंद्र फडणवीस गृहमंत्री म्हणून यांनी भूमिका जाहीर करावी, अशी मागणी त्यांनी केली.

पतंगरावांना अधिकार

राज्यात सध्या पक्षाच्या जिल्हाध्यक्ष निवडीची प्रक्रिया सुरू आहे. कोल्हापुरात काही मतभेद आहेत, पण ते चर्चेने मिटतील, अशी अपेक्षा आहे. चव्हाण म्हणाले, ‘जिल्ह्यातील या निवडीबाबत सर्वांशी चर्चा करण्याचे अधिकार पतंगराव कदम यांना दिले आहेत. जिल्ह्यात पक्ष भक्कम आहे. त्यामुळे चर्चेतून एक नाव निश्चित करण्यात येईल.’

मोबाइल अॅप डाउनलोड करा आणि राहा अपडेट

---

सीबीएस परिसरात मोबाइल स्नॅचिंग

December 1, 2017, 1:30 pm

≫ Next: हत्तींचा मोर्चा वाघोत्रे, नांदवडेकडे

≪ Previous: मध्यावधी होणार

$

0

0

म. टा. प्रतिनिधी, कोल्हापूर

चेन स्नॅचिंगनंतर आता शहरात मोबाइल हिसकावण्याचे प्रकार वाढले आहेत. गुरुवारी (ता. ३०) रात्री नऊ ते साडेनऊ या वेळेत मध्यवर्ती बसस्थानकाजवळ अज्ञातांनी दोघांचे मोबाइल हिसकावले. याबाबत आसिफ मुरशदपिर पिरजादे (वय २९, रा. सुभाषनगर, कोल्हापूर) आणि जितेंद्र पंडित सैंदाणे (४०, रा. नरेगाव, जि. पुणे) या दोघांनी शाहूपुरी पोलिस ठाण्यात फिर्याद दाखल केली. मध्यवर्ती भागात मोबाइल हिसकावणाऱ्या चोरट्यांची दहशत वाढल्याने पोलिसांच्या गस्तीबाबत शंका उपस्थित केली जात आहे.

शहरातील चेन स्नॅचिंगचे प्रकार रोखण्यात पोलिसांना अद्याप यश आलेले नाही. आता मोबाइल स्नॅचिंगच्या घटना वाढत आहेत. गेल्या महिन्याभरात शाहूपुरी परिसरात चार ठिकाणी मोबाइल हिसकावण्याचे प्रकार घडले आहेत. गुरुवारी रात्री अज्ञात चोरट्यांनी अर्ध्या तासात दोघांचे मोबाइल हिसकावले. रात्री नऊच्या सुमारास जितेंद्र सैंदाणे हे परिख पुलाकडून मध्यवर्ती बसस्थानकाकडे पायी निघाले होते. पाठीमागून चालत आलेल्या एका तरुणाने सैंदाणे यांच्या खिशातील सहा हजार रुपये किंमतीचा मोबाइल जबरदस्तीने काढून घेतला. नंतर तो परिख पुलाच्या दिशेने पळून गेला. चोरट्याच्या अंगात पिवळ्या रंगाचा फुल टी शर्ट होता, अशी माहिती सैंदाणे यांनी पोलिसांना दिली.

साडेनऊच्या सुमारास सुभाषनगरातील आसिफ पिरजादे हे जेम्सस्टोन इमारतीपासून परिख पुलाकडे पायी निघाले होते. यावेळी पाठीमागून काळ्या रंगाच्या पल्सरवरून आलेल्या तरुणांपैकी पाठीमागे बसलेल्या तरुणाने पिरजादे यांच्या हातातील १० हजार रुपये किंमतीचा मोबाइल हिसकावला. नंतर ती दुचाकी परिख पुलाच्या दिशेने निघून गेली. एकाच परिसरात अर्ध्या तासात दोन मोबाइल हिसकावण्याचे प्रकार घडल्याचे समजल्यानंतर शाहूपुरी पोलिसांच्या गस्ती पथकाने तेथे धाव घेतली. सीसीटीव्ही फुटेजच्या माध्यमातून पोलिस चोरट्यांचा शोध घेत आहेत.

मोबाइल अॅप डाउनलोड करा आणि राहा अपडेट

हत्तींचा मोर्चा वाघोत्रे, नांदवडेकडे

December 1, 2017, 1:30 pm

≫ Next: पे अँड पार्कच्या टेंडरकडे पाठ

≪ Previous: सीबीएस परिसरात मोबाइल स्नॅचिंग

$

0

0

चंदगड

चंदगड तालुक्यातील वाघोत्रे येथे टस्कर हत्ती तर सुळये ते नांदवडे परिसरातील जंगलात तीन मादी व दोन पिलांच्या कळपाने आपला मोर्चा वळवला आहे. बुधवारी सकाळी आंबेवाडी- हलकर्णी परिसरात वास्तव्य केलेला कळप शुक्रवारपासून सुळये ते नांदवडे येथील जंगलात स्थिरावला आहे. हत्ती मानवी वस्तीत येवू नयेत यासाठी चंदगड व पाटणे विभागाचे कर्मचारी तैनात आहेत.

बुधवारी तीन माद्या दोन पिल्लांसह हत्तीच्या कळपाने आंबेवाडी - हलकर्णी परिसरातील विस्तीर्ण ऊसाच्या क्षेत्रात नुकसान केले. जंगल सोडून चाऱ्याच्या शोधात हत्तीचा कळप मानवी वस्तीजवळ येत असल्यामुळे लोकांच्यामध्ये भितीचे वातावरण आहे. रात्रीच्या वेळी बाहेर पडणे लोक जाणीवपूर्वक टाळत आहेत. या हत्तींच्या कळपाने नांदवडे, कोळींद्रे व सुळये परिसरातील पिकांचे मोठ्या प्रमाणात नुकसान केले आहे. हत्तींना रोखणे वनविभागाला सध्यातरी शक्य नसले तरी हत्ती मानवी वस्तीत येवू नयेत यासाठी वनविभागाच्या वतीने रात्रीच्या वेळी वनकर्मचारी गस्त घालत आहेत. हत्तींना रोखण्यासाठी ढोल, सुरबाण, फटाकड्या यांचा वापर केला जात आहे. सध्या सुगीचा धांदल सुरु असून हत्तींना खाण्यासाठी शेतामध्ये भात व नाचणा सारखी पिके सहजासहजी मिळत असल्यामुळे हत्ती मानवी वस्तीजवळ येत आहेत.

या हत्तीच्या कळपापासून शेतकऱ्यांनी दक्षता घ्यावी, शेतीची कामे करण्यासाठी दुपारनंतर शेताकडे जाऊ नये. त्याचबरोबर हत्तीकडून नुकसान होईल अशी साधनसामुग्री शेताच्या परिसरात ठेवू नये, असे आवाहन पाटणे वन परिक्षेत्राचे वनअधिकारी महेश परब यांनी केले आहे. हत्तीच्या कळपाला हुसकावून लावण्यासाठी पाटणे परिक्षेत्रातील वनकर्मचारी दयांनद पाटील, अमोल शिंदे, वनरक्षक गोरे, सागर पाटील, बबन जाधव, वनमजूर तुपारे, पुंडलिक नोगोर्डेकर आदींसह कर्मचाऱ्यांची तुकडी तैनात केली आहे.

मोबाइल अॅप डाउनलोड करा आणि राहा अपडेट

पे अँड पार्कच्या टेंडरकडे पाठ

December 1, 2017, 1:30 pm

≫ Next: साखर दराचेही धोरण ठरवा

≪ Previous: हत्तींचा मोर्चा वाघोत्रे, नांदवडेकडे

$

0

0

म. टा. प्रतिनिधी, कोल्हापूर

महापालिकेला अपेक्षित असलेले उत्पन्न देण्यास कुणीच इच्छूक नसल्याने शहरात आठ ठिकाणच्या पे अँड पार्कच्या टेंडरकडे तीनवेळा मुदतवाढ देऊनही कंत्राटदारांनी पाठ फिरवली आहे. त्यामुळे पे अँड पार्कमधून मिळणाऱ्या उत्पन्नामध्ये १५ टक्के घट करण्याचा प्रस्ताव प्रशासनाने तयार केला आहे. त्यानुसार पुन्हा फेरटेंडर काढले जाणार आहे.

शहरातील पार्किंगच्या समस्येवर मार्ग काढण्यासाठी आठ ठिकाणी पे अँड पार्कचे टेंडर मागवले होते. यामधून केएमटीला किमान ९१ लाख रुपयांचे उत्पन्न मिळावे, अशी अपेक्षा होती. पण महापालिकेने दिलेले दर व तिथून मिळणारे उत्पन्न तसेच ही यंत्रणा राबवण्यासाठी होणारा खर्च पाहता महापालिकेच्या अपेक्षेप्रमाणे टेंडर भरण्यास कुणीच धजावले नाही. १२ ऑक्टोबरपर्यंत टेंडर भरण्याची पहिली मुदत होती. तीनवेळा मुदतवाढ देऊनही काहीच प्रतिसाद मिळाला नसल्याने शेवटी केएमटीने उत्पन्नाची अपेक्षा कमी करण्याचे ठरवले. त्यानुसार उत्पन्नाची अपेक्षा पंधरा टक्क्यांनी कमी करत नव्याने टेंडर प्रसिद्ध करण्यात येणार आहे. त्यासाठीचा प्रस्ताव तयार करण्यात आला असून त्याला मंजुरी घेण्यात येत आहे. पावसाळा तसेच अनेक ठिकाणी बारा तासातील जवळपास निम्म्याच तासासाठी असणारी वर्दळ पाहता हा प्रस्ताव तयार करण्यात आला आहे.

शहरातील आठ वर्दळीच्या जागा केएमटीच्यावतीने पार्किंगसाठी निश्चित केल्या आहेत. यातून केएमटीला वर्षाचे उत्पन्न मिळावे व आर्थिक हातभार लागावा, अशी महापालिका प्रशासनाची अपेक्षा होती. त्याप्रमाणे महापालिकेच्या सर्वसाधारण सभेने केएमटीसाठी जागा देण्याचा ठराव केला. यामध्ये सर्वात जास्त उत्पन्न सीपीआर हॉस्पिटल रस्त्यावरून अपेक्षित आहे. तिथे दुचाकीबरोबर चारचाकी हलकी वाहनेही पार्किंग करण्याची व्यवस्था केली आहे. तर स्टेशन रोडवरही चारचाकी वाहनांसाठी पार्किंगची जागा निवडली आहे. चारचाकी व अवजड वाहनांसाठी हुतात्मा पार्कच्या दक्षिणेकडील बाजूला जागा ठेवली आहे.


पार्किंगची नवीन ठिकाणे

दुचाकी : रंकाळा पदपथ उद्यान, ​कपिलतीर्थ मार्केट, चारचाकी वाहने, डी. एड. कॉलेज, रंकाळा टॉवर, ताराबाई रोड, पाटणकर हायस्कूललगत, स्टेशन रोड, गोकुळ हॉटेल लगत.

दुचाकी व चारचाकी वाहने : सीपीआर हॉस्पिटल रोड, आरटीओ ऑफिससमोर

चारचाकी व अवजड वाहने : हुतात्मा पार्कशेजारी

मोबाइल अॅप डाउनलोड करा आणि राहा अपडेट

साखर दराचेही धोरण ठरवा

December 1, 2017, 1:30 pm

≫ Next: आठ मटका अड्ड्यांवर छापे

≪ Previous: पे अँड पार्कच्या टेंडरकडे पाठ

$

0

0

म. टा. प्रतिनिधी, कोल्हापूर

‘गळीत हंगामाच्या सुरुवातीला एफआरपीबाबत चर्चा होते. पण साखर दरांबाबत चर्चा होत नाही. आता हंगाम सुरू झाल्यापासून साखरेच्या दरात क्विंटलमागे २०० ते ३०० रुपयांची घट झाली आहे. त्यामुळे कारखान्यांना एफआरपी देताना अडचणी निर्माण होत आहेत. कारखान्यांचा उत्पादन खर्चाचा विचार करुन दरवर्षीची एफआरपी निश्चित करताना साखरेच्या दराचे धोरण ठरववायला हवे. तरच सहकारी कारखानदारी टिकेल,’असे मत काँग्रेसचे प्रदेशाध्यक्ष अशोकराव चव्हाण यांनी व्यक्त केले. आमदार सतेज पाटील यांच्यावतीने तपोवन मैदानावर आयोजित कृषी प्रदर्शनाच्या उद्घाटनप्रसंगी ते बोलत होते.

प्रदेशाध्यक्ष चव्हाण म्हणाले, ‘सध्याच्या सरकारने कर्जमाफीवरुन खेळ मांडला आहे. शेतकऱ्यांना कर्जाच्या खाईतून बाहेर काढण्यासाठी सरसकट कर्जमाफी केली तरच शेतकऱ्यांच्या आत्महत्या थांबतील. शेतकऱ्यांना उर्जीतावस्था देण्यासाठी मुख्यमंत्री देवेंद्र फडणवीस यांनी सकारात्मक निर्णय घ्यावा. सरकार शेतकऱ्यांना पोषक धोरण असल्याचा डांगोरा पिटला जात असताना शेती औजारे आणि उत्पादनावर जीएसटी लावून पिळवणूक सुरू आहे. याला विरोध करण्यासाठी सामुदायिक प्रयत्न हवेत.’

माजी मंत्री पंतगराव कदम म्हणाले, ‘सरकारच्या शेतीविरोधी धोरणांनी शेतकऱ्यांची फसवणूक केली. त्यामुळे शेतकऱ्यांना केवळ दराचा विचार न करताना उत्पादन वाढीवर भर द्यावा लागेल.’

आमदार हसन मुश्रीफ म्हणाले, ‘यंदाच्या गळीत हंगामात २५ टक्के ऊसतोड मजूर आलेले नाहीत. यातून मार्ग काढण्यासाठी छोट्या मशिन्सची निर्मिती करणे आवश्यक आहे. यासाठी असे कृषी प्रदर्शन उपयोगी ठरेल.’

आमदार सतेज पाटील म्हणाले, ‘जिल्ह्याचा पाया कृषी क्षेत्रावर आधारीत आहे. शेतीसाठी आधुनिक तंत्रज्ञान उपलब्ध करुन देण्यासाठीच कृषी प्रदर्शनाची मांडणी केली आहे. शेतीचे विभाजने होत असल्याने सामुदायिक शेतीचा भविष्यात विचार करायला हवा.’

प्रदर्शनामध्ये १५० स्टॉलची मांडणी केली आहे. शेतकऱ्यांनी केलेल्या प्रयोगांतील उत्पादने लक्ष वेधून घेत आहे. यावेळी प्रमुख्य पाहुण्यांच्या हस्ते सतेज कृषिरत्न पुरस्काराने जिल्ह्यातील प्रयोगशील आणि प्रगतशील शेतकऱ्यांचा सन्मान झाला. काँग्रेसचे जिल्हाध्यक्ष पी. एन. पाटील, राष्ट्रवादीचे जिल्हाध्यक्ष ए. वाय. पाटील, माजी आमदार के. पी. पाटील, डॉ. संजय पाटील, निवेदिता माने, प्रतिमा पाटील, प्रकाश आवाडे, जयवंतराव आवळे आदी उपस्थित होते.

मोबाइल अॅप डाउनलोड करा आणि राहा अपडेट

आठ मटका अड्ड्यांवर छापे

December 1, 2017, 1:30 pm

≫ Next: पक्षातील अंतर्गत वाद मिटवा

≪ Previous: साखर दराचेही धोरण ठरवा

$

0

0

म. टा. प्रतिनिधी, कोल्हापूर

महापालिकेच्या अतिक्रमण हटाव मोहिमेवेळी अनेक ठिकाणी मटका अड्डे सुरू असल्याचे उघडकीस आल्यानंतर पोलिसांनी अशा अड्ड्यांवर कारवाईस सुरुवात केली. शुक्रवारी (ता. १) स्थानिक गुन्हे अन्वेषण शाखेसह शहरातील पोलिस ठाण्यांनी आठ ठिकाणी मटका अड्ड्यांवर छापे टाकले. या कारवाईत ३० हजार रुपयांचा मुद्देमाल जप्त केला. तर १२ जणांवर गुन्हे दाखल केले आहेत.

महापालिका प्रशासनाने शहरातील अनधिकृत आणि अतिक्रमण केलेल्या टपऱ्यांसह खोकी हटवण्यीच मोहीम हाती घेतली आहे. कारवाईत सर्वच ठिकाणी मटक्याच्या चिठ्ठ्या सापडल्याने शहरात मटका आणि जुगाराचे अड्डे जोरदार सरू असल्याचे स्पष्ट झाले. यानंतर पोलिसांनी मटका अड्ड्यांवर कारवाई सुरू केली आहे. शुक्रवारी स्थानिक गुन्हे अन्वेषण शाखेसह शहरातील चारही पोलिस ठाण्यांनी मटका अड्ड्यांवर छापे टाकले.

शाहूपुरी पोलिस ठाण्याच्या हद्दीतील स्टार बाजारसमोर उड्डाणपुलाखाली दोन ठिकाणी कारवाई केली. यात अजित दिनकर मोरे (वय २५, रा. हणबरवाडी, ता. कागल) याला ताब्यात घेतले, तर बुकीमालक अभिजित यादव (रा, जवाहरनगर) हा पळून गेला. याच ठिकाणी केलेल्या दुसऱ्या कारवाईत सिद्धू पांडुरंग सावंत याला मटका घेताना पोलिसांनी ताब्यात घेतले. या दोन्ही कारवाईत पोलिसांनी साडेपाच हजार रुपये जप्त केले. कसबा बावड्यातील जयभवानी गल्ली चौकात केलेल्या कारवाईत अभिमन्यू यशवंत कुरणे (५५, रा. रमणमळा) याला ताब्यात घेतले. बुकीमालक अभिजित यादव पळून गेला.

राजारामपुरी पोलिस ठाण्याच्या हद्दीत शाहूनगर येथील कारवाईत अमर तानाजी पोवार (३५, रा. दौलतनगर) याला ताब्यात घेतले, तर बबन लाला कवाळे (रा. राजारामपुरी) हा संशयित पळाला. जवाहरनगरातील जुना कंदलगाव नाक्यावर केलेल्या कारवाईत सागर प्रभुदास व्हटकर (३६, रा. जवाहरनगर) याला ताब्यात घेतले. या दोन्ही कारवाईत पोलिसांनी २८०० रुपये जप्त केले. जुना राजवाडा पोलिस ठाण्याच्या हद्दीतील ताराबाई रोडवर तटाकडील तालीम मंडळाच्या मागे कारवाई केली. यात श्रीपती पांडुरंग काशिद (४५, रा. रामानंदनगर) याला ताब्यात घेतले. रंकाळा स्टँडमागे कारवाई करून सचिन लक्ष्मण परबाळे (३८, रा. शनिवार पेठ) याला

ताब्यात घेतले. या कारवायांमध्ये १७ हजार रुपये जप्त केले.

करवीर पोलिस ठाण्याच्या हद्दीतील पाचगावमध्ये रायगड कॉलनी परिसरात दोन ठिकाणी कारवाई झाली. पोलिसांनी जयदीप दयानंद सरवदे (३६, रा. रायगड कॉलनी, पाचगाव) आणि अमर सुनील सातवेकर (२६, रा. शिवनेरी कॉलनी, पाचगाव) या दोघांना ताब्यात घेतले, तर बुकीमालक उत्तम फडतारे पळून गेला. या दोन्ही ठिकाणांहून पोलिसांनी सहा हजार रुपये जप्त केले. लक्ष्मीपुरी पोलिसांची कारवाई रात्री उशिरापर्यंत सुरू होती. दिवसभराच्या कारवाईत

पोलिसांनी १२ संशयितांवर गुन्हे दाखल केले, तर सुमारे ३० हजार रुपये जप्त केले आहेत.

मोबाइल अॅप डाउनलोड करा आणि राहा अपडेट

पक्षातील अंतर्गत वाद मिटवा

December 1, 2017, 1:30 pm

≫ Next: डेंगीच्या अळ्यांचा आढळ

≪ Previous: आठ मटका अड्ड्यांवर छापे

$

0

0

म. टा. प्रतिनिधी, कोल्हापूर

‘राज्यात आणि जिल्हा काँग्रेसमध्ये काही ठिकाणी समीकरण बिघडले आहे. मात्र हे सर्व विषय छोटे आहेत. कोल्हापूर जिल्ह्यातही काही अंतर्गत वाद आहे. पतंगराव, तुम्ही कोल्हापूर जिल्ह्याचे पालकमंत्री म्हणून काम पाहिले आहे. वादाचे प्रश्न स्थानिक पातळीवरच मिटवा. तुम्ही घ्याल तो निर्णय मान्य करू’ असे काँग्रेसचे प्रदेशाध्यक्ष, माजी मुख्यमंत्री अशोक चव्हाण यांनी शुक्रवारी येथे सांगितले. स्टेशन रोडवरील काँग्रेस कमिटीत शुक्रवारी पदाधिकारी, कार्यकर्ता मेळाव्यात ते बोलत होते. १२ डिसेंबरला, नागपूर अधिवेशनातील मोर्चाबाबतची चर्चा यावेळी झाली. ‘राज्यात सरकारविरोधी लाट आहे. काँग्रेस निश्चितच राज्यात पहिल्या क्रमांकाचा पक्ष बनेल’ असा विश्वास चव्हाण यांनी व्यक्त केला.

बैठकीत माजी मंत्री जयंवतराव आवळे यांनी पक्षामधील गटबाजीवर टीका केली. ते म्हणाले, ‘पक्षात अनेक घरभेदी आहेत. मंत्री मी होणार की तू अशी स्पर्धा काहींची सुरू आहे. पक्षाचेच लोक पाय ओढत आहेत. पक्षाशी गद्दारी केल्यास हाकलून द्या. नेते, पदाधिकारी आणि काही कार्यकर्त्यांना समज द्या.’

आवळे यांच्या वक्तव्याचा संदर्भ देत खासदार अशोक चव्हाण म्हणाले, ‘आता मागचा इतिहास पाहू नका. काँग्रेसला पुढे न्यायचे आहे. नवी आणि जुन्या पिढीला संमिश्र संधी देण्याचा विचार आहे. कोल्हापूर जिल्ह्यात काही ठिकाणी बिघडलेली समीकरणे दुरुस्त करण्याची गरज आहे. त्यासाठी पतंगराव कदम यांनी हा प्रश्न मिटवावा. त्यांचा निर्णय मान्य करू.’

प्रदेशाध्यक्ष अशोक चव्हाण म्हणाले, ‘भाजप सरकारच्या विरोधात लोकांची शंभर टक्के नाराजी आहे. विविध प्रश्नांवर जनमत एकवटण्यासाठी पश्चिम महाराष्ट्रात जानेवारीपासून मतदारसंघनिहाय संपर्क यात्रा सुरु केली जाणार आहे.’

माजी आमदार पतंगराव कदम म्हणाले, ‘पक्षाचे सगळी स्थिती माहिती आहे. यापूर्वी ती सक्षमपणे हाताळली आहे. सध्या पक्षाला पोषक वातावरण आहे.’

जिल्हाध्यक्ष पी. एन. पाटील म्हणाले, ‘भाजपचे सरकार फसवे सरकार आहे. त्यांनी अनेकांना फसवी आश्वासने दिली आहते.’ आमदार सतेज पाटील, शहराध्यक्ष प्रल्हाद चव्हाण, माजी आमदार भरमू पाटील, बजंरग देसाई, संजीवनी गायकवाड, पक्षाचे महासचिव पृथ्वीराज साठे, तौफिक मुल्लाणी, देवस्थान समितीचे माजी अध्यक्ष गुलाबराव घोरपडे आदी उपस्थित होते. माजी नगरसेवक सचिन चव्हाण यांच्या हस्ते प्रदेशाध्यक्ष चव्हाण यांना अंबाबाईची मूर्ती देण्यात आली.

मोबाइल अॅप डाउनलोड करा आणि राहा अपडेट

डेंगीच्या अळ्यांचा आढळ

December 1, 2017, 1:30 pm

≫ Next: पत्नीला छेडणाऱ्या तरुणाला भररस्त्यात भोसकले

≪ Previous: पक्षातील अंतर्गत वाद मिटवा

$

0

0

म. टा. प्रतिनिधी, कोल्हापूर

डेंगीची साथ रोखण्यासाठी महापालिकेच्या विशेष पथकांकडून शुक्रवारी करण्यात अडीच हजार घरांच्या पाहणीमध्ये तब्बल २७६ विविध कंटेनरमध्ये डेंगीच्या डासांच्या अळ्या सापडल्या. तसेच ताप असलेले ३५ रुग्ण आढळले असून त्यातील नऊ रुग्णांचे रक्ताचे नमुने तपासणीसाठी घेतले आहेत. शहरामध्ये डेंगीचे रुग्ण आढळत असल्याने पथकांना अगदी बारकाईने तपासणी करण्याचे आदेश दिल्याचे आरोग्याधिकारी डॉ. अरुण वाडेकर यांनी सांगितले.

डेंगीचे रुग्ण आढळत असलेल्या भागामध्ये महापालिकेच्यावतीने विशेष पथके स्थापन करुन गुरुवारपासून थेट पाहणीला सुरुवात केली आहे. सीपीआर व सिद्धार्थनगर परिसर, फिरंगाई परिसर, जवाहरनगर, शुक्रवार पेठ, सदर बाजार, टेंबलाई मंदिर परिसर, बागल चौक परिसरात विविध पथके फिरती करत आहेत. या पथकांकडून घरात जाऊन कोण आजारी आहे याची माहिती घेण्यात येते. तसेच पाणी साठवण्याची सर्व भांडी तपासण्यात येत असून पाणी रिकामी करुन तपासणीदिवशी कोरडा दिवस ठेवण्याचा प्रयत्न केला जात आहे. शुक्रवारी दिवसभरात या पाच पथकांनी अडीच हजार घरांची तपासणी केली. या घरांमधील ६२४० विविध प्रकारची भांडी तपासण्यात आली. त्यातील २७६ भांड्यांमध्ये डासांच्या अळ्या सापडल्या. घरांमध्ये माहिती घेतली जात असताना पथकांना ३५ तापाचे रुग्ण आढळले. त्यातील रुग्णांची तपासणी केली असता त्यातील नऊ संशयित रुग्ण आढळून आले. या रुग्णांचे रक्ताचे नमूने घेण्यात आले आहेत.

पथकांकडून घरोघरी जाऊन तपासणी केली जात असली तरी अनेक भागात रुग्ण आढळून येत आहेत. शुक्रवार पेठ, नागाळा पार्क, शिवाजी पेठ या परिसरातील रुग्ण आढळत असल्याची माहिती खासगी दवाखान्यांकडून दिली जात आहे. आगामी दहा दिवसात ही पथके सातत्याने फिरती करत राहणार असून त्या पाहणीवेळी दिवस कोरडा करण्याचा प्रयत्न केला जात आहे. साठवलेल्या पाण्यात अळ्या साठू नये यासाठी नागरिकांना आठवड्यातून एकदा तरी सर्व पाणी ओतून देऊन कोरडा दिवस पाळण्यासाठीचे आवाहन केले जात आहे.

मोबाइल अॅप डाउनलोड करा आणि राहा अपडेट

---

पत्नीला छेडणाऱ्या तरुणाला भररस्त्यात भोसकले

December 2, 2017, 3:02 am

≫ Next: भाऊबीजसाठी अंगणवाडी कर्मचाऱ्यांचा शंखध्वनी

≪ Previous: डेंगीच्या अळ्यांचा आढळ

$

0

0

कोल्हापूर:
पत्नीची छेड काढणाऱ्या तरुणाची भररस्त्यात चाकूने भोसकून हत्या करण्यात आल्याची घटना आज सकाळी साडेनऊच्या सुमारास कोल्हापुरातील बागल चौकात घडली. समीर बाबासो मुजावर (वय ३०, रा. सुभाषनगर) असे मृताचे नाव आहे. या प्रकरणी अनिल रघुनाथ धावडे (वय ३४, रा. बागल चौक) याला पोलिसांनी अटक केली आहे.

शाहूपुरी पोलिसांच्या माहितीनुसार, हल्लेखोर अनिल धावडे हा पत्नी आणि दोन मुलांसह बागल चौकात राहतो. त्याची पत्नी राजारामपुरीतील एका जिममध्ये ट्रेनर म्हणून काम करत होती. याच परिसरात समीरचे दुकान होते. त्यावेळी या दोघांची ओळख झाली होती. ओळखीचा गैरफायदा घेत तो वारंवार तिची छेड काढत होता. तीन वर्षांपासून हा प्रकार सुरू होता. याबाबत अनेकदा समजही दिली होती. पण छेडछाडीचा प्रकार थांबला नाही. समीर आज सकाळी साडेनऊच्या सुमारास राजारामपुरीमधील दुकानावर जात होता. धावडेच्या घरासमोरून जात असताना या दोघांमध्ये वाद झाला. झटापटीनंतर धावडे घरात गेला आणि चाकू घेऊन आला. त्याने भररस्त्याच समीरला भोसकले. या हल्ल्यात जखमी झालेल्या समीरला नागेश प्रल्हाद शिखरे (रा. टेंबलाईवाडी) यांच्यासह काही नागरिकांनी सीपीआर रुग्णालयात दाखल केले.
उपचारादरम्यान सकाळी पावणेअकराच्या सुमारास त्याचा मृत्यू झाला. या घटनेची माहिती शाहूपुरी आणि लक्ष्मीपुरी पोलिसांना मिळाली. ते सीपीआर रुग्णालयात पोहोचले. समीरचे कुटुंबीय आणि नातेवाईकही तेथे आले. विच्छेदनानंतर समीरचा मृतदेह नातेवाईकांकडे सोपवण्यात आला. या प्रकरणी धावडेला अटक करण्यात आली आहे.

हल्लेखोर धावडेनेच पोलिसांना कळवले

समीरला चाकूने भोसकल्यानंतर हल्लेखोर धावडे सीपीआर रुग्णालयातच थांबला होता. त्यानेच या घटनेची माहिती पोलिसांना दिली. त्यानंतर सीपीआर परिसरातील पोलीस चौकीतील हवालदार पी. के. जाधव आणि कॉन्स्टेबल कृष्णा काकडे यांनी त्याला अटक केली. त्यानंतर पोलीस निरीक्षक तानाजी सावंत यांनी धावडेला लक्ष्मीपुरी पोलिसांच्या ताब्यात दिले.

मोबाइल अॅप डाउनलोड करा आणि राहा अपडेट

भाऊबीजसाठी अंगणवाडी कर्मचाऱ्यांचा शंखध्वनी

December 2, 2017, 1:30 pm

≫ Next: पत्नीची छेड काढल्याच्या रागातून खून

≪ Previous: पत्नीला छेडणाऱ्या तरुणाला भररस्त्यात भोसकले

$

0

0

म. टा. प्रतिनिधी, कोल्हापूर

भाऊबीज आणि मानधनवाढीचा निर्णय होऊन अद्याप काहीच न मिळाल्याने उद्विग्न झालेल्या अंगणवाडी कर्मचाऱ्यांनी शनिवारी जिल्हा परिषदेवर मोर्चा काढला. २४ नोव्हेंबर रोजी काढण्यात आलेल्या परिपत्रकाची होळी करत शंखध्वनी करत सरकारचा निषेधही केला. मोर्चाचे जिल्हा अंगणवाडी कर्मचारी युनियनच्यावतीने मोर्चाचे आयोजन केले होते. मागण्यांचे निवेदन आप्पा पाटील, जयश्री पाटील यांच्या नेतृत्वाखालील शिष्टमंडळाने महिला व बालकल्याण विभागाचे उपमुख्य कार्यकारी अधिकारी एस. डी. मोहिते यांना दिले.

अंगणवाडी सेविका आणि मदतनीसांना भाऊबीज भेट म्हणून दोन हजार देण्याचा निर्णय झाला होता. निर्णयानंतर अंगणवाडी कर्मचाऱ्यांनी दीड महिने सुरू असलेला बेमुदत संप मागे घेतला होता. ग्रामविकास मंत्री पंकजा मुंडे यांच्या प्रमुख उपस्थितीत झालेल्या बैठकीत १५०० रुपयांप्रमाणे भाऊबीज देण्याचा निर्णय घेण्यात आला, पण २४ नोव्हेंबरला परिपत्रक काढून पुन्हा एक हजार रुपयाचीच भाऊबीज भेट देण्याचा निर्णय घेतला. याचा निषेध करीत दुपारी दीड वाजता महावीर उद्यान येथून मोर्चाला सुरुवात झाली. सरकारच्या निषेधाच्या घोषणा देत अंगणवाडी कर्मचारी जिल्हा परिषदेवर दाखल झाले.

मोर्चा मुख्य प्रवेशद्वाराजवळ अडवण्यात आल्यानंतर कर्मचाऱ्यांनी ठिय्या मारत शंखध्वनी करुन सरकारचा निषेध केला. त्यानंतर सरकारच्या परिपत्रकाची होळीही केली. त्यानंतर शिष्टमंडळाच्यावतीने महिला व बालकल्याण अधिकारी मोहिते यांना निवेदन दिले.

निवेदनात म्हटले आहे की, दिवाळीसाठी भाऊबीज भेट म्हणून दोन हजार रुपये देण्याचा निर्णय घेतला, परंतु आतापर्यंत भाऊबीज भेट किंवा वाढीव मानधन दिलेले नाही. तरीही २४ नोव्हेंबरला परिपत्रक काढून सेविका व मदतनीसांना पूर्वीप्रमाणेच एक हजार रुपये भाऊबीज भेट देण्याचे जाहीर केली. त्यामुळे अंगणवाडी कर्मचाऱ्यांची फसवणूक झाली आहे. संपादरम्यान अंगणवाडी सेविकांचे मानधन पाच हजारांवरुन सहा हजार तर मदतनीसांचे २५०० वरुन ३५०० करण्याचा निर्णय घेतला, पण अद्याप याही निर्णयाची अंमलबजावणी झालेली नाही.

मोर्चामध्ये सरिता कंदले, शमा पठाण, अर्चना पाटील, सुचित्रा शिनगारे, सुनंदा कुराडे, विद्या कांबळे, अंजली क्षीरसागर, शोभा भंडारे आदी सहभागी झाले होते.

मोबाइल अॅप डाउनलोड करा आणि राहा अपडेट

पत्नीची छेड काढल्याच्या रागातून खून

December 2, 2017, 1:30 pm

≫ Next: डेंगीविरोधी पथकाकडून दोन हजारांचा दंड

≪ Previous: भाऊबीजसाठी अंगणवाडी कर्मचाऱ्यांचा शंखध्वनी

$

0

0

म. टा. प्रतिनिधी, कोल्हापूर

वारंवार पत्नीची छेड काढत असल्याच्या रागातून तरुणाचा चाकूने भोसकून खून करण्यात आला. समीर बाबासो मुजावर (वय ३०, रा. सुभाषनगर) असे मृताचे नाव आहे. हल्लेखोर अनिल रघुनाथ धावडे (वय ३४, रा. बागल चौक) याला पोलिसांनी सीपीआरमधून अटक केली. शनिवारी (ता. २) सकाळी साडेनऊच्या सुमारास ही घटना बागल चौकात घडली.

शाहूपुरी पोलिस आणि सीपीआरमधून मिळालेल्या माहितीनुसार अनिल धावडे हा खासगी नोकरी करतो. पत्नी आणि दोन मुलांसह तो बागल चौकातील एका शोरुममागे राहतो. त्याची पत्नी राजारामपुरीतील एका जिममध्ये ट्रेनर म्हणून काम करीत होती. तिची समीरशी ओळख झाली होती. समीरने राजारामपुरीतील खेळण्यांचे दुकान चालवण्यासाठी घेतले होते. तो सुभाषनगर येथे पत्नी, तीन वर्षांची मुलगी आणि आईसह राहत होता. ओळखीचा गैरफायदा घेऊन तो वारंवार पत्नीची छेड काढत होता. गेल्या तीन वर्षांपासून हा प्रकार सुरू होता. अनेकदा समज देऊनही त्याने छोडछाड थांबवली नाही. शनिवारी सकाळी साडेनऊच्या सुमारास समीर दुकान उघडण्यासाठी राजारामपुरीत निघाला होता. जाताना तो धावडेच्या घरासमोर गेला. यावेळी अनिल आणि समीरचा वाद झाला. दोघांत झटापट झाल्यानंतर अनिल पळत घरात गेला. चाकू घेऊन आलेल्या अनिलने समीरला चाकूने भोसकले. वर्मी घाव लागलेला समीर रस्त्यातच कोसळला. यानंतर समोरच्या चहाच्या गाडीवरील नागरिक आणि टेलरिंगचे काम करणारे नागेश प्रल्हाद शिखरे (रा. टेंबलाईवाडी) यांनी जखमी समीरला खासगी वाहनातून सीपीआरमध्ये दाखल केले.

उपचारादरम्यान सकाळी पावणेअकराच्या सुमारास समीरचा मृत्यू झाला. सीपीआरच्या पोलिस चौकीतील पोलिसांनी या घटनेची माहिती शाहूपुरी आणि लक्ष्मीपुरी पोलिसांना दिली. यानंतर पोलिसांचा फौजफाटा सीपीआरमध्ये दाखल झाला.

समीर मुजावरच्या नातेवाईकांना घटनेची माहिती मिळताच त्याची पत्नी, भाऊ, मामा यांनी सीपीआरमध्ये धाव घेतली. समीरचा मृत्यू झाल्याचे कळताच नातेवाईकांनी सापीआरमध्येच हंबरडा फोडला. उत्तरीय तपासणी करून मृतदेह नातेवाईकांकडे सोपवण्यात आला. मृत समीरच्या पश्चात पत्नी सुफिया, मुलगी रिया, आई असा परिवार आहे.


हल्लेखोर स्वतःच सीपीआरमध्ये हजर

समीरवर हल्ला करणारा अनिल धावडे हा सीपीआरच्या अपघात विभागात जाऊन थांबला होता. समीरवर हल्ला केल्याची माहिती त्यानेच पोलिसांना दिली. यानंतर सीपीआर पोलिस चौकीतील हावलदार पी. के. जाधव आणि कॉन्स्टेबल कृष्णा काकडे यांनी अनिलला ताब्यात घेऊन चौकीत ठेवले. पोलिस निरीक्षक तानाजी सावंत यांनी हल्लेखोराला ताब्यात घेऊन त्याला लक्ष्मीपुरी पोलिस ठाण्यात पाठवले.

मोबाइल अॅप डाउनलोड करा आणि राहा अपडेट

डेंगीविरोधी पथकाकडून दोन हजारांचा दंड

December 2, 2017, 1:30 pm

≫ Next: अधिकाऱ्यांना जबाबदार धरा

≪ Previous: पत्नीची छेड काढल्याच्या रागातून खून

$

0

0

म. टा. प्रतिनिधी, कोल्हापूर

शहरातील डेंगीचा प्रादुर्भाव रोखण्यासाठी महापालिकेच्या आरोग्य यंत्रणेने सलग दुसऱ्या दिवशी शहराच्या विविध भागांत तपासणी मोहीम राबवली. धूर फवारणी, औषध फवारणीसह टायर जप्तीची कारवाई हाती घेतली आहे. मंगळवार पेठेतील शिवप्रसाद अपार्टमेंट येथील बेसमेंटमध्ये अनधिकृत पाणीसाठा केल्याप्रकरणी मनोहर जाधव यांना दोन हजार रुपयांची दंडात्मक कारवाई केली. दिवसभराच्या तपासणीत विविध ठिकाणी केलेल्या तपासणीत ११४ ठिकाणी डेंगीच्या डासांच्या अळ्या आढळल्या.

आरोग्य पथकाला तपासणीदरम्यान मंगळवार पेठेतील पाटाकडील तालीम मंडळाच्या पिछाडीस असलेल्या अपार्टमेंटमध्ये डेंगीची लागण झालेला रुग्ण आढळला आहे. हा रुग्ण महापालिकेचा कर्मचारी असून, तो नगदी विभागात काम करतो. मंगळवार पेठेत गेल्या महिनाभरात डेंगीचे चार रुग्ण आढळले आहेत. दिवसभराच्या तपासणीत विविध ठिकाणी केलेल्या तपासणीत ११४ ठिकाणी डेंगीच्या डासांच्या अळ्या आढळल्या.

शहर आणि परिसरात डेंगीसदृश रुग्णसंख्येत भर पडत असल्याने त्याला अटकाव करण्यासाठी महापालिकेच्या आरोग्य विभागाने विशेष पथकाची स्थापना केली आहे. पथकामार्फत शुक्रवारपासून विविध भागांची घरोघरी तपासणी सुरू आहे. शिवाय पाणी साठवणुकीच्या भांड्यांची तपासणी होत आहे. शनिवारी सिद्धाळा गार्डन व कैलासगडची स्वारी मंदिर प्रभागात मोहीम राबविली. सिद्धाळा गार्डन परिसर, जासूद गल्ली, डाकवे गल्ली, मंडलिक गल्ली, राम गल्ली, बराले पॅसेज, कैलासगडची स्वारी मंदिर परिसर, पाटाकडील तालीम मंडळ परिसरात घरोघरी जाऊन तपासणी झाली. पाणी साठवणुकीचे कंटेनर, भांड्यांची तपासणी झाली. कंटेनर रिकामे करण्यात आले. तसेच डेंगीचा प्रादुर्भाव रोखण्यासाठी धूर फवारणी, औषध फवारणी, टायर जप्तीही केली. डेंगी अळीनाशक आ​णि गप्पी मासे सोडण्यात आले.

मंगळवार पेठेत तपासणी सुरू असताना पाच ठिकाणी तळघरात पाणी साठवल्याचे उघडकीस आले. त्यापैकी चौघांनी तत्काळ पाणी उपसा सुरू केला, तर शिवप्रसाद अपार्टमेंटमधील बेसमेंटमध्ये मनोहर जाधव यांनी अनधिकृत पाणीसाठा केल्याबद्दल त्यांना दोन हजार रुपयांचा दंड ठोठावला आहे. शिवाय रविवारपर्यंत पाणीउपसा करण्याचे आदेश दिले आहेत. सिद्धाळा गार्डन आणि कैलासगडची स्वारी मंदिर प्रभागातील घर टू घर सर्व्हेत ११४ ठिकाणी कंटेनरमध्ये डेंगीच्या डासांच्या अळ्या सापडल्या. यामध्ये सिद्धाळा गार्डन प्रभागात ७७ ठिकाणी, तर कैलासगडची स्वारी मंदिर येथे ३७ ठिकाणचा समावेश आहे. तेथे आरोग्य यंत्रणेकडून औषध फवारणी केली.

मोबाइल अॅप डाउनलोड करा आणि राहा अपडेट

अधिकाऱ्यांना जबाबदार धरा

December 2, 2017, 1:30 pm

≫ Next: होय, मीच हल्ला केला...!

≪ Previous: डेंगीविरोधी पथकाकडून दोन हजारांचा दंड

$

0

0

म. टा. प्रतिनिधी, कोल्हापूर

शहरात अतिक्रमणविरोधी मोहिमेत अनेक ठिकाणी अतिक्रमणे काढण्यात आली. मात्र, दोन दिवसांनंतर पुन्हा त्याच ठिकाणी केबिन आणि गाड्या थाटल्या आहेत. याप्रकरणी संबंधित अधिकाऱ्यांवर जबाबदारी निश्चित करावी, पुन्हा उपशहर अभियंता आणि कनिष्ठ अभियंता यांच्यावर कारवाई करावी. केबिन आणि फेरीवाल्यांवर कारवाईची मागणी महापालिकेच्या शनिवारी झालेल्या स्थायी समिती सभेत नगरसेवकांनी करून प्रशासनाला धारेवर धरले. थेट पाइपलाइन योजना, रस्त्यावर बंद पडलेल्या वाहनांची उचल, मैलायुक्त पाणी, खराब पाण्याच्या टाकीवरून प्रशासनावर हल्लाबोल चढविला.

नगरसेवक सत्यजित कदम यांनी, ‘कचरा उठावासाठी वाहने कमी आहेत. शहरात ठिकठिकाणी कंटेनर भरून कचरा वाहत आहे. खराब कंटेनरची दुरुस्ती केलेली नाही. रुईकर कॉलनी येथील महाडिक माळ येथील कचरा उठावाचे नियोजन केलेले नाही. त्यावर वाहनांचे पासिंग सुरू असल्याने कमी वाहन संख्या आहे. कंटेनर दुरुस्तीसाठी निविदा मागविली आहे. खराब कंटेनर चार दिवसांत दुरुस्तीसाठी स्टोअर विभागाकडे जमा करावेत, असे सांगून ३८० रोजंदारी कर्मचारी, ठोस मानधनावरील कर्मचाऱ्यांच्या मानधनवाढीचा प्रश्न उपस्थित केला. त्याबाबत पुढील बैठकीवेळी माहिती घेतली जाईल. स्थायी समितीने सुचविल्याप्रमाणे ठोक मानधनवाढीसाठी आयुक्तांनी सहमती दर्शविली आहे. लवकरच हा प्रस्ताव स्थायी समितीसमोर मंजुरीसाठी ठेवण्यात येईल, असे प्रशासनाने उत्तर दिले.

थेट पाइपलाइचे कामावर कोणाचे नियंत्रण आहे, कोणत्या अधिकाऱ्याची नेमणूक केली, असे प्रश्न सदस्यांनी मांडले. त्यावेळी हेमंत गोंगाणे बदलीच्या ठिकाणी हजर झाले आहेत. जीवन प्राधिकरणाची चर्चा झाली. मात्र, मुलाखतीसाठी कोणीही आले नाही. तसेच अमृत योजनेसाठी जादा दराची निविदा आल्यास महापालिकेला पैसे द्यावे लागतील असे सरकारचे निर्देश आहेत. त्यासाठी प्रस्ताव सादर केला जाईल, असे प्रशासनाने सांगितले. अफजल पीरजादे यांनी ओपन जिमचे काय झाले, टेंडर निविदा उघडल्या आहेत का, असा प्रश्न विचारला. त्यावर प्रशासनाने तीन कंपन्या पात्र ठरल्याचे सांगितले. डॉ. प्रकाश पावरा यांच्या डिग्रीसंदर्भातही प्रश्न मांडले. रस्त्यावरील बंद वाहने क्रेन भाड्याने घेऊन लवकरच हलविली जातील, सिग्नल देखभाल दुरुस्तीसाठी ठेकेदाराची नियुक्ती केली आहे, डेंगी रोखण्यासाठी १० वैद्यकीय पथके तैनात केली असून सर्व्हे सुरू असल्याचे प्रशासनातर्फे सांगितले.

नगरसेवक आशिष ढवळे, उमा इंगळे यांनी अतिक्रमण पुन्हा होऊ नये यासाठी ठोस कारवाईची मागणी केली. शहराच्या प्रत्येक चौकात ३०० मीटरच्या परिसरात एकही अतिक्रमण होऊ देऊ नका. सर्व चौक रिकामे करावेत. अतिक्रमण पुन्हा झाल्यास संबंधित अधिकाऱ्यावर जबाबदारी निश्चित करावी. पुन्हा गाड्या उभारल्यास उपशहर अभियंता, कनिष्ठ अभियंता यांच्यावर कारवाई करावी. मध्यवर्ती बसस्थानकात दिवस-रात्र सुरू असलेल्या गाड्या जप्त कराव्यात, अशी मागणी केली. त्यावेळी कायमस्वरुपी गाड्या लावू दिल्या जाणार नाहीत. सातत्याने कारवाई केली जाईल, असे प्रशासनाने सांगितले.

मोबाइल अॅप डाउनलोड करा आणि राहा अपडेट

होय, मीच हल्ला केला...!

December 2, 2017, 1:30 pm

≫ Next: राजकीय पक्षांकडून मतांसाठी जातीय दंगे

≪ Previous: अधिकाऱ्यांना जबाबदार धरा

$

0

0

म. टा. प्रतिनिधी, कोल्हापूर

पत्नीची छेड काढत असल्याच्या रागातून तरुणाला चाकूने भोसकल्यानंतर तो जिवंत आहे की मरण पावला हे पाहण्यासाठी हल्लेखोर अनिल रघुनाथ धावडे (वय ३४, रा. बागल चौक) सीपीआरमध्ये गेला होता. खात्री करण्यासाठी त्याने डॉक्टरांकडेच विचारपूस केली. यावेळी समीरचा मृत्यू झाल्याचे समजताच ‘होय साहेब, मी हल्ला केला,’ अशी त्याने कबुली दिल्याने डॉक्टरही चक्रावले. डॉक्टरांनी सीपीआरमधील पोलिस चौकीत माहिती देताच पोलिसांनी प्रसंगावधान राखत हल्लेखोर धावडेला ताब्यात घेतले.

अनिल धावडे हा पत्नी आणि दोन मुलांसह बागल चौकातील घरात राहतो. त्याची पत्नी राजारामपुरीतील एका जिममध्ये ट्रेनर म्हणून काम करीत होती. त्यावेळी समीर बाबासाहेब मुजावर (वय ३०, रा. सुभाषनगर) याच्याशी तिची ओळख झाली होती. त्याचा गैरफायदा घेऊन समीर वारंवार तिची छेड काढत होता, अशी तक्रार धावडेने केली आहे. धावडेने अनेकदा समीरला समजावून सांगण्याचा प्रयत्न केला. शनिवारी सकाळी साडेनऊच्या सुमारास समीर राजारामपुरीतील दुकानाकडे जात असताना धावडेच्या घरासमोर समीर व त्याच्यात वादावादी होऊन झटापटही झाली. यानंतर चिडलेल्या धावडेने चाकूने समीरला भोसकले.

परिसरातील नागरिकांनी जखमी समीरला खासगी वाहनातून सीपीआरमध्ये दाखल केले. सुरुवातीला जखम किरकोळ वाटत होती. मात्र, चाकूचा वर्मी घाव लागून मोठा रक्तस्राव झाल्याने समीरची प्रकृती झपाट्याने खालावली. तासाभरातच त्याचा उपचारादरम्यान मृत्यू झाला. विशेष म्हणजे हल्लेखोर धावडे हा समीर जिवंत आहे की मरण पावला, याची खात्री करण्यासाठी सीपीआरमध्ये गेला होता. त्यावेळी त्याने समीर हा आपल्या पत्नीची वारंवार छेड काढत असल्यानेच त्याच्यावर हल्ला केल्याची कबुलीही डॉक्टरांकडे दिली. डॉक्टरांनी चौकीतील पोलिसांना माहिती देताच त्याला ताब्यात घेतले.


शाहूपुरी पोलिसांचे वरातीमागून घोडे

सीपीआर पोलिस चौकीतील हवालदार पी. के. जाधव आणि कॉन्स्टेबल कृष्णा काकडे यांनी हल्लेखोर धावडेला पकडून ठेवले. पाचवेळा फोन करूनही शाहूपुरी पोलिस सीपीआरकडे फिरकले नाहीत. लक्ष्मीपुरी पोलिस ठाण्याचे निरीक्षक तानाजी सावंत यांनी सीपीआरमध्ये जाऊन घटनेची माहिती घेतली. हल्लेखोर चौकीत असल्याचे समजताच त्यांनी तातडीने धावडेला ताब्यात घेऊन पोलिस ठाण्यात पाठवले. यानंतर शाहूपुरीचे निरीक्षक संजय मोरे सीपीआरमध्ये पोहोचले.

मोबाइल अॅप डाउनलोड करा आणि राहा अपडेट

राजकीय पक्षांकडून मतांसाठी जातीय दंगे

December 2, 2017, 1:30 pm

≫ Next: भाजपला घेरण्याची रणनीती

≪ Previous: होय, मीच हल्ला केला...!

$

0

0

म. टा. प्रतिनिधी, कोल्हापूर

‘राजकारणासाठी सामाजिक स्वास्थ्य बिघडवून मतांसाठी अनेक डावपेच खेळले जातात. राष्ट्रीय काँग्रेस आणि भारतीय जनता पक्षासह अन्य राजकीय पक्षांनी सोयीनुसार जातीय दंगे घडविले. आगामी काळात आर्थिक संकटासोबत सामाजिक न्यायाचा संघर्ष महत्त्वाचा आहे. त्यामुळे २०१९ च्या निवडणुकीत नागरिकांनी गांभीर्याने विचारपूर्वक मतदान करण्याची गरज आहे,’ असे प्रतिपादन ज्येष्ठ विचारवंत इरफान इंजिनीअर यांनी केले.

श्रमिक प्रतिष्ठानतर्फे आयोजित अविनाश पानसरे व्याख्यानमालेत ते बोलत होते. राजर्षी शाहू स्मारक भवनच्या मिनी सभागृहात व्याख्यानमाला सुरू आहे. अध्यक्षस्थानी आनंद मेणसे होते.

‘जमातवाद आणि जातीय दंगे’ या विषयावर इरफान इंजिनीअर म्हणाले, ‘प्रत्येक राजकीय पक्षाचा अजेंडा वेगळा आहे. देव, देश, जात, धर्माच्या नावावर राजकारण खेळले जात आहे. हिंदू, मुस्लिम, ख्रिश्चन, दलित, ओबीसी समाजाकडे व्होट बँक म्हणून पाहिले जात आहे. देशातील बदलत्या परिस्थितीनुसार राजकारणाच्या खेळी केल्या जात आहेत. स्वातंत्र्यपूर्व काळात धर्म आणि भौगोलिक परिस्थितीच्या आधारे राष्ट्राची निर्मिती करण्याचा प्रयत्न राजकीय नेत्यांकडून झाला. सर्वधर्मसमभावाचा संदेश देत काँग्रेसकडून अनेकदा दंगल घडविण्यात आली. राष्ट्रीय स्वयंसेवक संघाच्या इशाऱ्यावर चालणाऱ्या भाजपने जातीयवाद निर्माण केला. हिंदू राष्ट्रनिर्मितीसह संविधानात बदल करण्याचे प्रयत्न करण्यात आले. सांस्कृतिक प्रश्नाकडे नागरिकांचे लक्ष वेधण्यात आले. शीख दंगल, गुजरात दंगल, राम मंदिर दर्शनासाठी खुले करण्यात आले. धर्म आणि जातीजातींत भेदभाव करून सत्ता मिळविण्याकडे भर राहिला. राजकीय पक्षांनी गरजेनुसार हिंदू आणि मुस्लिमांच्या मतांचा वापर केला. देशाची एकता खंडित करण्यासाठी प्रयत्न झाले.’

ते पुढे म्हणाले, ‘जम्मू आणि काश्मीरमध्ये मुस्लिम दहशतवादी असल्याच्या खोट्या बातम्या प्रसिद्ध करण्यात आल्या. मुस्लिम आणि हिंदू समाजात तेढ, सवर्ण आणि दलित यांच्यात जातीय तणाव निर्माण केले. समाजात भीती निर्माण करुन पद्धतशीरपणे राजकीय खेळी केल्या. २०१९ ची निवडणूक सर्वसामान्यांसाठी महत्त्वपूर्ण आहे. सर्वधर्मभाव जपणारे, गरिबी हटविणारे, सामाजिक सलोखा निर्माण करणाऱ्या सरकारची गरज आहे. त्यासाठी नागरिकांनी गांभीर्याने मतदान करण्याची वेळ आता आली आहे. भविष्यात हुकूमशाहीचे सरकार आल्यास लोकशाही संपणार आहे.’

आजचे व्याख्यान

विषय : नवउदारमतवाद व नवफॅसिझम

वक्ते : दत्ता देसाई

स्थळ : शाहू स्मारक भवन

वेळ : सायंकाळी ६ वाजता

मोबाइल अॅप डाउनलोड करा आणि राहा अपडेट

---

भाजपला घेरण्याची रणनीती

December 2, 2017, 1:30 pm

≫ Next: 'अशोक चव्हाण मध्येच घोटाळे करतात!'

≪ Previous: राजकीय पक्षांकडून मतांसाठी जातीय दंगे

$

0

0

म. टा. वृत्तसेवा, जयसिंगपूर

जिल्ह्याच्या दौऱ्यात भाजप सरकारला धारेवर धरणारे काँग्रेसचे प्रदेशाध्यक्ष माजी मुख्यमंत्री अशोक चव्हाण यांनी शनिवारी खासदार राजू शेट्टी यांची भेट घेतली. सरकारला रामराम ठोकून पंतप्रधानांना लक्ष्य करणाऱ्या शेट्टींची ताकद सोबत घेऊन भाजपला घेरण्याची रणनीती आखण्यात आल्याचे समजते. त्याची सुरुवात म्हणून येत्या १२ डिसेंबरला नागपूरला होणाऱ्या मोर्चात सहभागी होण्याचे निमंत्रणच खासदारांना देण्यात आले. आगामी लोकसभा निवडणुकीबरोबरच जिल्हा परिषदेत काँग्रेसची सत्ता आणण्याच्या दृष्टीने ही भेट महत्त्वाची मानली जात आहे.

अशोक चव्हाण गेले दोन दिवस कोल्हापूर जिल्ह्याच्या दौऱ्यावर होते. यावेळी त्यांनी भाजपवर निशाणा साधला. राष्ट्रवादी काँग्रेसही भाजपविरोधात आक्रमक झाली आहे, तर दुसरीकडे भाजप सरकारमधून बाहेर पडल्यानंतर स्वाभिमानी शेतकरी संघटनेचे नेते खासदार शेट्टी यांनी शेतकऱ्यांची कर्जमुक्ती, शेतीमालाला हमीभाव, विजेचे तसेच अन्य प्रश्न उपस्थित करून भाजपला लक्ष्य केले आहे. या पार्श्वभूमीवर चव्हाण शनिवारी सकाळी शिरोळ तालुक्यात दाखल झाले. नृसिंहवाडी येथे दत्त मंदिरात दर्शन घेतल्यानंतर त्यांनी सकाळी दहाच्या सुमारास शिरोळ येथे खासदार शेट्टी यांची त्यांच्या निवासस्थानी भेट घेतली. यावेळी त्यांच्यासोबत आमदार सतेज पाटील, माजी मंत्री प्रकाश आवाडे, दत्त साखर कारखान्याचे अध्यक्ष गणपतराव पाटील तसेच काँग्रेसचे अन्य पदाधिकारी होते. यावेळी स्वाभिमानीचे जिल्हाध्यक्ष भगवान काटे, माजी जिल्हा परिषद सदस्य सावकर मादनाईक उपस्थित होते.

शेतीचे प्रश्न, कर्जमाफीतील घोटाळे, ऑनलाइल अर्ज दाखल करताना येणाऱ्या अडचणी, जीएसटी यांसह अन्य प्रश्नांवरही यावेळी चव्हाण व शेट्टी यांच्यात चर्चा झाली. शेतकऱ्यांच्या प्रश्नांवर काँग्रेसही आंदोलन करीत असल्याचे सांगून चव्हाण यांनी १२ डिसेंबरला नागपूर येथे राष्ट्रवादी काँग्रेसचे अध्यक्ष शरद पवार यांच्या नेतृत्वाखाली होणाऱ्या मोर्चास उपस्थित राहण्याचे निमंत्रण दिले. मात्र, कर्जमुक्तीसह शेतकऱ्यांचे अन्य प्रश्न सोडविण्यासाठी देशपातळीवर अखिल भारतीय किसान संघर्ष समितीची स्थापना केल्याचे खासदार शेट्टी यांनी सांगितले. समितीतील अन्य सदस्यांशी चर्चेअंती आपण याबाबत निर्णय घेऊ, असे शेट्टी यांनी सांगितले. शेट्टी यांच्याशी अर्धा तास चर्चा केल्यानंतर चव्हाण मिरजेकडे रवाना झाले.

भाजपविरोधात मोट

नोटाबंदी, जीएसटी, शेतकऱ्यांची कर्जमाफी, आदी प्रश्नांवरून शिवसेनेचे पक्षप्रमुख उद्धव ठाकरे भाजपवर तोफ डागत आहेत. आता राष्ट्रवादी काँग्रेसनेही भाजपला लक्ष्य करीत हल्लाबोल आंदोलन सुरू केले आहे. खासदार शेट्टी राज्यात प्रभावीपणे भाजप आणि पंतप्रधान नरेंद्र मोदी यांना विरोध करीत आहेत. काँग्रेससह विरोधी पक्षही एकवटले असून, १२ डिसेंबरला नागपूर येथे भव्य मोर्चा काढण्यात येणार आहे. शेतकरी संघटनांनाही सोबत घेऊन भाजपला घेरण्याची रणनीती विरोधकांनी आखली असून, भाजपविरोधात मोट बांधण्यासाठीच चव्हाण यांनी शेट्टी यांची भेट घेतल्याची चर्चा आहे.


जि.प.साठी व्यूहरचना

कोल्हापुरात सध्या सतेज पाटील यांच्या पुढाकाराने कृषी प्रदर्शन सुरू आहे. त्याच्या उद्घाटनास आमदार हसन मुश्रीफ व माजी मंत्री प्रकाश आवाडे यांना निमंत्रित केले होते. आता समारोपास खासदार शेट्टी, आमदार चंद्रदीप नरके, उल्हास पाटील, डॉ. सुजित मिणचेकर, प्रकाश आबिटकर यांच्यासह प्रा. संजय मंडलिक, विनय कोरे यांना आमंत्रित केले आहे. आगामी जिल्हा परिषद अध्यक्षपदाच्या निवडीत काँग्रेसला मदत व्हावी यासाठी आमदार पाटील व्यूहरचना करत आहेत. त्याचाच एक भाग म्हणून त्यांनी शिवसेना, राष्ट्रवादी व स्वाभिमानीसह आवाडे गटाशी स्नेह जुळवण्यास प्रारंभ केला आहे.

मोबाइल अॅप डाउनलोड करा आणि राहा अपडेट

'अशोक चव्हाण मध्येच घोटाळे करतात!'

December 3, 2017, 1:18 am

≫ Next: श्रेयवादात ‘करवीर दर्शन’ला ब्रेक

≪ Previous: भाजपला घेरण्याची रणनीती

$

0

0

सांगलीः

'अशोकराव हे चांगले नेते आहेत. चांगली कामं करतात, पण मध्येच काही घोटाळेही करतात', अशी कोपरखळी मारत राज्याचे माजी मंत्री आणि काँग्रेसचे नेते पतंगराव कदम यांनी आज माजी मुख्यमंत्री अशोक चव्हाण यांची तारांबळ उडवली.

सांगलीमध्ये मदन पाटील यांच्या जयंतीनिमित्त एक कार्यक्रम आयोजित करण्यात आला होता. अशोक चव्हाण, माजी मंत्री मधुकर चव्हाण, पतंगराव कदम यांच्यासह जिल्ह्यातील सर्वपक्षीय नेतेमंडळी यावेळी उपस्थित होती. याच कार्यक्रमात पतंगराव कदमांनी आपल्या खास शैलीतील भाषणाने उपस्थितांना खो-खो हसवलं. परंतु, त्यांच्या एका वाक्यानं अशोक चव्हाण यांच्यावर सारवासारवीची वेळ आणली.

चव्हाण कुटुंबाशी पूर्वापार चालत आलेल्या नात्याबद्दल सांगताना पंतगराव कदम यांनी काही किस्से सांगितले. त्यावेळी अशोक चव्हाण हे चांगले नेते असल्याचं प्रमाणपत्रही त्यांनी दिलं. पण, ते चांगली कामं करताना मध्येच काहीतरी घोटाळे करतात, असं पतंगराव हसत-हसत म्हणाले, तेव्हा एकच हशा पिकला. अशोक चव्हाण यांनीही हे वाक्य आधी हसण्यावारी नेलं, पण नंतर आपल्या भाषणात 'ते' वाक्य मनावर न घेण्याचं आवाहनही केलं. 'पतंगराव कदम यांची ही बोलण्याची शैली आहे. त्यामुळे त्यांचं मनावर घ्यायचं नाही. त्यांच्या मनात काहीही नसतं, असं चव्हाण म्हणाले आणि त्यांनी हा विषय तिथेच संपवण्याचा प्रयत्न केला.

मोबाइल अॅप डाउनलोड करा आणि राहा अपडेट

श्रेयवादात ‘करवीर दर्शन’ला ब्रेक

December 3, 2017, 1:30 pm

≫ Next: लिंगायत समाजाचा एल्गार

≪ Previous: 'अशोक चव्हाण मध्येच घोटाळे करतात!'

$

0

0

म. टा. प्रतिनिधी, कोल्हापूर

कोल्हापुरातील पर्यटन क्षेत्राला वाव मिळावा, पर्यटक ​भाविकांना करवीर नगरचे सुलभपणे दर्शन घडावे यासाठी केएमटीने ‘करवीर दर्शन’ बस तयार केला, शहरातील विविध स्थळे आणि मार्गही निश्चित झाला. करवीर दर्शनासोबतच आर्थिक उत्पन्नातही वाढ असा दुहेरी उद्देश ठेवून केएमटीने या उपक्रमाला गती दिली, पण महापालिकेतील सत्तासंघर्ष आणि कुणाकुणाच्या हस्ते उदघाटन या श्रेयवादात ‘करवीर दर्शन’ बसला ब्रेक लागला आहे. महापालिकेतील सगळ्याच आघाड्यांचा आपआपल्या नेत्यांच्या उपस्थितीत हा कार्यक्रम व्हावा असा अट्टाहास आहे. या श्रेयवादाच्या राजकारणामुळे

केएमटीच्या या अभिनव संकल्पनेला मुहूर्त लागेना.

कोल्हापुरात केवळ पर्यटन हंगामात गर्दी असते असे नाही तर बाराही महिने पर्यटक, भाविकांचा ओघ आहे. सध्या कोल्हापुरात खासगी बस, रिक्षा व्यावसायिक यांच्याकडून पर्यटक, भाविकांसाठी शहर दर्शनचे आयोजन केल जाते. मात्र पर्यटन विकास महामंडळ किंवा महापालिका पातळीवर ‘करवीर दर्शन’साठी खास बस सेवा नाही. यामुळे भाविक, पर्यटकांची अडचण व्हायची, नेमकी हीच गरज ओळखून केएमटीने ‘करवीर दर्शन’ बस सेवा सुरु करण्याचा निर्णय

घेतला.

परिवहन समिती सदस्य, प्रशासकीय पातळीवर या संदर्भात निर्णय झाला. आयुक्त ​अभिजित चौधरी, सभापती नियाज खान यांच्यासह परिवहन समिती सदस्यांनी ​‘करवीर दर्शन’ संकल्पनेला हिरवा कंदिल दाखविला. केएमटीच्या ताफ्यातील एका नव्या बसला यासाठी नवा लूक दिला. केएमटीच्या वर्कशॉपमध्ये ‘करवीर दर्शन’ बस तयार आहे.

एकदा नव्हे दोनदा, बस उद्घाटनची तारीख निश्चित झाली. पण उदघाटन कुणाच्या हस्ते करायचे ? याविषयी सत्ताधाऱ्यांतही एकमत नाही तर दुसरीकडे विरोधकांचेही आपल्या आघाडीच्या नेते मंडळीच्या उपस्थितीत ‘करवीर दर्शन’चे उदघाटन व्हावे असा सूर आहे. महापालिकेत काँग्रेस, राष्ट्रवादी काँग्रेस आणि शिवसेना सत्तेत आहेत. परिवहन समिती सभापतिपद शिवसेनेकडे आहे. गेल्या महिन्यात शिवसेनेच्या नेत्यांच्या हस्ते बसचे उद्घाटन करण्याचे ठरले. मात्र सत्ताधारी मंडळीत त्याबद्दल एकमत झाले नसल्याने ऐनवेळी कार्यक्रम रद्द करण्यात आल्याचे सूत्रांनी सांगितले. महापालिकेतील आघाड्यांच्या राजकारणामुळे मात्र चांगल्या संकल्पनेला मूर्त रुप लाभण्यासाठी विलंब होत आहे.

मोबाइल अॅप डाउनलोड करा आणि राहा अपडेट

लिंगायत समाजाचा एल्गार

December 3, 2017, 1:30 pm

≫ Next: मोकाट कुत्र्यांची दहशत

≪ Previous: श्रेयवादात ‘करवीर दर्शन’ला ब्रेक

$

0

0

म. टा. प्रतिनिधी, सांगली

पश्चिम महाराष्ट्रासह कर्नाटकाच्या सीमा भागातून एकवटलेल्या लिंगायत समाजाने रविवारी सांगलीत विराट मोर्चा काढून स्वतंत्र धर्म मागणीचा एल्गार केला. ‘आम्ही या राष्ट्राचे कोणी आहोत की नाही?, जे धर्म मूळ भारतीय नाहीत, त्यांची नोंद घेतली जाते. मग इथल्या लोकशाहीचा मुख्य कणा असलेल्या लिंगायत समाजाची नोंद का घेतली जात नाही?, अशी थेट विचारणा करण्यात आली. विश्रामबागेतून जिल्हाधिकारी कार्यालयावर आलेल्या मोर्चाने जिल्हाधिकारी विजयकुमार काळम यांना मागण्यांचे निवेदन दिले.

दक्षिण भारतातील बहुतेक राज्यांत अधिक वास्तव्य असलेला लिंगायत समाज लिंगायत धर्माला संविधानिक मान्यता मिळविण्यासाठी रस्त्यावर उतरू लागलाय. केंद्र सरकारला आपल्या अस्तित्वाची जाणीव करुन देणारी शिफारस करण्याची मागणी संबधित राज्य सरकारांकडे लक्षवेधी एकजुटीच्या मोर्चाने केली जात आहे. कर्नाटक सरकारला ३० डिसेंबरपर्यंतची मुदत दिल्यानंतर आता महाराष्ट्रातील लिंगायत समाज विभागवार मोर्चे काढत आहे. याचाच एक भाग म्हणून रविवारी पश्चिम महाराष्ट्रातील सांगली, सातारा, कोल्हापूर, सोलापूर यासह कर्नाटकच्या सीमाभागातून सांगलीत एकत्रित आलेल्या समाजाने लिंगायत धर्म मागणीचा एकमुखी एल्गार केला.

व्यासपीठावर चनबसू पट्टदेवरु, कोरणेश्वर महास्वामी, जगदगुरु बसवप्रभू, बसवकुमार विजयकुमार कोळेकर आदी स्वामी होते. रसिका बोडके (तासगाव), सिद्धी पट्टणशेट्टी (जत), सरिता पट्टणशेट्टी, निशांत मगदूम, प्रियांका महाजन, कृतिका गाडेबार ( नांदेड), समृद्धी केरीपाळे आदींची आपल्या भाषणांतून समाजाच्या मागण्यांचा आवाज वाढविला. नांदेडच्या कृतिका गाडेबार हिने आपली भूमिका मांडली.

सकाळपासून शहराच्या चोहोबाजूनी ‘ लिंगायत महामोर्चा, मी लिंगायत, माझा धर्म लिंगायत’ अशा घोषणा असलेल्या भगव्या टोप्या परिधान करुन हातातला झेंडा उंचावत समाजाचे जथ्थे मोर्चाच्या मार्गावर येता राहिले. मोर्चाला सक्रीय पाठिंबा व्यक्त करत खासदार संजय पाटील, खासदार राजू शेट्टी, माजी केंद्रीय राज्यमंत्री प्रतिक पाटील, वसंतदादा कारखान्याचे अध्यक्ष विशाल पाटील, प्रदेश युवक काँग्रेसचे अध्यक्ष विश्वजीत कदम, आमदार सुधीर गाडगीळ, आमदार सुमनताई पाटील, श्रीमती जयश्रीताई पाटील, शिरोळचे आमदर उल्हास पाटील, भाजपचे जिल्हाध्यक्ष पृथ्वीराज देशमुख, काँग्रेसचे शहर जिल्हाध्यक्ष पृथ्वीराज पाटील, जनसुराज्यशक्ती पक्षाचे समित कदम आदींसह सर्व समाजघटकांच्या संस्थांचे पदाधिकारी व्यासपीठासमोर विराजमान झाले होते.

अल्पसंख्यांक दर्जा हवा

लिंगायत धर्माला संविधानिक मान्यता प्रदान करावी, लिंगायत धर्मियांना धार्मिक अल्पसंख्यांकचा दर्जा द्यावा, राष्ट्रीय आणि राज्यपातळीवर महात्मा बसवेश्वर अर्थिक विकास महामंडळाची स्थापना करावी, २०२१ च्या राष्ट्रीय जनगणनेत लिंगायत धर्माच्या लोकसंख्येची स्वतंत्र नोंद करावी, लिंगायत धर्माच्या मूळ कन्नड भाषेतील वचन साहित्याला मराठीसह इतर भारतीय भाषांत अनुवादीत करावे, आदी मागण्या लिंगायत समाजाने केल्या आहेत.

नेटके नियोजन

संयोजकांची जय्यत तयारी, काटेकोर नियोजन, सर्वच राजकीय पक्ष, संघटना, सामाजिक संस्थांचे पाठबळ, सक्रीय सहभाग यामुळे रविवारी सकाळपासून सांगलीतील या मोर्चासाठी निश्चित केलेला मार्ग भगवा होण्यास सुरुवात झाली. लहान-थोर अशी सर्वजण मोर्चाच्या ओढीने झपाझप पावलं टाकत राहिली. बघता बघता विश्रामबाग चौक गर्दीने फूलून गेला. हा मोर्चा मूक नव्हता. घोषणांचा एल्गार दणाणत होता. मधूनच हालगीही कडाडत होती. परंतु कोणीही शिस्त मोडून काही आगळं करण्याचे धाडस कोणी केले नाही.

मोबाइल अॅप डाउनलोड करा आणि राहा अपडेट

मोकाट कुत्र्यांची दहशत

December 3, 2017, 1:30 pm

≫ Next: सक्तीची जीएसटी एकाधिकारशाहीच

≪ Previous: लिंगायत समाजाचा एल्गार

$

0

0

कोल्हापूर टाइम्स टीम

माणसांचा सर्वाधिक जवळचा प्राणी कुत्रा हा जितका प्रामाणिक तितकाच धोकादायक आहे. शहरात भटक्या कुत्र्यांची संख्या वाढली आहे, त्यामुळे कुत्र्यांकडून हल्ले होण्याचे प्रमाणही वाढले आहे. शहरात नोव्हेंबर महिन्यात ५५ जणांना भटक्या कुत्र्यांनी चाव घेतला आहे, तर जिल्ह्यात तब्बल ५०० हून अधिक व्यक्तींवर कुत्र्यांनी हल्ला केला आहे. यातील बहुतांश जणांनी उपचार घेतले असले तरी कुत्रा चावल्यानंतर दुर्लक्ष करणे आणि पारंपरिक उपचार पद्धतीचा वापर करणे धोकादायक ठरत आहे.

भटक्या कुत्र्यांची संख्या वाढल्याने धोका दिवसेंदिवस वाढत आहे. नोव्हेंबर महिन्यात शहरात ५५ जणांना कुत्र्यांनी चावा घेतला आहे. यात ६ लहान मुलांचा समावेश आहे. कुत्रा चावल्यानंतर पहिल्या ४८ तासात उपचार घेणे गरजेचे आहे.केवळ स्थानिक (गावठी) उपचारांवर विसंबून न राहता ‘अँटी रेबिज’ लसिकरण करून घेणे गरजेचे असते. शहरातील सीपीआर रुग्णालयासह जिल्ह्यातील सर्व उपजिल्हा रुग्णालयांमध्ये अँटी रेबिजची लस उपलब्ध आहे. कुत्र्याने घेतलेल्या चाव्याचे प्रमाण लक्षात घेऊन डॉक्टर उपचार करतात. रेबिजच्या विषाणूंचा हल्ला थेट व्यक्तीच्या मज्जारज्जूवर होतो. त्यामुळे रेबिज मेंदूपर्यंत जाऊन भिनतो. चेहरा, मान, छाती आणि तळहातांवर कुत्र्याने चावा घेतल्यास याला ‘ग्रेड थ्री’ असे म्हणतात. जखमा खोलवर असतील तर हे अधिक गंभीर समजले जाते.

ग्रामीण भागात कुत्रा चावण्याच्या घटना नेहमीच अधिक असतात. दर महिन्याला जिल्ह्यात सरासरी साडेचारशे लोकांवर कुत्र्यांचा हल्ला होतो. यातील जखमींना तातडीने उपचार मिळावेत यासाठी सर्व ग्रामीण रुग्णालयात अँटी रेबिज लस उपलब्ध असणे गरजेचे असते. परंतु कुत्रा चावल्यास रुग्णाला थेट उपजिल्हा रुग्णालय किंवा सीपीआर रुग्णालयात धाव घ्यावी लागते. जिल्ह्यातील अन्य तालुक्यांच्या तुलनेत चंदगड आणि शाहूवाडी या दोन डोंगराळ तालुक्यांमध्ये कुत्रा चावण्याच्या घटना अधिक घडतात. अनेकदा गडहिंग्लज उपजिल्हा रुग्णालयात अँटी रेबिज लस उपलब्ध नसते अशा नागरिकांच्या तक्रारी आहेत. इचलकरंजी, गडहिंग्लज, आजरा, कोडोली, शाहूवाडी, गारगोटी या प्रमुख आरोग्य केंद्रांवर अँटी रेबिज लस नियमित उपलब्ध असणे गरजेचे आहे. अर्थात, सरकारी आरोग्य यंत्रणा नेहमीच अँटी रेबिज लस उपलब्ध असल्याचे दावे करतात.

दरम्यान, कुत्रा चावल्यानंतर आजही पारंपरिक उपचार पद्धतीवर भर दिला जातो. झाडपाल्याचे औषध घेऊन रुग्णालयात जाणे टाळले जाते. हे दुर्लक्ष गंभीर आहे. अनेकदा लहान मुले घरातील मोठ्यांच्या भीतीपोटी कुत्रा चावल्याचे सांगत नाहीत. कुत्रा चावल्यानंतर ४८ तासांच्या आत अँटी रेबिजची लस न मिळाल्यास रेबिजचे विषाणू थेट मज्जरज्जूवर हल्ला करतात. त्यानंतर मात्र कोणताच उपचार लागू पडत नाही. रेबिजग्रस्त रुग्णाला पाणी आणि वा-याची भीती वाटते. त्यांना असुरक्षित वाटू लागते. अनेकदा तो समोर असेल त्या व्यक्तींवर हल्ला करतो. अशा व्यक्तीच्या नखातून किंवा दातातून पुन्हा रेबिजचा फैलाव होण्याचा धोका असतो. त्यामुळे कुत्रा चावल्यास वेळीच वैद्यकीय उपचार घेणे हेच गरजेचे असते. सरकारी रुग्णालयात मोफत उपचार मिळतात, तर खासगी रुग्णालयात १ ते ३ हजार रुपयांचा खर्च येतो.

मोबाइल अॅप डाउनलोड करा आणि राहा अपडेट