म. टा. वृत्तसेवा, जयसिंगपूर
कर्जमाफीसाठी साडे सहा हजार कोटी रुपये खात्यावर जमा झाले आहेत, असे मुख्यमंत्री सांगतात. मात्र केवळ चार हजार शेतकऱ्यांना तुटकी-फुटकी कर्जमाफी मिळाली आहे. उर्वरित शेतकरी अद्याप वंचितच आहेत. छत्रपती शिवरायांच्या नावाने सुरू करण्यात आलेल्या कर्जमाफी योजनेत घोटाळा होणार असेल तर सहन करणार नाही, असा खणखणीत इशारा शिवसेना पक्षप्रमुख उद्धव ठाकरे यांनी दिला. नोटाबंदी, जीएसटी, फसवी कर्जमाफी, काळा पैसा आदी विषयांवर त्यांनी केंद्र व राज्यातील भाजप सरकारवर आसूड ओढले.
शिरोळ तालुक्यातील कुरुंदवाड येथे सीताबाई पटवर्धन विद्यालयाच्या प्रांगणात शिवसेनेच्या शेतकरी संवाद मेळाव्यात ते बोलत होते. याप्रसंगी जलसंपदा राज्यमंत्री विजय शिवतारे, गृहराज्यमंत्री दीपक केसरकर, शिवसेनेचे सचिव खासदार विनायक राऊत, संपर्कनेते खासदार गजानन कीर्तिकर, जिल्हा संपर्कप्रमुख अरुण दुधवडकर, जिल्हाप्रमुख मुरलीधर जाधव, आमदार उल्हास पाटील, आमदार सत्यज‌ित पाटील-सरुडकर, आमदार प्रकाश आबिटकर, आमदार राजेश क्षीरसागर, आमदार चंद्रदीप नरके प्रमुख उपस्थित होते.
ठाकरे म्हणाले, ‘सत्तेत राहूनही सरकारविरोधात बोलल्यावर मला दुतोंडी म्हणणाऱ्यांकडे मी लक्ष देत नाही. मला केवळ शेतकऱ्यांचे अश्रू, दु:ख कळते. त्याच्या दु:खात सहभागी व्हायचे नाही, तर काय त्याला निवडणुकीपुरती आश्वासने द्यायची? मी सरकारवर माझ्यासाठी टीका करीत नाही. जीवन-मरणाचा लढा देणाऱ्या जनतेसाठी मी टीका करतो. टीका करून कामगिरीत सुधारणा व्हावी आणि हे सरकार टिकावे, यासाठी टीका असते. त्यामुळे माझ्या टीकेवर मला उत्तर देण्याऐवजी त्यांनी जनतेला उत्तर द्यावे. शेतीला बारा तास वीज, शेतमालाला भाव, कर्जमुक्ती हे माझे प्रश्न नाहीत, तर ते जनतेचे आहेत. मुख्यमंत्र्यांनी शेतकऱ्यांसाठी कर्जमाफीची घोषणा केली, त्यावेळी मला खूप आनंद झाला. मात्र, त्यानंतर कर्जमाफी झालेल्या शेतकऱ्यांची शासकीय आकडेवारी आणि वस्तुस्थिती पाहता छत्रपती शिवाजी महाराजांच्या नावाने घोषित केलेल्या या कर्जमाफी योजनेत फसवणूक होतेय, की काय अशी भीती वाटू लागली आहे. न्याय मागण्यासाठी जर राज्यातील शेतकरी रस्त्यावर उतरणार असेल, तर आपण स्वत: त्या आंदोलनाचे नेतृत्व करण्यासाठी रस्त्यावर उतरू, अशी ग्वाही दिली.
शेतीला बारा तास दिवसा वीज द्यावी, ही मागणी पूर्वीच्या सरकारकडेही केली गेली होती. अच्छे दिनचे स्वप्न दाखवून भाजप सत्तेवर आले, तरीही हा प्रश्न कायम आहे. मग कुठे आहेत अच्छे दिन? चोवीस तास सोडाच, पण बारा तास तरी वीज द्या, अशी शेतकऱ्यांची मागणी आहे. विहीरी-नद्यांना पाणी आहे. पण वीज नाही. डोळ्यांदेखत पिके करपून जात आहेत. यामुळे शेतकऱ्यांना अच्छे दिन नव्हे,तर पूर्वीचे दिवस आठवत आहेत. अच्छे दिन नको, तर शेतकऱ्यांच्या आयुष्यात चार सुखासमाधानाचे क्षण आणण्यासाठी काम करा,’ असा टोला त्यांनी लगावला.
कर्जमाफीसंबंधातील १३ लाख शेतकऱ्यांची खाती गायब आहेत. त्यामुळे गावोगावी मदत केंद्रे उभी करून शेतकऱ्यांना कर्जमाफीचा लाभ मिळवून देण्यासाठी मदत करा, असे आदेश आपण शिवसैनिकांना दिल्याचे ठाकरे यांनी घोषित केले.
आमदार उल्हास पाटील यांनी स्वागत करताना शिरोळ तालुक्यात साडेआठ कोटी रुपये खर्चून बंधारे दुरुस्तीचे काम केल्याचे सांगितले. ७० लाख रुपये खर्चून शिरोळ नवीन बसस्थानक उभे केले. मात्र तालुक्यातील १८ हजार हेक्टर जमीन क्षारपड झाली असून ती पूर्ववत करण्यासाठी प्रयत्न करणे गरजेचे आहे. नद्यांच्या प्रदूषणामुळे कर्करोगाचा सामना करावा लागत आहे. अरुंद रस्त्याचे प्रश्न आहेत. पंचगंगा नदीवर बंधारा व दोन नवे पूल बांधण्यासाठी निधीची गरज असल्याचे सांगितले. पक्षप्रमुखांनी या प्रश्नांमध्ये लक्ष घातल्यास सांगली व कोल्हापूर हे दोन्ही जिल्हे भगवे करून दाखवू अशी ग्वाही त्यांनी दिली.
सूत्रसंचालन विजय कडणे यांनी केले. आभार जिल्हा उपप्रमुख मधुकर पाटील यांनी मानले. मेळाव्यास जिल्ह्यातील शिवसेनेचे पदाधिकारी, शिवसैनिक, शेतकरी उपस्थित होते.
मी नाही लाभार्थी
सध्या जाहीरातींचा जमाना आहे. मी लाभार्थी अशा जाहीराती राज्य सरकारकडून दाखविल्या जात आहेत. पण आता ‘वीज कनेक्शन नाही- मी नाही लाभार्थी, रेशनवर साखर नाही-मी नाही लाभार्थी,’ अशा जाहीराती करण्याची वेळ आली आहे, अशा शब्दात त्यांनी सरकारच्या जाहीरातींची खिल्ली उडविली.
शरद पवार यांना टोला..
तुम्ही सरकारमध्ये सामील असूनही सरकारवर टीका करता. तुमचं पटत नसेल, तर वेगळे व्हा, असा सल्ला शरद पवार देतात. मग गेल्या १५ वर्षांत पटत नसताना काँग्रेससोबत सरकारमधे राहून काँग्रेसची भांडी घासणाऱ्यांनी आम्हाला शिकवू नये. आजचे सरकार राष्ट्रवादी काँग्रेसच्या पाठिंब्याने चाललेले आहे. आम्ही बाहेर पडलो, की ते सरकारमध्ये सामील व्हायलाच बसलेत, असे खुद्द भाजपचेच आमदार नाना पटोले म्हणतात. त्यामुळे जनतेच्या प्रश्नांबाबत मी रोखठोक बोलणारच. मला त्याची पर्वा नाही असे उद्धव ठाकरे म्हणाले.
सैनिकांमया बलिदानाचा अपमान नको...
नोटाबंदीनंतर देशातील दहशतवादाचा बीमोड होईल, काळा पैसा बाहेर येईल, भ्रष्टाचार बंद होईल, असे सांगून मला फक्त पन्नास दिवस द्या, असे आवाहन पंतप्रधान नरेंद्र मोदी यांनी केले होते. मात्र, गेल्या वर्षभरात कश्मीरमध्ये अतिरेकी हल्ले वाढले आहेत. अनेक हिंदुस्थानी सैनिक धारातीर्थी पडत आहेत. काळा पैसा किती बाहेर आला आणि किती लोकांच्या खात्यात प्रत्येकी १५ लाख रुपये जमा झाले, हे कुणी सांगत नाही. दहशतवादाचा बीमोड होईल, तो नोटाबंदीमुळे नव्हे, तर सैनिकांच्या शौर्यामुळे! त्यामुळे नोटाबंदीचे गुणगान गात सैनिकांच्या बलिदानाचा अपमान करू नका, असेही उध्दव ठाकरे यांनी ठणकाविले.
जांभळीत शेतकऱ्यांशी संवाद
शिरोळ तालुक्याच्या दौऱ्यात शिवसेना पक्षप्रमुख उध्दव ठाकरे यांनी जांभळी येथे शेतकऱ्यांशी संवाद साधला. यावेळी शेतकऱ्यांनी आपले विविध प्रश्न त्यांच्यासमोर मांडले. शेतीसाठी पाणी आहे, मात्र वीज नाही, अशी स्थिती असून दिवसा बारा तास वीज द्यावी, अशी मागणी शेतकऱ्यांनी केली. यानंतर शिरोळ येथील अद्ययावत बसस्थानकाचे लोकार्पण ठाकरे यांच्या हस्ते झाले.
आभाळ नव्हे सरकार कोसळेल
राज्याचे सार्वजनिक बांधकाम मंत्री चंद्रकांत पाटील म्हणतात, ‘रस्त्यात खड्डे पडले, तर आभाळ कोसळणार नाही’. ‘डांबराचा खर्च अर्धाच दाखवा’, असेही ते म्हणत आहेत. रस्त्यात खड्डे पडण्याच्या या प्रकारामुळे आभाळ कोसळणार नाही, तर सरकारच कोसळेल, असे उद्धव ठाकरे म्हणाले.
मोबाइल अॅप डाउनलोड करा आणि राहा अपडेट
