डॉ. नरेंद्र दाभोलकर आणि कॉम्रेड गोविंद पानसरे यांच्या हत्येतील साक्षीदार संजय साडविलकरनी अवैध शस्त्र खरेदी-विक्री केल्याचे जबाबात नोंदवले आहे. साडविलकरांच्या अवैध शस्त्रविक्रीची चौकशी होणे गरजेचे आहे, अशी मागणी पानसरे हत्येतील संशयित समीर गायकवाड याने केली आहे. साडविलकरांविरोधात तक्रार दाखल करण्यासाठी कोल्हापुरात येण्याची परवानगी समीरने कोर्टाकडे अर्जाद्वारे मागितली होती. न्यायाधीश एल. डी. बिले यांनी सोमवारी अर्ज मंजूर करून मंगळवारी ११ ते ५ या वेळेत समीरला कोल्हापुरात येण्याची परवानगी दिली आहे. मंगळवारी तक्रार दाखल करणार आहे, अशी माहिती समीरचे वकील समीर पटवर्धन यांनी दिली आहे.
अंनिसचे डॉ. नरेंद्र दाभोलकर यांच्या हत्येनंतर कोल्हापुरातील चांदी कारागीर संजय साडविलकर यांनी कलम १६४ नुसार सीबीआयकडे साक्ष दिली आहे. ‘१९८३ ते १९८८ या काळात चरितार्थाचे कोणतेही साधन नसल्याने आपण अवैध शस्त्रांची खरेदी, विक्री आणि दुरुस्तीचे काम करीत होतो,’ असा उल्लेख साडविलकरांनी जबाबात केला आहे. साडविलकरांनी असाच जबाब कॉम्रेड गोविंद पानसरे हत्येनंतर एसआयटीकडेही दिला आहे. पानसरे हत्येतील संशयित समीर गायकवाड याला आरोपपत्राची प्रत मिळाल्यानंतर साडविलकरांच्या अवैध शस्त्रविक्री आणि खरेदीबाबतची शंका वकील समीर पटवर्धन यांच्याकडे बोलून दाखवली. यानंतर वकिलांच्या सल्ल्याने साडविलकरांच्या अवैध शस्त्रखरेदी, विक्रीबाबत तक्रार देण्याचा निर्णय समीर गायकवाड याने घेतला आहे. पानसरे हत्या प्रकरणी कोर्टाने समीरचा जामीन १७ जूनला मंजूर केला आहे, मात्र न्यायालयीन कामकाज आणि प्रत्येक रविवारची पोलिस ठाण्यात हजेरी लावण्याखेरीज कोल्हापुरात येऊ नये, अशी अट घातली आहे.
साडविलकरांच्या चौकशीचा अर्ज दाखल करण्यासाठी कोल्हापुरात येण्याची परवानगी मिळावी, असा अर्ज गायकवाड याने अॅड. पटवर्धन यांच्यामार्फत सोमवारी जिल्हा व सत्र न्यायाधीश एल. डी. बिले यांच्याकडे सादर केला. मंगळवार, बुधवार आणि गुरुवार या तीन दिवसांतील कोणताही दिवस कोर्टाने द्यावा, अशी मागणी अॅड. पटवर्धन यांनी केली होती. कोर्टाने अर्ज मंजूर केला असून, मंगळवारी सकाळी ११ ते संध्याकाळी ५ या वेळेत समीरला कोल्हापुरात येण्याची परवानगी दिली आहे. मंगळवारी जुना राजवाडा पोलिस ठाण्यात साडविलकरांविरोधात समीर तक्रार दाखल करणार आहे, अशी माहिती अॅड. पटवर्धन यांनी पत्रकारांशी बोलताना दिली.
शस्त्रांच्या गैरवापराची तक्रार
पिस्तूल खरेदी, विक्री आणि त्यांच्या दुरुस्तीचे काम पाच ते सहा वर्ष केल्याचे संजय साडविलकर यांनीच जबाबात सांगितले आहे. एसआयटीच्या जबाबात १९८५ ते ८८, तर सीआयडीकडे दिलेल्या जबाबात १९८३ ते ८८ या कालावधीत शस्त्र खरेदी, विक्री केल्याचे सांगितले आहे. साडविलकरांनी विकलेल्या शस्त्रांचा गैरवापर झाल्याची शक्यता नाकारता येत नाही. त्यांनी विकण्यासाठी शस्त्रे कुठून आणली? ती कोणाला विकली? त्या शस्त्रांचे पुढे काय झाले? याची चौकशी पोलिसांनी करावी. अशी मागणी समीर गायकवाड याने केली आहे.
साक्षीदारावर दबाव आणण्याचा आमचा हेतू नाही, मात्र त्यांनी जबाबात दिलेली माहिती धक्कादायक आहे. साडविलकरांनी विकलेल्या शस्त्रांचा गैरवापर होऊ शकतो. कदाचित तसा गैरवापर झालाही असेल, त्यामुळे अवैध शस्त्रांची आणि त्यांच्या खरेदी-विक्रीची चौकशी करण्यासाठी आम्ही पोलिस ठाण्यात तक्रार देणार आहे.
अॅड. समीर पटवर्धन
मोबाइल अॅप डाउनलोड करा आणि राहा अपडेट
