शिक्षण परिषदेवर समितीचा बहिष्कार

November 19, 2017, 1:30 pm

≫ Next: राज्यातील मंत्र्यानेच उघड्यावर केली लघुशंका

≪ Previous: शाहूपुरी ठाण्याला आज घेराओ

$

0

0

म. टा. प्रतिनिधी, कोल्हापूर

नगरपालिका-महानगरपालिका ​शिक्षक संघाने कराड येथे २३ नोव्हेंबर रोजी भरविलेल्या नगरपालिका व महानगरपालिका शिक्षकांच्या शैक्षणिक परिषदेवर महाराष्ट्र राज्य प्राथमिक शिक्षक समिती राज्य शाखेने बहिष्कार टाकला आहे. समितीचे राष्ट्रीय अध्यक्ष प्रभाकर आरडे, राज्य सरचिटणीस उदय शिंदे व मनपा राज्य प्रमुख सुधाकर सावंत यांनी बहिष्कार टाकण्याच्या निर्णयाची घोषणा केली.

‘नगरपालिका-महानगरपालिका ​शिक्षक संघाने केलेल्या परिषदेस नाव बदलून शिक्षण विभागाने परिषद भरविल्याचे दाखविले जात आहे. जर शिक्षण विभागाला परिषद आयोजित करावयाची असल्यास त्यांनी सर्व संघटनांना विश्वासात घेऊन गरज असल्यास परिषद घ्यावी. महत्वाचे म्हणजे संबंधित परिषद सर्वांच्या सोयीच्या ठिकाणी घ्यावी. यापूर्वी कोल्हापूर शिक्षण विभागाने विविध उपक्रम राबविले आहेत. त्या त्या वेळी सर्व संघटना व इतर घटकांना विश्वासात घेऊन परिषद भरवली होती.कोल्हापुरात शाहू ग्रंथ महोत्सव उत्कृष्टपणे राबवले. त्याच पध्दतीने शिक्षण विभागाने उपक्रम राबवावेत.कोणत्याही एका संघटनेच्या दबावाला बळी पडून शिक्षक वर्गाला वेठीस धरु नये.’ या आशयाचे निवेदनही महाराष्ट्र राज्य प्राथमिक शिक्षक समितीच्या पदाधिकाऱ्यांनी शिक्षण उपसंचालक कार्यालयाला दिले.

शिष्टमंडळात शहराध्यक्ष उमेश देसाई, संजय पाटील, इचलकरंजी शाखेचे अध्यक्ष राजेंद्र घोडके, उत्तम कुंभार, फारुख डबीर, वसंत आडके, संजय कडगावे, सुभाष धादवड नयना बडकस आदींचा समावेश होता.

मोबाइल अॅप डाउनलोड करा आणि राहा अपडेट

---

राज्यातील मंत्र्यानेच उघड्यावर केली लघुशंका

November 19, 2017, 10:51 pm

≫ Next: हसूरसासगिरीच्या शांताबाईंची बलुतंदारी ‘इफ्फी’त

≪ Previous: शिक्षण परिषदेवर समितीचा बहिष्कार

$

0

0

मटा ऑनलाइन वृत्त । सोलापूर

राज्याचे जलसंधारण मंत्री राम शिंदे यांचा सोलापूरच्या दौऱ्यावर असतानाचा एक व्हिडिओ सध्या सोशल मीडियावर व्हायरल झाला आहे. त्यात ते रस्त्याच्या कडेला लघुशंका करताना दिसत आहेत. यामुळे भाजप सरकारमधील मंत्री स्वच्छता अभियानाबाबत किती गंभीर आहेत, अशी 'शंका' आता उपस्थित करण्यात येत आहे.

सोलापूर जिल्ह्यातील बार्शी तालुक्यातील मळेगाव येथे शनिवारी राम शिंदे जलयुक्त शिवार योजनेंर्गत केलेल्या कामांची पाहणी करण्यासाठी गेले होते. त्यानंतर ते पुढच्या दौऱ्यावर निघाले. सोलापूर-बार्शी रस्त्यावर त्यांचा वाहनताफा थांबला. शिंदे कारमधून उतरले आणि रस्त्याच्या कडेला त्यांनी लघुशंका केली. या घटनेचा व्हिडिओ सोशल मीडियावर व्हायरल झाला आहे.

अनेकांनी शिंदेवर सडकून टीका केली आहे. पंतप्रधान नरेंद्र मोदींच्या महत्त्वाकांक्षी स्वच्छ भारत मोहिमेला हरताळ फासण्याचे काम शिंदे यांनी केले आहे, अशा शब्दांत काहींनी संताप व्यक्त केला आहे. घरांमध्ये स्वच्छतागृहे बांधून त्यांचा वापर करा, असे सरकारकडून वारंवार सांगितले जाते. तसेच उघड्यावर शौचास जाणाऱ्यांवर कारवाई केली जात आहे. मग हे सरकार शिंदेंवरही कारवाई करणार का, असा सवालही अनेकांनी केला आहे.

सरकारच्या जलयुक्त शिवार योजनेच्या कामांनिमित्त महिनाभरापासून राज्यभरात दौरे करत आहे. सततच्या प्रवासामुळे आणि तापमानातही वाढ झाल्याने आजारी होतो. दौऱ्यावर असताना रस्त्यात कुठेही स्वच्छतागृह दिसले नाही. त्यामुळे उघड्यावरच लघुशंकेला जावे लागले, असे स्पष्टीकरण शिंदे यांनी एका वृत्तसंस्थेला दिले.

मोबाइल अॅप डाउनलोड करा आणि राहा अपडेट

हसूरसासगिरीच्या शांताबाईंची बलुतंदारी ‘इफ्फी’त

November 20, 2017, 12:43 am

≫ Next: कर्जमाफीचे पैसे पुन्हा माघारीपंढरपूर तालुक्यातील घटना; शेतकऱ्यांमध्ये गोंधळाची स्थिती

≪ Previous: राज्यातील मंत्र्यानेच उघड्यावर केली लघुशंका

$

0

0

कोल्हापूर टाइम्स टीम
दोन दशकांपूर्वी शांताबाई यादव नावाची एक निरक्षर स्त्री नाभिक व्यवसाय करणाऱ्या पतीच्या निधनानंतर चार मुलींसोबत निराधार होते. चाळीच्या उंबरठ्यावर आलेलं वैधव्य आणि हातात कामाचा एकही स्रोत नाही अशा स्थितीत येते. कामाच्या शोधात गावात भटकते. पोट भरेल इतकंही अन्न त्यातून मिळत नाही. दीर व्यवसाय बळकवायला बघतो, तेव्हा स्वत:च हातात वस्तरा घेऊन पतीचा नाभिक व्यवसाय करण्याचा निर्णय घेते. गडहिंग्जल तालुक्यातील हासूरसासगिरीसारख्या गावात एका स्त्रीकडून केस कापून घेण्याची, दाढी करून घेण्याची मानसिकता नसल्याने तिला कोणत्या समस्यांचा सामना करावा लागतो? त्यातून शांताबाई कशा धीराने उभ्या राहिल्या... याची कथा असलेला ‘बलुतं’ हा लघुपट गोवा येथे होणाऱ्या इंटरनॅशनल फिल्म फेस्टिव्हलमध्ये दाखवण्यात येणार आहे. यानिमित्ताने एका ग्रामीण स्त्रीच्या धैर्याची कथा पडद्यावर उलगडणार आहे.

‘जयोस्तुते’, ‘तुझ्यात ​जीव रंगला’ यांसह अनेक मालिकांच्या निमित्ताने कॅमेरामन, दिग्दर्शक म्हणून ओळख असलेले अजय कुरणे यांच्या मनात लघुपटाचा विचार घोळत होता. यांदरम्यान शांताबाईंच्या आयुष्याची कथा सांगणाऱ्या पोस्ट सोशल मीडियावरून त्यांच्या पाहण्यात आल्या. त्यातूनच ‘बलुतं’ या ​लघुपटाच्या कथेचा जन्म झाला. हासूरला जाऊन अजय यांनी शांताबाईंची भेट घेतली आणि त्यांच्या आयुष्याचा पट अवघ्या २६​ मिनिटांमध्ये मांडण्याचे आव्हान घेऊनच परतले. शांताबाईच्या आयुष्यातील महत्त्वाचे प्रसंग, कलाटणी देणाऱ्या घटना आणि त्यांनी वस्तरा हातात घेऊन ना​भिक व्यवसाय करण्याचा घेतलेला निर्णय याची बांधणी करणारा स्क्रिन प्ले आणि संवाद लेखनाचे काम स्वप्नील राजशेखर यांनी पेलले.
कथा निश्चित झाल्यावर लघुपटाची सर्वात मोठी ताकद असलेल्या लोकेशन्स निवड करण्याचे आव्हान टीमसमोर होते. त्यासाठी कोल्हापूर जिल्ह्यातील अनेक गावं अजय आणि त्याच्या टीमने पालथी घातली. त्यानंतर पन्हाळा गावातील सोमवार पेठ, मसाई पठार याठिकाणी या लघुपटाचे ​चित्रीकरण करण्यात आले. अशा स्थळांवरील चित्रीकरण हा या लघुपटाला वास्तवतेच्या अधिक जवळ नेणारा धागा ठरला.

शांताबाईची भूमिका करणाऱ्या तनुजा कदम हिने शांताबाईंना भेटून त्यांच्या बोलण्यातील, वागण्यातील प्रत्येक लकब हेरली. इतकेच नव्हे तर दाढी करताना, केस कापताना कंगवा, कात्री धरण्याची पद्धतही तनुजाने शिकून घेतली आणि त्यामुळे पडद्यावर तनुजा शांताबाईच्या जवळची वाटते. लघुपटात शांताबाईनी नेसलेल्या दोन साड्या लक्ष्मीपुरीतल्या जुन्या बाजारातून विकत आणल्या कारण साडीचं खिसलेपण खरं वाटावं. महिन्याभरात बनलेल्या बलुतंसाठी अशा खूप बारकाव्यांचा विचार केला आहे.

​निखिल सुरी यांनी निर्मिती केलेला आणि कुरणे यांनी दिग्द​र्शित या लघुपटात तनुजासोबत आर्या कुरणे, प्रमोद फडतरे, उमेश बोळके, गिरीजा गोडे, हेमंत धनवडे, नरेंद्र देसाई यांच्या भूमिका आहेत.

शांताबाईंनी ज्या प्रकारे समाजाच्या मानसिकतेशी लढा दिला, तो खूप मोठा आहे. पुरुषांच्या दाढी करण्यापासून ते केस कापण्यापर्यंतचा व्यवसाय करत शांताबाईंनी महिलांकडे सन्मानाने पाहण्याची दृष्टी बावीस वर्षापूर्वी तयार केली. त्यामुळे हा​ सिनेमा केवळ एका स्त्रीचा संघर्षमय प्रवास सांगत नाही तर तिच्या सक्षमीकरणाचा आलेखही देतो.
- अजय कुरणे, दिग्दर्शक

मोबाइल अॅप डाउनलोड करा आणि राहा अपडेट

कर्जमाफीचे पैसे पुन्हा माघारीपंढरपूर तालुक्यातील घटना; शेतकऱ्यांमध्ये गोंधळाची स्थिती

November 20, 2017, 9:49 am

≫ Next: ​ टिपू सुलतान जयंतीनिमित्त रॅली

≪ Previous: हसूरसासगिरीच्या शांताबाईंची बलुतंदारी ‘इफ्फी’त

$

0

0

म. टा. वृत्तसेवा, पंढरपूर
कर्जमाफी मिळालेल्या शेतकऱ्यांच्या ‘मी लाभार्थी’च्या जाहिराती एकीकडे धडाक्यात सुरू आहेत. मात्र, दुसरीकडे कर्जमाफीचा घोळ संपायला तयार नाही. कर्जमाफीसाठी शेतकऱ्याच्या खात्यावर भरलेली रक्कम सरकारने पुन्हा काढून घेतल्याचा प्रकार प्रकार समोर आला आहे.
पंढरपूर तालुक्यातील उपरी गावाचे देवानंद गणपत जगदाळे यांनी विदर्भ कोकण ग्रामीण बँकेच्या गादेगाव शाखेतून ६४४०१ रुपयाचे कर्ज घेतले होते. सरकारच्या कर्जमाफीमध्ये या शाखेतील आठ कर्जदार शेतकऱ्यांना कर्जमाफी मिळाली होती. त्यांच्या खात्यांत ३१ ऑक्टोंबर रोजी कर्जाची रक्कम जमा झाली होती. त्यानंतर बँकेने देवानंद जगदाळे यांना मेसेज पाठवून कर्जखाते संपल्याचे कळविले होते. कर्जमाफीचा आनंद जगदाळे कुटुंबाला झाला. मात्र, हा आनंद फार काळ टिकला नाही. बँकेने १३ नोव्हेंबर रोजी पुन्हा मेसेज करून खात्यावरील पैसे सरकारने परत घेतल्याचे सांगताच जगदाळे हादरून गेले. जगदाळे यांच्याप्रमाणे गादेगाव येथील अर्जुन कदम यांना देखील ५६५१६ रुपयाची कर्जमाफी झाली होती मात्र, त्यांच्याही खात्यातील रक्कम परत सरकारने काढून घेतली आहेत. जगदाळे यांच्यावर दुसऱ्या कोणत्याच बँकेचे कर्ज नाही. सरकारकडून फसवणूक झाल्याची भावना त्यांनी ‘मटा’शी बोलताना व्यक्त केली आहे. जगदाळे आणि कदम या दोन शेतकऱ्यांची कर्जखात्यात भरलेली रक्कम परत गेल्याने त्यांच्यासाठी औटघटकेची कर्जमाफी ठरली आहे.
विदर्भ कोकण ग्रामीण बँकेचे व्यवस्थापक शिवाजी रायभान म्हणाले, कर्जमाफी झालेल्या दोन शेतकऱ्यांच्या कर्जखात्यातील पैसे सरकारने परत घेतले आहेत. या बाबत बँकेला कोणतीच सूचना मिळाली नसल्याने पैसे परत का घेतले? याचे ठोस कारण समजू शकले नाही.
सहकारमंत्री देशमुख म्हणाले, कर्जमाफीनंतर पैसे परत गेल्याच्या जगदाळे आणि कदम यांच्या केसबाबत मंगळवारी तातडीने चौकशी करून त्यांना न्याय मिळवून देऊ. या बाबत सहकार विभागाचे वरीष्ठ आधिकारी विदर्भ कोकण बॅँकेच्या आधिकाऱ्यांशी चर्चा करून नेमके काय झाले, याची माहिती घेऊन शेतकऱ्यांना नक्की न्याय देतील.

मोबाइल अॅप डाउनलोड करा आणि राहा अपडेट

​ टिपू सुलतान जयंतीनिमित्त रॅली

November 20, 2017, 9:55 am

≫ Next: मुख्यमंत्री शनिवारीहुतात्मा कारखान्यावर

≪ Previous: कर्जमाफीचे पैसे पुन्हा माघारीपंढरपूर तालुक्यातील घटना; शेतकऱ्यांमध्ये गोंधळाची स्थिती

$

0

0

म. टा. वृत्तसेवा, सांगलीः
टिपू सुलतान जयंतीनिमित्त मुस्लिम समाजातर्फे शहरातील प्रमुख मार्गावरुन सोमवारी मोटरसायकल रॅलीचे काढण्यात आली. यामध्ये प्रामुख्याने युवकांचा सहभाग लक्षणीय होता. भारत झिंदाबाद, टिपू सुलतान झिंदाबादच्या घोषणांनी परिसर दणाणून सोडत ही रॅली मिरजेकडे गेली.
सोमवारी सकाळी सांगलीतील स्टेशन चौकातील वसंतदादा पुतळ्यानजीक सर्वजण एकत्रित झाले आणि रॅलीने बदाम चौक, रिसाला रोड, शिवाजी मंडई, मारुती चौक, बसस्थानक चौक, कोल्हापूर रोड, शंभर फुटी रस्ता, शासकीय रुग्णालय, राममंदिर मार्गे मिरजेतील दर्ग्यासमोर गेले आणि त्या ठिकाणी रॅलीचा समारोप झाला. रॅलीचे संयोजन तहरीक ए खुदादाद, ऑल इंडिया मज्लिस ए इत्तेहादूल मुस्लिमीन, बदाम चौक फ्रेंडस सर्कल, अलिशान चौक फ्रेंडस सर्कल यासह पंधराहून अधिक संघटनांनी केले होते. रॅलीत असिफ बावा, शकील पिरजादे,इम्रान जमादार, सईद सौदागर, फिरोज पठाण, इम्रान ढालाईत, जैद रोहिले, बिलाल काझी, बागवान इंडस्ट्रिज, युनुस महात, अमनउल्ला पठाण, बिलाल काझी, आसिफ शेख, सईद सौदागर, इम्रान ढालाईत, इब्राहिम मकानदार, साहिल खाटीक, टिपू इनामदार आदींसह अन्य कार्यकर्ते व युवक सहभागी झाले होते.

मोबाइल अॅप डाउनलोड करा आणि राहा अपडेट

मुख्यमंत्री शनिवारीहुतात्मा कारखान्यावर

November 20, 2017, 9:59 am

≫ Next: ​ वेण्णा लेकची गळती नियंत्रणात

≪ Previous: ​ टिपू सुलतान जयंतीनिमित्त रॅली

$

0

0

सांगली :
क्रांतिवीर नागनाथ अण्णा नायकवडी हुतात्मा किसन अहिर सहकारी साखर कारखान्याच्या इथेनॉल प्रकल्प आणि राज्यस्तरीय कब्बडी स्पर्धेच्या उद्घाटनासाठी मुख्यमंत्री देवेंद्र फडणवीस २५ नोव्हेंबर रोजी वाळव्यात येणार आहेत, अशी माहिती हुतात्मा उद्योग समुहाचे प्रमुख वैभव नायकवडी यांनी दिली.
केवळ ऊसाचे गाळप करून सर्वाधिक दर देणाऱ्या हुतात्मा कारखान्याने इथेनॉलचा महत्वाकांक्षी प्रकल्प साकारल्याचा लाभही ऊस उत्पादकांना दराच्या माध्यमातून मिळेल, अशी ग्वाही त्यांनी दिली.
महसूलमंत्री चंद्रकांत पाटील यांच्या अध्यक्षतेखाली होणाऱ्या इथेनॉल प्रकल्प उद्घाटनाच्या कार्यक्रमास पालकमंत्री सुभाष देशमुख, खासदार संजय पाटील, खासदार राजू शेट्टी, ज्येष्ठ नेते पतंगराव कदम, इथेनॉल असोसिएशनचे अध्यक्ष विजयसिंह मोहिते पाटील, आमदार मोहनराव कदम, शिवाजीराव नाईक, सुधीर गाडगीळ, अनिल बाबर, सुमन पाटील, सुरेश खाडे, विलासराव जगताप, माजी केंद्रीय राज्यमंत्री प्रतीक पाटील, भाजपचे जिल्हाध्यक्ष पृथ्वीराज देशमुख, जिल्हा परिषदेचे अध्यक्ष संग्रामसिंह देशमुख आदी उपस्थित राहणार आहेत.
२५ नोव्हेंबर रोजी सकाळी साडेनऊ वाजण्याच्या सुमारास हुतात्मा किसन अहिर विद्यालयाच्या पटांगणावर होणार आहे. याच पटांगणावर राज्यस्तरीय कब्बडी स्पर्धा होणार असून, ओडिशा येथे होणाऱ्या २० वर्षांखालील मुला-मुलींच्या राष्ट्रीय कबड्डी स्पर्धेसाठीचे संघ निवडले जाणार आहेत.

मोबाइल अॅप डाउनलोड करा आणि राहा अपडेट

​ वेण्णा लेकची गळती नियंत्रणात

November 20, 2017, 10:03 am

≫ Next: ‘स्वाभिमानी’च्या उपोषणाचा दहावा दिवसकुटुंबीय उपोषणस्थळी दाखल; तोडफोड, आंदोलन सुरूच

≪ Previous: मुख्यमंत्री शनिवारीहुतात्मा कारखान्यावर

$

0

0

म. टा. वृत्तसेवा, सातारा

महाबळेश्वर येथील प्रसिद्ध वेण्णा तलावाच्या भिंतीच्या पायातून प्रचंड प्रमाणात होणारी गळती महाबळेश्वर पालिकेच्या सुमारे चार तासांच्या अथक प्रयत्नानंतर नियंत्रणात आली. सुमारे ८० टक्के गळती थांबली आहे.
महाबळेश्वर येथील प्रसिद्ध वेण्णा तलावाच्या पायाच्या पायातून मोठ्या प्रमाणावर गेले दोन-तीन महिने गळती सुरू होती. त्याबाबत महाबळेश्वरचे नगरसेवक रवींद्र कुंभारदरे यांनी यांची माहिती देताच प्रशासन खडबडून जागे झाले होते. या तलावातील पाणी साठ्यातून महाबळेश्वरसह पांचगणी या दोन पर्यटन स्थळांना पाणीपुरवठा केला जातो. मात्र दिवसेंदिवस वाढणारी गळती दोन्ही पर्यटन स्थळांसाठी चिंतेचे कारण झाले होते. तसेच गळती वेळीच निघाली नाही तर वेण्णा नदीच्या पात्रालगतच्या गावानाही धरण भिंतीस मोठे भगदाड पडून धोका होणार होता.
प्रसिद्धी माध्यमांनी आवाज उठविल्यावर या भागातील आमदार मकरंद पाटील तसेच संबंधित खात्याचे वरिष्ठ येथे येवून पाहणी करून गेल्यानंतरही कामाला फारशी गती नव्हती. ही बाब गंभीर असल्याने नुकतेच सातारा जिल्ह्याच्या जिल्हाधिकारी श्‍वेता सिंघल यांनी संबंधित खात्याच्या अधिकाऱ्यांशी बोलणी करून सूचना केल्या होत्या.
दरम्यान, रविवारी जलसंपदा विभागाचे कार्यकारी अभियंता विजय घोगरे या सह तज्ज्ञांच्या पथकाने वेण्णा तलावाला भेट देऊन गळती होणाऱ्या धरण भिंतीच्या पाया लगतच्या भागाची पाहणी केली.
पथकातील गळती तज्ज्ञ विजय शिवतारे व अन्य जवानांना या पाया लगतच्या भागात मोठा खड्डा व भोवरा असल्याचे आढळून आले. तातडीने त्यांनी आपल्या अनुभवाप्रमाणे गळती या खड्ड्यातून, भोवाऱ्यातूनच होती का? याची तपासणी केली. त्यासाठी त्यांनी कापूस, कापड याचा वापर केला व खात्री झाल्यानंतर हालचालींना वेग आला. तज्ज्ञांच्या मार्गदर्शानानुसार महाबळेश्वरचे नगरसेवक कुमार शिंदे तसेच महाबळेश्वर ट्रेकर्सचे सुनील बाबा भाटीया यांनी वेगाने हालचाली करून पालिकेचा स्वच्छता विभाग, पालिका कर्मचारी, वेण्णा तलाव बोट क्लबचे कर्मचारी, पालिकेचा बांधकाम विभाग यांच्या मदतीने या खड्ड्यात कापडी वस्तू, कापूस, कपडे टाकून ते बंद करण्याचा प्रयत्न सुरू झाला. मात्र, कापडी वस्तू, कापूस कमी पडू लागला जेव्हा कापडी वस्तू घालू तेवड्या त्या सेकंदात भोवऱ्यातून तळाला जायच्या. रात्रीच्या अंधारात सर्च दिवे यांच्या मदतीने व थंडीचा कडका असतानाही तलावातील पाण्यात उतरून हे काम पालिकेचे कर्मचारी नगरसेवक कुमार शिंदे, महाबळेश्वर ट्रेकर्सचे सुनील बाबा भाटीया यांच्या मार्गदर्शनाखाली रात्री एक वाजेपर्यंत करीत होते. यासाठी त्यांनी रातोरात संपूर्ण महाबळेश्वर नागरी पालथी घालून येथील विविध हॉटेल्स, लॉजेस, अंजुमन हायस्कूलसह अन्य भागातून सुमारे दोन ट्रक कापडी वस्तू आणून या तलावातील खड्ड्यात व भोवर्यात भरल्या तसेच जेसीबीच्या सहाय्याने त्यावर मातीही टाकली. रात्री आठ वाजता सुरू केलेले हे काम सहा तासांच्या अथक प्रयत्नानंतर थांबले दरम्यान आज सकाळी वेण्णा तलावाच्या गळतीची पाहणी केली असता सुमारे ८० टक्के गळती आटोक्यात आल्याचे निदर्शनास आले.

मोबाइल अॅप डाउनलोड करा आणि राहा अपडेट

‘स्वाभिमानी’च्या उपोषणाचा दहावा दिवसकुटुंबीय उपोषणस्थळी दाखल; तोडफोड, आंदोलन सुरूच

November 20, 2017, 10:06 am

≫ Next: अभ्यास मंडळांवर विकास आघाडीचे वर्चस्व

≪ Previous: ​ वेण्णा लेकची गळती नियंत्रणात

$

0

0

म. टा. वृत्तसेवा, पंढरपूर
ऊसदरासाठी स्वाभिमानी शेतकरी संघटनेचे जिल्हाध्यक्ष समाधान फाटे आणि त्यांच्या सहकार्यांनी सुरू केलेल्या उपोषणाचा सोमवारी दहावा दिवस होता. दहाव्या दिवशी उपोषण करणाऱ्या कार्यकर्त्यांचे कुटुंबीयही उपोषणस्थळी दाखल झाले आहेत. सोमवारी सायंकाळी होणाऱ्या बैठकीत तोडगा न निघाल्यास मंगळवारपासून मुला-बाळांसह उपोषणाला बसण्याचा इशारा समाधान फाटे यांच्या पत्नीने दिला आहे.
समाधान फाटे गेल्या दहा दिवसांपासून उपोषण करीत असून, त्यांची प्रकृती खालावली आहे. सोमवारी सहकारमंत्री सुभाष देशमुख यांनी उपोषण करणाऱ्या कार्यकर्त्यांशी चर्चा करण्याचा प्रयत्न केला. मात्र, कोणताच ठोस पर्याय न दिल्याने उपोषण सुरूच ठेवण्यात आले आहे. फाटे यांचे वडील आणि भाऊ यांचा मृत्यू झाला असल्याने समाधान यांच्यावरच घराची सर्व जबाबदारी आहे. सध्या त्यांच्या किडन्यांना धोका निर्माण झाला आहे. मुख्यमंत्र्यांनी आदेश देऊनही सहकारमंत्री तोडगा काढू न शकल्याने आता समाधान यांची विधवा आई मालनताई आणि पत्नी सुनीता सोमवारी उपोषणस्थळी लहान मुलांसह दाखल झाल्या आहेत. आपल्या कुटुंबाचा समाधान हाच एकमेव आधार असून, मागील दहा दिवस त्याच्या पोटात अन्नाचा कणही नाही. सोमवारी ऊसदरावर यशस्वी तोडगा न निघाल्यास मंगळवारपासून फाटे कुटुंबीय मुलांसह उपोषण सुरू करणार आहेत, असा इशारा समाधान फाटे यांच्या पत्नीने दिला आहे.
नवनाथ माने, या उपोषण करणाऱ्या कार्यकर्त्यांचा एक गुंठाही ऊस नाही, तरीही ते गेली दहा दिवस उपोषण करीत आहेत. साखर कारखानदारांकडून साखर उताऱ्यात होत असलेल्या चोरीचा पर्दापाश केल्यास जिल्ह्यात २९०० प्रमाणे दर देणे शक्य असल्याचे त्यांनी सांगितले. कोणत्याही परिस्थितीत दर मिळाल्याशिवाय उपोषण सोडणार नाही, यात प्राण गेला तरी हरकत नाही, असा इशारा माने यांनी दिला आहे.
आंदोलन मोडून काढण्याचा प्रयत्नः रविकांत तुपकर
सोलापुरात ऊसदरासाठी ठिकठिकाणी तीव्र आंदोलन सुरूच आहे. सोमवारी पंढरपूर-कराड रस्त्यावर कोर्टीजवळ पोलिस बंदोबस्तात निघालेल्या दोन ट्रॅक्टरची टायर फोडून आंदोलकांनी आपला संताप व्यक्त केला. माळशिरस येथे मनसेसह शिवसेना व शेतकरी संघटनांनी रास्ता रोको करून वाहतूक रोखून धरली होती. कुर्डुवाडी-बार्शी रस्त्यावर ऊसदर आणि वीज तोडणीच्या विरोधात चक्क जाम आंदोलन करण्यात आले. या सर्व आंदोलनाच्या पार्श्वभूमीवर सोलापूर जिल्ह्यात मोठा पोलिस आणि राज्य राखीव दलाचा फौजफाटा मागविण्यात आला असून, महत्वाच्या सर्व मार्गावर मोठा बंदोबस्त लावण्यात आला आहे. पोलिसांची तयारी पाहता लवकरच आंदोलकांची धरपकड सुरू होण्याची शक्यता आहे. पोलिस बंदोबस्तात आंदोलन मोडायचे प्रयत्न सुरू केल्याचा आरोप स्वाभिमानीचे नेते रविकांत तुपकर यांनी केला आहे.

मोबाइल अॅप डाउनलोड करा आणि राहा अपडेट

---

अभ्यास मंडळांवर विकास आघाडीचे वर्चस्व

November 20, 2017, 1:30 pm

≫ Next: जिल्हा बँकेचे अद्याप २५ कोटी रुपये अडकले

≪ Previous: ‘स्वाभिमानी’च्या उपोषणाचा दहावा दिवसकुटुंबीय उपोषणस्थळी दाखल; तोडफोड, आंदोलन सुरूच

$

0

0

म. टा. प्रतिनिधी, कोल्हापूर

शिवाजी विद्यापीठ अधिसभा आणि अन्य अधिकार मंडळांवर शिवाजी विद्यापीठ विकास आघाडीने आजपर्यंत अभ्यास मंडळावर असलेले शिवाजी विद्यापीठ शिक्षक संघाचे (सुटा) वर्चस्व मोडीत काढून निर्विवाद वर्चस्व मिळवले. एकूण ४७ अभ्यास मंडळांपैकी २५ अभ्यास मंडळांसाठी झालेल्या निवडणुकीत विकास आघाडीने १० बिनविरोध जागांसह अन्य सात जागांवर विजय मिळवला. एकूण १७ जागा विकास आघाडीला तर ६ जागा ‘सुटा’ला मिळाल्या. एका जागेवर अपक्षाने बाजी मारली असून एका गटात सुटा-आघाडी आणि अपक्ष अशी समान वर्णी लागली. यापूर्वी बिनविरोध निवडलेले संस्थाचालक गटातील सहा उमेदवार आणि बिनविरोध ९ जागांसह प्राचार्य गटातून विजयी झालेले उमेदवार आघाडीचे असल्याने संस्थाचालक गट आणि प्राचार्य गटातही आघाडीचा वरचष्मा राहिला.

अधिसभा आणि अधिकार मंडळासाठी शुक्रवारी चुरशीने सरासरी ६२ टक्के मतदान झाले होते. नव्या विद्यापीठ कायद्यानुसार अधिसभा, अभ्यास मंडळे, प्राचार्य, संस्थाचालक, नोंदणीकृत पदवीधर, महाविद्यालय शिक्षक, विद्यापीठ शिक्षक आणि विद्यापरिषद अशी गटनिहाय निवडणूक झाली. त्यापैकी ११ अभ्यास मंडळे, सहा संस्था प्रतिनिधी, एक नोंदणीकृत पदवीधर, एक अधिसभेवरील शिक्षक आणि प्राचार्य गटातील आठ जागा बिनविरोध झाल्या. उर्वरित ७२ जागांसाठी १५६ उमेदवारांमध्ये लढत झाली होती. शिवाजी विद्यापीठ विकास आघाडी, शिवाजी विद्यापीठ विकास मंच, शिवाजी विद्यापीठ शिक्षक संघ (सुटा) आणि विद्यापीठ आजी-माजी विद्यार्थी कृती समितीसह काही अपक्ष उमेदवार या रिंगणात होते.

सोमवारी सकाळी नऊ वाजता विद्यापीठातील परीक्षा भवन क्रमांक दोनमध्ये मतमोजणी सुरू झाली. अभ्यास मंडळातील १५ गटांची मतमोजणी आधी झाली. सुरूवातीपासूनच विकास आघाडीच्या उमेदवारांनी मतांची आघाडी घेतली. त्यानंतर समर्थकांनी विद्यापीठ आवारात जल्लोषास सुरूवात केली. अभ्यास मंडळातील निवडणूक झालेल्या १५ गटांतील उमेदवार आणि त्यांचे प्रतिनिधी सकाळपासूनच उपस्थित होते. दरम्यान, रात्री उशीरापर्यंत मतमोजणी सुरू होती.

पहिला निकाल शिक्षक गटाचा

विद्यापीठ शिक्षक गटातून विद्यापीठ विकास आघाडीचे सागर डेळेकर, प्रा. भारती पाटील आणि सुप्टाचे एन. बी. गायकवाड विजयी झाले. अधिसभा निवडणुकीत विकास आघाडी आणि विद्यापीठ विकास मंच यांच्यात मैत्रीपूर्ण लढती झाल्या. पहिलाच निकाल विद्यापीठ शिक्षक गटाचा जाहीर झाला.

अभ्यास मंडळांच्या १७ जागांवर ​आघाडीची बाजी

सकाळी ११ वाजता सुरू झालेली अभ्यास मंडळांची गटनिहाय मतमोजणी पाच तास सुरू होती. दुपारी चार वाजेपर्यंत मोजणी पूर्ण झाली. अर्थशास्त्र, इतिहास, प्राणीशास्त्र, केमिस्ट्री, भूगोल, इंग्रजी, कॉमर्ससह उर्वरित सात गटातील अभ्यास मंडळांवर आघाडीने वर्चस्व मिळवले. आघाडीने २० जागांवर विजय मिळवला. तर ‘सुटा’कडून २१ आणि अपक्ष ४ उमेदवार निवडून आले. प्राचार्य गटाच्या एका जागेवर आघाडीच्या सी. टी. कारंडे यांनी ८९ मते मिळवून विजय मिळवला. यापूर्वी प्राचार्य गटातील आठ जागा बिनविरोध झाल्या आहेत. तर एस.टी. गटातील एक जागा रिक्त आहे.

गणित (मॅथेमॅटिक्स) अभ्यासमंडळाच्या गटात शिवाजी विद्यापीठ विकास आघाडीचे दिलीप हासबे, नवनीत सांगळे विजयी झाले. या गटात विद्यापीठ शिक्षक संघाचे (सुटा) हंबीरराव दिंडे विजयी झाले. ‘सुटा’चे जनार्दन यादव आणि विकास आघाडीचे दिलीप हसबे यांना समान मते पडल्याने चिठ्ठीवर निकाल जाहीर करण्यात आला. हसबे यांना चिठ्ठीवर विजयी घोषित करण्यात आले.

व्यवस्थापन गटातून शिवाजी विद्यापीठ विकास आघाडीचे दत्तात्रय चवरे, शंकर सारंग हे विजयी झाले, तर ‘सुटा’चे रवींद्र तेली विजयी झाले.

मायक्रोबायोलॉजी गटात ‘सुटा’ने दोन जागा जिंकत बाजी मारली. ‘सुटा’चे ए. आर. जाधव आणि एस. एस. सुपनेकर यांनी प्रत्येकी तीन मते घेत दोन जागा जिंकल्या. तर आघाडीच्या एच. व्ही देशमुख यांनाही तीन मते मिळाली. या गटात तिन्ही उमेदवारांना समान मते मिळाली.

व्यावसायिक अर्थशास्त्र गटात ‘सुटा’च्या यू. एम. माळकर आणि बी. के. माने यांनी विजय मिळवला तर व्ही. एम. कुंभार यांच्या विजयाने आघाडीला एक जागा मिळाली.

वनस्पतीशास्त्र गटात आघाडीच्या व्ही. सी. कारंडे आणि एम. व्ही. वाघमारे यांनी बाजी मारली. तर ए. एन. सादळे यांनी विजयावर ‘सुटा’चे नाव कोरले. पदार्थविज्ञान गटात आघाडीच्या व्ही. व्ही. किल्लेदार आणि एम. एम. कारंजकर यांनी विजय मिळवला. तर ‘सुटा’च्या यू. के. मोहिते यांनी बाजी मारली.

हिंदी गटात एकही जागा आघाडीला मिळाली नाही. ‘सुटा’च्या संजय चिंदगे आणि ए. एस. पाटील यांनी विजय मिळवला तर उर्वरित एक जागा अपक्ष सुनील बनसोडे यांना मिळाली. प्राणीशास्त्र गटात विश्वनाथ देशपांडे आणि सुरेश खाबडे हे आघाडीचे उमेदवार निवडून आले. तर ‘सुटा’च्या सत्यवान पाटील आणि एस. ए. मांजरे यांना समान मते पडल्याने चिठ्ठीतून पाटील विजयी ठरले.

केमिस्ट्री व केमिकल इंजिनीअरिंग गटातून सी. पी. माने आणि संजय पोरे यांनी आघाडीला विजय मिळवून दिला. तर रंजन कांबळे यांच्या विजयाने ‘सुटा’चे स्थान या गटात टिकून राहिले. मराठी गटात ‘सुटा’च्या अरूण शिंदे आणि उदय जाधव यांनी विजय मिळवला तर अपक्ष दत्ता पाटील निवडून आले.

कॉमर्स गटातून सोनाप्पा गोरल या आघाडीच्या उमेदवारांनी विजय मिळवला. तर ‘सुटा’च्या शिवाजी पोवार आणि उदयकुमार शिंदे यांनी विजय मिळवला. याच गटात सुरूवातीला आघाडीचे तुळशीराम महानवर विजयी घोषित झाले होते. मात्र गोरल यांनी फेरमोजणीची मागणी केल्यानंतर नव्याने केलेल्या मोजणीत गोरल हे विजयी झाल्याचे स्पष्ट झाले.

भूगर्भशास्त्र व भूगोल गटात श्रीकृष्ण गायकवाड आणि विनोद वीर या दोन अपक्षांनी बाजी मारली, तर एक उर्वरित जागा राखण्यात आघाडीच्या बाळासाहेब जाधव यांना यश आले. इंग्रजी गटात एस. बी. भांबर आणि एन. पी. खवरे यांनी आघाडीला यश मिळवून दिले. तर ‘सुटा’च्या आर. एस. पोंडे यांना यश मिळाले. इतिहास गटात एन. ए. वरेकर, एम. ए. चव्हाण आणि राजश्री निकम या तिन्ही जागांवर ‘सुटा’ने विजयी मोहर उमटवली. अर्थशास्त्र गटात आघाडीच्या एस. एम. भोसले यांना यश मिळाले. तर ‘सुटा’च्या व्ही. बी. देसाई आणि व्ही. ए. पाटील यांनी विजय मिळवला.

मोबाइल अॅप डाउनलोड करा आणि राहा अपडेट

जिल्हा बँकेचे अद्याप २५ कोटी रुपये अडकले

November 20, 2017, 1:30 pm

≫ Next: विद्यापीठ क्रीडा विभाग ‘बंदिस्त’

≪ Previous: अभ्यास मंडळांवर विकास आघाडीचे वर्चस्व

$

0

0

Maruti.Patil@timesgroup.com

Tweet : @MarutipatilMT

कोल्हापूर : केंद्र सरकारने गेल्यावर्षी जाहीर केलेल्या नोटाबंदीनंतर जिल्हा बँकेत जमा झालेल्या पाचशे आणि एक हजार रुपये मूल्याच्या नोटांचा प्रश्न निर्माण झाला होता. केंद्रीय अर्थमंत्रालयाने नोटा स्वीकारण्याचे आदेश दिल्यानंतर जिल्हा बँकांकडील नोटा भारतीय रिझर्व्ह बँकेने (आरबीआय) स्वीकारल्या, पण त्यापूर्वी दोन दिवसांत जमा झालेल्या नोटा स्वीकारण्यास आरबीआयने नकार दिल्याने कोल्हापूर जिल्हा मध्यवर्ती सहकारी बँकेचे २५ कोटी रुपये अडकून पडले आहेत. याबाबत बँकेने सुप्रिम कोर्टात धाव घेतली असली तरी चार महिन्यानंतरही सुनावणी सुरू झालेली नसल्याने या रकमेवरील व्याजा भुर्दंड बँकेला बसण्याची शक्यता आहे.

आठ नोव्हेंबर २०१६ रोजी केंद्र सरकारने पाचशे व एक हजार रुपये मूल्याच्या नोटावर बंदी घालण्याचा निर्णय घेतला. अचानक घेतलेल्या निर्णयामुळे बँकिंग क्षेत्रात एकच खळबळ उडाली. जुन्या नोटा जमा करण्यासाठी लोकांची झुंबड उडाली. नोटाबंदी निर्णयानंतर चार दिवसांत तब्बल २७५ कोटी रुपये कोल्हापूर जिल्हा बँकेत जमा झाले. कोल्हापूरप्रमाणे इतर जिल्हा बँकांतही मोठ्या प्रमाणात जुन्या नोटा जमा झाल्या. त्यामुळे सर्वच जिल्हा बँकांवर संशय व्यक्त करत जुन्या नोटा स्वीकारण्यास बंदी घालण्याबरोबरच नोटा स्वीकारणार नसल्याचे आरबीआयने स्पष्ट केले. यामुळे जिल्हा बँकांत जमा झालेल्या जुन्या नोटांचा प्रश्न निर्माण झाला. याबातच्या थेट तक्रारी पंतप्रधान कार्यालयापर्यंत झाल्यानंतर आठ महिन्यानंतर केंद्रीय अर्थमंत्रालयाने नोटा स्वीकारण्याचे आदेश दिले.

त्यानुसार १९ जुलैला जिल्हा बँकेने आरबीआयच्या मुंबई शाखेत रक्कम जमा करण्याचा प्रयत्न केला, पण २७५ कोटींपैकी २५ कोटी रुपये नोटाबंदीपूर्वीचे असल्याने आरबीआयने पूर्ण रक्कम स्वीकारण्यास नकार दिला. वास्तविक नोटाबंदी निर्णयापूर्वी जिल्हा बँकेत ५० कोटी रुपये जमा झाले होते. त्यातील २५ कोटींचा व्यवहारात वापर झाला. मात्र उर्वरीत रक्कम घेण्यास नकार दिल्यानंतर बँकेने सुप्रिम कोर्टात धाव घेतली. जिल्हा बँकेच्या वकिलांनी सुनावणी घेण्याची विनंती केली. मात्र चार महिन्यानंतरही अद्याप सुनावणी सुरू झालेली नाही. नोटाबंदीनंतर अनेक प्रकारच्या याचिका दाखल झाल्या आहेत. यावर एकत्रीत सुनावणी घेण्यासाठी सात न्यायाधिशांचे पॅनेल नियुक्त केले असून सुनावणीकडे लक्ष लागले आहे. कोल्हापूर जिल्हा बँकेप्रमाणेच नाशिक, सांगली व सातारा जिल्हा बँकांचेही कोट्यवधींची रक्कम अशा प्रकारे अडकून पडली आहे.
======


नोटाबंदीनंतर विविध प्रकारच्या याचिका दाखल झाल्या आहेत. तसेच जिल्हा बँकांनीही जुन्या नोटा स्वीकारण्यासाठी याचिका दाखल केल्या आहेत. सर्व याचिकांची एकत्रित सुनावणी घेण्यासाठी सुप्रिम कोर्टात सात न्यायाधिशांचे पॅनेल तयार केले आहे, पण अद्याप सुनावणी सुरू झालेली नाही.

हसन मुश्रीफ, चेअरमन, जिल्हा बँक

मोबाइल अॅप डाउनलोड करा आणि राहा अपडेट

विद्यापीठ क्रीडा विभाग ‘बंदिस्त’

November 20, 2017, 1:30 pm

≫ Next: अवकाळीची हजेरी

≪ Previous: जिल्हा बँकेचे अद्याप २५ कोटी रुपये अडकले

$

0

0

satish.ghatage@timesgroup.com

Twitt:@satishgMT

कोल्हापूर ः कोल्हापूर, सांगली आणि सातारा जिल्हा कार्यक्षेत्र असलेल्या शिवाजी विद्यापीठाच्या क्रीडा स्पर्धांचा धुमधडाका सुरू आहे, पण स्पर्धेचे आयोजन, निकाल आणि विद्यापीठ संघ निवड चाचणी यासंबंधीची माहिती शिवाजी विद्यापीठाच्या क्रीडा विभागाच्या पोलादी पडद्याआडून बाहेर पडतच नाही. क्रीडा स्पर्धा, त्यांचे निकाल, आंतरविद्यापीठ स्पर्धेसाठी पाठवण्यात येणाऱ्या खेळाडूंची नावे जाहीर करण्याबाबत विद्यापीठ क्रीडा विभागाकडून कमालीची गुप्तता पाळली जाते. ऑनलाइनच्या जमान्या सर्वत्र पारदर्शकता असताना क्रीडा विभाग त्यापासून लांब का आहे, असा प्रश्न खेळाडू, प्रशिक्षक, पालकांतून उपस्थित केला जात आहे.

अखिल भारतीय पातळीवरील विद्यापीठ क्रीडा स्पर्धांचे वेळापत्रक झाल्यानंतर विभागीय विद्यापीठ स्पर्धांचे वेळापत्रक जाहीर होते. त्यानंतर शिवाजी विद्यापीठाचा क्रीडा विभाग जिल्हास्तरीय आणि आंतर जिल्हास्तरीय क्रीडा स्पर्धांचे नियोजन करते. जिल्हास्तरीय क्रीडा स्पर्धेत शिवाजी विद्यापीठाच्या कोल्हापूर क्षेत्रातील महाविद्यालये स्पर्धेत भाग घेतात, तर विभागीय स्पर्धेत शिवाजी विद्यापीठाशी संलग्न असलेल्या कोल्हापूर, सांगली आणि सातारा जिल्ह्यातील खेळाडू सहभागी होतात. शिवाजी विद्यापीठाच्या कार्यक्षेत्रात २७५ हून अधिक महाविद्यालये आहेत.

दरवर्षी शिवाजी विद्यापीठ क्रीडा विभाग एका महाविद्यालयाला जिल्हास्तरीय स्पर्धेचे यजमानपद देते. यावर्षी कागल तालुक्यातील बिद्री येथील दूधगंगा महाविद्यालयाला स्पर्धेचे यजमानपद दिले आहे. ऑगस्टपासून जिल्हास्तरीय आणि आंतरजिल्हास्तरीय स्पर्धा सुरू झाल्या आहेत. ५० हून अधिक क्रीडा प्रकारांत दहा हजार खेळाडू सहभागी झाले आहेत. पहिल्या तीन क्रमांकाच्या खेळाडूंना विभागीय, पश्चिम विभागीय स्पर्धेत खेळण्याची संधी मिळते, पण शिवाजी विद्यापीठाने आजअखेर झालेल्या एकाही क्रीडा प्रकाराच्या स्पर्धेचा निकाल जाहीर केलेला नाही. तसेच पश्चिम विभागीय आणि अखिल भारतीय विद्यापीठ स्पर्धेसाठी पाठवण्यात येणाऱ्या संघ आणि खेळाडूंची यादी जाहीर केली जात नसल्याने खेळाडूंमध्ये संतापाची लाट उसळली.

शिवाजी विद्यापीठाकडे क्रीडा विभाग, जनसंपर्क अधिकारी, वृत्तपत्रविद्या आणि संवाद शास्त्र असे विभाग आहेत. शिवाजी विद्यापीठाची वेबसाइटही आहे, पण शिवाजी विद्यापीठाकडून एकाही स्पर्धेचा निकाल जाहीर करण्याची तसदी घेतली जात नाही. स्पर्धेत यश मिळवून कौतुक होत नसल्याने खेळाडू महाविद्यालयाकडे तक्रार करतात. खेळाडूंच्या प्रसिद्धीसाठी महाविद्यालये पत्रक काढून प्रसिद्ध करतात. पाच वर्षांपूर्वी प्रत्येक स्पर्धेचा निकाल विद्यापीठ आणि यजमान महाविद्यालयाकडून जाहीर केला जात होता, पण ही पद्धत विद्यापीठांकडून बंद झालेली आहे. डिजिटल युगातही स्पर्धा कार्यक्रम आणि निकाल जाहीर करण्यात विद्यापीठ मागे असल्याबद्दल आश्चर्य व्यक्त केले जात आहे.

जिमखाना फी अडीच कोटी रुपये

शिवाजी विद्यापीठ महाविद्यालयात प्रवेश केलेल्या प्रत्येक विद्यार्थ्यांकडून ९० रुपये जिमखाना शुल्क आकारते. शिवाजी विद्यापीठाच्या कार्यक्षेत्रात अडीच लाख विद्यार्थी शिक्षण घेत आहेत. दरवर्षी अडीच कोटी रुपये जिमखाना फी जमा होते. ९० रुपयांपैकी जिल्हास्तरीय स्पर्धेसाठी पाच रुपये तर आंतर विभागीय स्पर्धेसाठी तीन रुपये स्पर्धेचे यजमान करणाऱ्या महाविद्यालयाला दिले जातात. जिल्हास्तरीय स्पर्धेसाठी साडेबारा लाख रुपये तर विभागीय स्पर्धेसाठी साडेसात लाख रुपयांचा निधी महाविद्यालयाला मिळतो. हा खर्च वगळून विद्यापीठाकडे दोन कोटी पाच लाख रुपये शिल्लक राहतात. या निधीतून विविध क्रीडा प्रकाराची शिबिरे, पश्चिम विभागीय किंवा अखिल भारतीय स्पर्धेसाठी खर्च करायचा असतो, पण क्रीडा विकासासाठी विद्यार्थ्यामागे जमा केलेला निधी खर्च होत नाही, असे विद्यार्थ्यांचे म्हणणे आहे.

जिल्हा क्रीडा कार्यालय पुढे

निधीची कमतरता असताना जिल्हा क्रीडा कार्यालय आणि प्राथमिक शिक्षण मंडळ संयुक्तरित्या शालेय क्रीडा स्पर्धांचे करते. जिल्हा क्रीडा कार्यालय व महापालिकेचे दोन ते तीन कर्मचारी प्रत्येक स्पर्धेचा निकाल जाहीर करतात. स्पर्धेचे फोटो पाठवतात. त्यामुळे शालेय स्पर्धांत पारदर्शकता निर्माण झाली आहे, पण विद्यापीठाच्या स्पर्धा कधी सुरू होतात आणि संपतात हे समजतच नाही.


०००

विद्यापीठाकडून गेली काही वर्षे स्पर्धेचा निकाल जाहीर केला जात नाही. आमच्या मुलाने स्पर्धेत यश मिळवले म्हणून आम्ही कॉलेजच्या लेटरपॅडवर वृत्त तयार करतो. खेळाडूच्या यशाचे कौतुक करावे, ही जबाबदारी विद्यापीठाची असताना विद्यापीठाचा क्रीडा विभाग मागे असल्याबद्दल आम्हाला वाईट वाटते.

रामराव पाटील, खेळाडूचे पालक

मोबाइल अॅप डाउनलोड करा आणि राहा अपडेट

अवकाळीची हजेरी

November 20, 2017, 1:30 pm

≫ Next: कुरुकलीजवळ अपघातातदोन महाविद्यालयीन युवती ठार

≪ Previous: विद्यापीठ क्रीडा विभाग ‘बंदिस्त’

$

0

0

म. टा. प्रतिनिधी, कोल्हापूर

ढगाळ हवेमुळे दोन दिवस थंडीचा कडाका कमी झालेला असताना सोमवारी शहरात अवकाळी पावसाने हजेरी लावली. थंडीच्या आल्हाददायक वातावरणावर पाणी फिरवून शहराच्या विविध भागांत पावसाच्या सरी कमी अधिक प्रमाणात कोसळल्या. पाऊस सुरु झाल्याने ऊस लागवड, ऊस तोडणी तसेच गुऱ्हाळघरांची कामे खोळंबली आहेत.

बंगालच्या उपसागराच्या नैर्ऋत्य भागावर वातावरणाच्या वरच्या थरात हवेची चक्राकार स्थिती आहे. तसेच कर्नाटकच्या उत्तरेकडील किनारी भागात अशीच स्थिती असून तेथून मालदीवपर्यंत कमी दाबाचा पट्टा निर्माण झाला आहे. बाष्पाचे प्रमाण वाढले असून परिणामी पाऊस पडतो आहे.

शहरात सलग तिसऱ्या दिवशी ढगाळ वातावरण होते. दिवसभर ढग दाटून आल्यामुळे हवेत गारवा अनुभवायला मिळाला नाही. दुपारनंतर शहराच्या काही भागात पाऊस पडला. करवीरच्या पश्चिम भागात विजांच्या कडकडाटासह पाऊस झाला. तसेच राधानगरीतही गडगडाटासह पावसाने हजेरी लावली.

दरम्यान, राज्यात मध्य महाराष्ट्र, मराठवाडा आणि विदर्भाच्या काही भागांत किमान तापमानात सरासरीच्या तुलनेत उल्लेखनीय वाढ झाली आहे. तर कोकण गोव्याच्या काही भागांत किमान तापमानात सरासरीच्या तुलनेत किंचित वाढ झाली. पुढील दोन दिवस पुण्यासह दक्षिण मध्य महाराष्ट्र, मराठवाड्यात तुरळक ठिकाणी आणि कोकण गोव्यामध्ये पाऊस पडण्याची शक्यता असून विदर्भात हवामान कोरडे राहिल, असा अंदाज हवामान विभागाने वर्तविला आहे.

मोबाइल अॅप डाउनलोड करा आणि राहा अपडेट

कुरुकलीजवळ अपघातातदोन महाविद्यालयीन युवती ठार

November 20, 2017, 1:30 pm

≫ Next: आगप्रकरणाच्या चौकशीसाठीकागलमध्ये शिवसेनेचा मोर्चा

≪ Previous: अवकाळीची हजेरी

$

0

0

राधानगरी



कुरुकली (ता.करवीर) येथील बस थांब्याजवळ मोटारसायकल आणि सिमेंट मिक्सर ट्रक यांची धडक होऊन दोन महाविद्यालयीन युवती ठार झाल्या. तर एक युवक गंभीर जखमी झाला. ही दुर्घटना सोमवारी दुपारी दोन वाजण्याच्या सुमारास घडली.

याबाबत अधिक माहिती अशी, सोमवारी (ता.२०) भोगावती महाविद्यालयातील बी.एस्सीच्या तिसऱ्या वर्गात शिकणारे प्रफुल्ल पाटील (रा. गुडाळ, ता. राधानगरी), विजया पाटील (रा. म्हालसवडे, ता. करवीर) आणि अक्षता चौगले (रा. बाचणी, ता. करवीर) हे तिघेजण हिरोहोंडा मोटारसायकलवरून आपल्या पाहुण्यांच्याकडून विज्ञान प्रात्यक्षिकासाठी महाविद्यालयाकडे निघाले होते. दुपारी सव्वादोन वाजण्याच्या सुमारास महाविद्यालयाकडे जात असताना कुरुकली बस थांब्याजवळ अचानक सिमेंट मिक्सर ट्रकवर जाऊन त्यांची मोटारसायकल आदळली. मोठ्या गतीने जाणारा ट्रक आणि वेगात असलेली मोटारसायकल यांची जोराची धडक झाली. मोटारसायकलसह तिघेजण जोराने फरफटत वीस फूट अंतरापर्यंत गेले. अक्षता चौगले हिच्या डोक्यावरून ट्रकचे चाक गेल्याने ती जागीच ठार झाली. तर मोटारसायकलवरील प्रफुल्ल पाटील आणि विजया पाटील हे दोघे गंभीर जखमी झाले. जखमींना तातडीने कोल्हापूर येथे उपचारासाठी सीपीआर इस्पितळात दाखल करण्यात आले. मात्र उपचारादरम्यान विजया पाटील हिचा मृत्यू झाला. तर प्रफुल्ल पाटील याच्या पायांना मोठी दुखापत झाली आहे.

भोगावती महाविद्यालयात मोठ्या संख्येने विद्यार्थी शिक्षणासाठी येत असल्याने कुरुकली बस थांब्याजवळ विद्यार्थ्यांची दिवसभर गर्दी असते. या ठिकाणी गतिरोधक बसवावेत, अशी मागणी या गावच्या तरुण मंडळांनी केली होती. परंतु सार्वजनिक बांधकाम विभागाने या मागणीकडे दुर्लक्ष केले. अपघातस्थळी पालक,विद्यार्थी यांची प्रचंड गर्दी झाल्याने कोल्हापूर राधानगरी राज्यमार्गावरील वाहतूक ठप्प झाली होती.

मोबाइल अॅप डाउनलोड करा आणि राहा अपडेट

आगप्रकरणाच्या चौकशीसाठीकागलमध्ये शिवसेनेचा मोर्चा

November 20, 2017, 1:30 pm

≫ Next: ‘समरजीत, संजय घाटगेंनाविधानसभेसाठी शुभेच्छा’

≪ Previous: कुरुकलीजवळ अपघातातदोन महाविद्यालयीन युवती ठार

$

0

0

कागल

कागल नगरपालिकेला लागलेल्या आग प्रकरणाची तातडीने चौकशी करावी, दोषींना अटक करण्यात यावी आदी मागण्यांसाठी शिवसेनेच्यावतीने कागल पोलिस स्टेशनवर मोर्चा काढण्यात आला. निवेदन स्वीकारण्याच्या कारणावरुन पोलिस आणि शिवसेनेचे कार्यकर्ते यांच्यात तणाव निर्माण झाला. शिवसेना जिल्हाप्रमुख विजय देवणे व संजय पवार यांनी पोलिस निरीक्षक औदुंबर पाटील यांच्यावर कारवाई करावी, अशी मागणी गृहराज्यमंत्री दिपक केसरकर यांच्याबरोबर बोलताना मोबाइलवर केली. आंदोलनावेळी दोन महिलांना चक्कर आली. दरम्यान, मोर्चातील महिलांना अपमानास्पद वागणूक देण्यात आल्याचा आरोप करण्यात आला.

येथील बसस्थानकापासून मोर्चाला सुरुवात झाली. पोलिस ठाण्यावर प्रवेशद्वारावर मोर्चा आडवून व शिष्टमंडळाने येऊन निवेदन द्यावे, अशी पोलीसांनी विनंती केली.

जिल्हाध्यक्ष विजय देवणे व संजय पवार, उपजिल्हा प्रमुख संभाजी भोकरे यांनी पोलिस निरीक्षक औदुंबर पाटील यांनी बाहेर येऊन निवेदन स्वीकारावे अशी मागणी केली. निवेदन देतेवेळी प्रतिकात्मक फायली जाळण्यात येणार असल्याची कल्पना निरीक्षक औदुंबर पाटील यांना आली. त्यामुळे त्यांनी बाहेर येऊन निवेदन स्वीकारण्यास नकार दिला.त्यावेळी शिवसेनेचे कार्यकर्ते व पोलीस यांच्यात तणाव निर्माण झाला. सुमारे अर्धा तासाने निषेधाच्या घोषणा देत प्रवेशद्वाराच्या आत घुसण्याचा प्रयत्न शिवसैनिकांनी केला. यावेळी शिवसैनिकांनी प्रवेशद्वाराला धक्के मारायला सुरुवात केली, त्यांना पोलिसांनी अडविण्याचा प्रयत्न केला. पण अखेर शिवसैनिक आतमध्ये घुसले.

यावेळी महिला शिवसैनिक संज्योती मळवीकर, शांता जाधव या महिलांना चक्कर आली. त्यामुळे आंदोलक महिलांची तक्रार घ्यावी अशी मागणी करण्यात आली. मात्र पोलिसांनी त्यास नकार दिला. या कारणावरुन ठाण्यात बराचकाळ गदारोळ उडाला. यावेळी गृहराज्यमंत्री दिपक केसरकर यांच्याशी संपर्क साधून त्यांच्याकडे तक्रार मांडण्यात आली. त्यानंतर पोलिसांनी संबधित महिलांची तक्रार घेतली. त्यानंतर या महिलांची वैद्यकीय तपासणी करण्यासाठी पत्राची मागणी करण्यात आली, त्यावरुनही मोठा गोंधळ झाला. अखेर रुग्णवाहीकेतून त्यांना वैद्यकीय तपासणीसाठी ग्रामीण रुग्णालयात नेण्यात आले.

मोबाइल अॅप डाउनलोड करा आणि राहा अपडेट

‘समरजीत, संजय घाटगेंनाविधानसभेसाठी शुभेच्छा’

November 20, 2017, 1:30 pm

≫ Next: कामटेच्या सांगण्यावरून सीसीटीव्ही फुटेज गायब

≪ Previous: आगप्रकरणाच्या चौकशीसाठीकागलमध्ये शिवसेनेचा मोर्चा

$

0

0

कागल

‘विधानसभेच्या आगामी निवडणुकीसाठी भाजपचे समरजित घाटगे व सध्या शिवसेनेत असलेले संजय घाटगे यांना हार्दिक शुभेच्छा आहेत. त्यांनी ताकदीने मैदानात उतरावे,’ असे आवाहन आमदार हसन मुश्रीफ यांनी केले.

नानीबाई चिखली (ता. कागल) येथील ग्रामस्थांच्या वतीने बिद्री साखर कारखान्याचे नूतन संचालक प्रविण भोसले यांच्या सत्कार समारंभात ते बोलत होते. अध्यक्षस्थानी बापूसाहेब भोसले होते.

आमदार मुश्रीफ म्हणाले, ‘ मुख्यमंत्री देवेंद्र फडणवीस हे समरजितसिंह घाटगे यांना आशिर्वाद देण्यासाठी दुसऱ्यांदा कागलमध्ये येत आहेत. त्यामुळे समरजित घाटगे हे विधानसभेसाठी भाजपचे उमेदवार असतील हे निश्चित आहे. तसेच दुसऱ्या बाजूला माजी आमदार संजय घाटगे यांनी विधानसभा निवडणुकीच्या तोंडावर समृध्दी साखर कारखाना उभारण्याची घोषणा व पायाभरणी केली आहे. त्यामुळे त्यांनाही तातडीने कारखाना उभारुन गळीत हंगाम सुरु करत ऊस उत्पादकांना चांगला दर द्यावा लागेल. तसेच गटासाठी त्यांना विधानसभा निवडणुकीतही उभे रहावे लागेल. म्हणूनच या दोन्ही उमेदवारांना येत्या राजकीय लढाईसाठी शुभेच्छा देणे माझे कर्तव्य आहे. बिद्री साखर कारखान्याच्या निवडणुकीत आपल्या आघाडीला सभासदांनी निर्विवादपणे सत्ता दिली आहे. साखर कारखानदारीसमोर असलेल्या मोठ्या आव्हानांना तोंड देण्यासाठी संचालक मंडळाला विचारपूर्वक निर्णय घ्यावे लागतील. अपात्र सभासदांना पात्र करण्यासाठी आवश्यक कायदेशीर बाबींची पूर्तता करणे व बंद असलेली साखर सुरु करणे याबाबतही तातडीने आंमलबजावणी करणे आवश्यक आहे.’

संचालक प्रविण भोसले म्हणाले, ‘नेत्यांनी आघाडीचा शब्द पाऴला नाही, त्यामुळे आपण आमदार हसन मुश्रीफ यांच्या गटात प्रवेश केला. प्रामाणिकपणे गटाचे काम करत मुश्रीफांच्या मागे ताकद उभी करण्याचे काम केले.’ यावेळी गोरंबेचे सरपंच शिवाजी पाटील, दत्ता पाटील - केणवडेकर यांनीही मनोगत व्यक्त केले. कार्यक्रमास जिल्हा बँकेचे संचालक भैया माने, शेतकरी संघाचे अध्यक्ष युवराज पाटील, विकास पाटील - कुरुकलीकर, रवी पाटील आदी उपस्थित होते. स्वागत सदाशिव तुकान यांनी केले. आभार अनिल गुरव यांनी मानले.

मोबाइल अॅप डाउनलोड करा आणि राहा अपडेट

---

कामटेच्या सांगण्यावरून सीसीटीव्ही फुटेज गायब

November 20, 2017, 1:30 pm

≫ Next: शाळांच्या गुणवत्तेत जिल्ह्यात करवीर भारी

≪ Previous: ‘समरजीत, संजय घाटगेंनाविधानसभेसाठी शुभेच्छा’

$

0

0

म. टा. वृत्तसेवा, सांगली

पोलिस कोठडीत अनिकेत कोथळेला अमानुष मारहाण करुन त्याचा खून केल्यानंतर त्याचा मृतदेह पोलिस गाडीतून हलवण्यापर्यंतचे सीसीटिव्ही फुटेज संशयित युवराज कामटे याच्या सांगण्यावरुन गायब केल्याचे तपासात उघड झाले आहे. दरम्यान अनिकेतचा मृत्यू झाल्यानंतर त्याचा मृतदेह विश्रामबागमधील एका खासगी हॉस्पिटलमध्ये पोलिस घेऊन गेल्याचे सीसीटिव्ही फूटेजही सीआयडीच्या हाती लागले आहे. त्या हॉस्पिटलमधील लॅब टेक्नीशिएनला आणि डॉक्टरांनाही जबाबासाठी बोलविले असल्याची माहिती सीआयडीचे अप्पर पोलिस अधीक्षक नरेंद्र गायकवाड यांनी सोमवारी पत्रकारांना दिली.

पोलिस कोठडीत अनिकेत कोथळेला अमानुष मारहाण करुन त्याचा खून केल्याप्रकरणी सध्या अटकेत असलेल्या सहा संशयीतांच्या पोलिस कोठडीची मुदत उद्या मंगळवारी संपुष्टात येत आहे. त्यामुळे मंगळवारी दुपारी त्यांना पुन्हा कोर्टासमोर हजर करुन आणखी तपासातील प्रगती कोर्टासमोर ठेवून आणखी तीन दिवसांची पोलिस कोठडी मागितली जाणार असल्याचे गायकवाड यांनी सांगितले.

घटना घडल्याच्या दिवशी उपअधीक्षक दीपाली काळे या रात्र गस्तीच्या प्रमुख अधिकारी होत्या. तसेच ग्रामीण पोलिस ठाण्याचे निरीक्षक रवींद्र डोंगरे हेही रात्र गस्तीला अधिकारी होते. त्यांनाही सीआयडी चौकशीसाठी बोलावण्यात येणार आहे.

कलेक्टरांची आज बैठक

दरम्यान, जिल्हाधिकारी विजयकुमार काळम पाटील आज (मंगळवार) कायदा आणि सुव्यवस्थेसंबंधी बैठक घेणार आहेत. त्या‌मध्येही या प्रकरणाच्या चौकशीबाबतची माहिती घेण्यात येण्याची शक्यता आहे.

मोबाइल अॅप डाउनलोड करा आणि राहा अपडेट

शाळांच्या गुणवत्तेत जिल्ह्यात करवीर भारी

November 20, 2017, 1:30 pm

≫ Next: राष्ट्रवादीचा २७ ला हल्लाबोल

≪ Previous: कामटेच्या सांगण्यावरून सीसीटीव्ही फुटेज गायब

$

0

0

Bhimgonda.Desai@timesgroup.com

Tweet : @bhimgondaMT

कोल्हापूर ः शालेय शिक्षण विभागाच्या शाळा सिद्धी उपक्रमातून १ ली ते १२ वी पर्यंतच्या शाळांचे मूल्यमापन झाले. या स्वयंमूल्यमापनात करवीर तालुका गुणवत्तेत अव्वल आहे. एकूण शाळांच्या तुलनेत शहर मागेच असल्याचे दिसून आले आहे. शहरातील २८६ पैकी केवळ ८२ शाळा ए ग्रेडमध्ये आहेत.

जिल्ह्यात गगनबावडा तालुका सर्वांत मागे आहे. शिक्षण प्रशासनाने मागे असलेल्या तालुक्यातील अधिक‌ाधिक शाळा ए ग्रेडमध्ये येण्यासाठी नियोजन केले आहे. गुणवत्ता वाढीसाठी विविध कार्यक्रम राबण्याच्या सूचना दिल्या आहेत. मूल्यांकनात सर्वांत जास्त मानांकन गुणवत्तेला देण्यात आले आहे. त्यानंतर अध्यापन, भौतिक सुविधांना महत्त्व दिले आहे. त्या ग्रेडचा थेट संबंध शिक्षकांच्या वेतनश्रेणीशी जोडला आहे.

महापालिका, नगरपालिकांसह जिल्हा परिषदेच्या अनुदानीत, विनाअनुदानीत, स्वयंअर्थसहाय्यीत अशा जिल्ह्यात एकूण ३ हजार ६८४ शाळा आहेत. तेथे १ ली ते १२ वी पर्यंतचे शिक्षण दिले जाते. या शाळांनी सरकारच्या निकषानुसार, विहित नमुन्यात दिलेल्या प्रश्नावलीत माहिती भरून स्वयंमूल्यमापन केले. त्यानुसार जिल्ह्यातील १५५६ शाळा ए ग्रेडमध्ये असल्याचे समोर आले आहे.

सरकारने अप्रत्यक्षरित्या गुणवत्तेची जबाबदारी शिक्षकांवर निश्चित केली आहे. त्यामुळे शिक्षक संघटनांचा विरोध आहे. मात्र विद्यार्थी, पालकांच्यादृष्टीने शाळा सिद्धी फायदेशीर आहे. पालकांनाही कोणती शाळा कोणत्या ग्रेडमध्ये आहे, हे पाहून प्रवेश करता येणार आहे. खासगी शाळा सर्वांगीण गुणवत्ता, भौतिक सुविधेत अव्वल असल्याच्या जाहिराती करून विद्यार्थी, पालकांना भुरळ पाडतात. ग्रेड मिळाल्यानंतर पालकांना जाहिरात केलेली शाळा खरोखरच ए ग्रेडमध्ये आहे काय? त्याची फेरपडताळणी करता येणार आहे. मागे असलेल्या शाळांना अधिक काम करून ए ग्रेड मिळवण्यासाठी नियोजन करता येणार आहे.

ए ग्रेडच्या‌ शाळांमध्ये करवीर तालुका अव्वल असल्याचे स्पष्ट होते. करवीर तालुक्यापेक्षा सेवा, सुविधा चांगल्या असताना कोल्हापूर शहर मागे आहे. शहरातील एकूण शाळांपैकी निम्म्या शाळाही ए ग्रेडमध्ये नाहीत. स्वयंमूल्यांकनात शहरात सर्वाधिक १३७ गुण मंगेशकरनगरातील शाहू दयानंद मोफत मराठी शाळेला आहेत. ‌हातकणंगले तालुक्यातील एकूण शाळांच्या तुलनेत ए ग्रेडमध्ये असलेल्या शाळांची संख्या निम्म्यापेक्षा कमी आहे.

========

गुणवत्तावाढीसाठी शिक्षकांना प्रोत्साहित करणे गरजेचे आहे. त्यांना केवळ अध्यापनाचेच काम दिले पाहिजे. शाळाबाह्य कामे लावू नयेत. जिल्ह्यात डोंगरी तालुक्याची संख्या जास्त असल्याने तेथील शाळांत भौतिक सुविधा चांगल्या नाहीत. व्दिशिक्षकी शाळांची संख्याही अधिक आहे. त्याचाही परिणाम गुणवत्तेवर होतो.

संपत गायकवाड, निवृत्त सहायक शिक्षण संचालक

मोबाइल अॅप डाउनलोड करा आणि राहा अपडेट

राष्ट्रवादीचा २७ ला हल्लाबोल

November 20, 2017, 5:28 pm

≫ Next: पोलिस असल्याची बतावणी करून दागिने लुटले

≪ Previous: शाळांच्या गुणवत्तेत जिल्ह्यात करवीर भारी

$

0

0

म. टा. प्रतिनिधी, कोल्हापूर

केंद्रातील आ​​णि राज्यातील भाजप सरकार विरोधात समाजात प्रचंड रोष निर्माण झाला आहे. नोटबंदी, कर्जमाफी, रस्त्यांची दुरुस्ती, शेतमालाचे दर या सर्वच बाबींचा बट्ट्याबोळ झाला असून सरकारला ‘चले जाव’चा इशारा देण्यासाठी २७ नोव्हेंबरला तहसीलदार कार्यालयांवर मोर्चाचे आयोजन केले आहे. या मोर्चांमध्ये मोठ्या संख्येने सहभागी व्हा, असे आवाहन आमदार हसन मुश्रीफ यांनी केले. मुख्यमंत्र्यांकडे गृहखाते आहे, पण राज्यातील कायदा सुव्यवस्थेचा बोजवारा उडाल आहे. पोलिसच खुनी, दरोडेखारासारखे वागू लागल्यास सामान्य नागरिकांनी कुणाकडे पाहायचा असा सवालही त्यांनी केला. आंदोलनाच्या तयारीसाठी पक्षाच्या जिल्हा कार्यालयात पदाधिकाऱ्यांचा मेळावा झाला. जिल्हाध्यक्ष ए. वाय. पाटील अध्यक्षस्थानी होते.

मुश्रीफ म्हणाले, ‘राष्ट्रीय नेते शरद पवार यांनी कर्जत अधिवेशनात भाजप आणि राष्ट्रवादीमध्ये कोणत्याही प्रकारचे साटेलोट नसल्याचे स्पष्टपणे सांगितले आहे. शिवसेना सत्तेत की विरोधी पक्षात हे समजत नाही. सरकारच्या विरोधातील आंदोलनात शिवसेना विरोधीपक्षांपेक्षा पुढे आहे. तालुका पातळीवरील मोर्चानंतर राष्ट्रवादीतर्फे एक डिसेंबरपासून यवतमाळ येथून मोर्चा काढण्यात येणार आहे. १५० किलोमीटर अंतर चालत हा मोर्चा दहा डिसेंबरला नागपूरमध्ये धडकेल. ११ डिसेंबर रोजी अधिवेशनाच्या पहिल्या दिवशी नागपुरात जनआक्रोश आंदोलन करण्यात येणार आहे.’

जिल्हाध्यक्ष ए. वाय. पाटील म्हणाले,‘ जिल्ह्यातील प्रत्येक तालुक्यातून सरकार विरोधात आक्रोश उमटला पाहिजे. सरकारच्या बेभरवशाच्या कामकाजाचा पर्दाफाश करण्यासाठी आंदोलन आहे. राष्ट्रवादीने सभासद नोंदणी सुरू केली असून त्यामध्ये नागरिकांना मोठ्या संख्येने सहभागी करुन घ्यावे.’ जिल्हा सरचिटणीस अनिल साळोखे यांनी प्रास्ताविक केले. महापौर हसीना फरास, माजी महापौर आर.के. पोवार, शहराध्यक्ष राजेश लाटकर, मदन कारंडे, भैय्या माने, शिवानंद माळी, आदिल फरास, महिला आघाडीच्या संगीता खाडे, जहिदा मुजावर आदी उपस्थित होते.


आता शहाणपणाने कारभार

सलग १५ वर्षे सत्तेत असल्यामुळे काँग्रेस, राष्ट्रवादीकडून चुका झाल्या. काही जणांची सत्तेची मस्ती उतरली आहे. पुन्हा सत्तेवर आल्यानंतर पुर्वीसारख्या चुका होणार नाहीत. आता शहाणपणाने राज्य कारभार करू. येत्या निवडणुकीत राष्ट्रवादी काँग्रेस आणि काँग्रेस एकत्रपणे निवडणूक लढवून भाजप सरकारला सत्तेवरुन खाली खेचल्याशिवाय राहणार नाही. यामुळे आता राष्ट्रवादीच्या सहभाग अभियानात सक्रिय असणाऱ्यांना महामंडळे, समित्यांवर स्थान दिले जाईल.


तर मुख्यमंत्र्यांना कागलमध्ये पाय ठेवू दिले नसते

मुश्रीफ म्हणाले, कर्जमाफी योजनेचा बट्ट्याबोळ उडाला आहे. सरकारकडून रोज एक आदेश निघत आहे. पक्षाचे नेते शरद पवार यांनी कर्जमाफीवरुन सरकारला २५ डिसेंबरपर्यंत मुदत दिली आहे मुख्यमंत्री २५ तारखेला कागल दौऱ्यावर आहेत. त्यामुळे त्यांच्या दौऱ्याला विरोध करणार नाही. मात्र मुख्यमंत्री जर २६ तारखेला दौऱ्यावर असते तर त्यांची वाहने रोखली असती, त्यांना कागलात पाय ठेवू दिले नसते.’असा इशारा त्यांनी दिला.

मोबाइल अॅप डाउनलोड करा आणि राहा अपडेट

पोलिस असल्याची बतावणी करून दागिने लुटले

November 20, 2017, 5:29 pm

≫ Next: साड्या चोरणाऱ्या चार महिला अटकेत

≪ Previous: राष्ट्रवादीचा २७ ला हल्लाबोल

$

0

0

म. टा. प्रतिनिधी, कोल्हापूर

संभाजीनगरातील रेसकोर्स नाका आणि रुईकर कॉलनी परिसरात दोघांनी पोलिस असल्याची बतावणी करून दोन महिलांचे नऊ तोळे सोन्याच्या सुमारे सव्वालाखांचे दागिने लंपास केले. ‘पुढे खुनाचा तपास सुरू असून, अंगावरील दागिने पिशवीत ठेवा,’ असे सांगून पाहण्यासाठी घेतलेले दागिने हातोहात लांबवले. सोमवारी (ता. २०) सकाळी हा प्रकार घडला. विमल वसंत वळीवडे (वय ७२, मूळ रा. वळीवडे, सध्या रा. महाडिक वसाहत, जीवनछाया रेसिडेन्सी) आणि राजेश्वरी भीमाशंकर महाजन (६९, रा. शिवराय नगरी, संभाजीनगर) यांनी पोलिसात फिर्याद दाखल केली आहे.

राजेश्वरी महाजन या सोमवारी सकाळी फिरण्यासाठी घरातून बाहेर पडल्या होत्या. आठच्या सुमारास रेसकोर्स नाका परिसरातून त्या घरी परत निघाल्या होत्या. यावेळी पाठीमागून दुचाकीवरून आलेल्या दोघांनी महाजन यांना अडवले. ‘पुढे पोलिस आहेत. तुमचे दागिने रुमालात ठेवा. अंगावर ठेवू नका,’ असे सांगितले. पाहण्यासाठी दागिने हातात घेऊन पुन्हा रिकामाच रुमाल देऊन भामट्यांनी दुचाकीवरून पळ काढला. संशयितांनी तीन तोळे वजनाची सोन्याची चेन, अर्धा तोळे वजनाची अंगठी आणि सात ग्रॅम वजनाचे सोन्याचे ब्रेसलेट असे सुमारे ७० हजार रुपयांचे दागिने लंपास केले. घरात पोहचल्यानंतर रिकामा रुमाल पाहून महाजन यांना धक्का बसला. त्यांनी नातेवाईकांसह जुना राजवाडा पोलिस ठाण्यात फिर्याद दाखल केली.

विमल वळीवडे या सोमवारी सकाळी देवदर्शनासाठी महाडिक वसाहतीतील घरातून बाहेर पडल्या. साडेनऊच्या सुमारास रुईकर कॉलनीतील दत्त मंदिरात देवदर्शन केल्यानंतर त्या पुन्हा घरी निघाल्या होत्या. दत्त मंदिराच्या समोरून जाताना दुचाकीवरून आलेल्या दोघांनी वळीवडे यांना अडवले. ‘पुढे काल एका महिलेचा खून झाला होता. आमचे साहेब तपास करीत आहेत. तुम्ही अंगावर दागिने घालून पुढे जाऊ नका.’ असे सांगितले. यावर वळीवडे यांनी पलिकडेच घर असल्याचे सांगत दागिने काढून ठेवण्यास विरोध केला. दोघांनी पुन्हा विश्वासात घेऊन सांगितल्याने वळीवडे यांनी हातातील पाच तोळ्यांच्या चार सोन्याच्या बांगड्या काढून रुमालात गुंडाळून त्या कापडी पिशवीत ठेवल्या. काही अंतर चालत पुढे गेल्यानंतर दोघांनी पुन्हा वळीवडे यांना अडवले. ‘तुमचे दागिने तपासायचे आहेत,’ असे सांगून त्यांच्याकडील सोन्याच्या बांगड्या घेतल्या. बोलण्यात गुंतवून बांगड्या पुन्हा त्यांच्या पिशवीत ठेवल्याचे भासवले आणि तातडीने घरी जाण्याचा सल्ला देऊन दोघेही दुचाकीवरून निघून गेले. वळीवडे यांनी दागिन्यांची खात्री करण्यासाठी पिशवीतील रुमाल बाहेर काढला, मात्र त्यात दागिने मिळाले नाहीत. दागिन्यांची चोरी झाल्याचे लक्षात येताच त्यांनी घरात जाऊन नातेवाईकांना या प्रकाराची माहिती दिली. वळीवडे यांनी शाहूपुरी पोलिस ठाण्यात फिर्याद दाखल केली आहे. वळीवडे यांच्या सुमारे ७० हजारांच्या सोन्याच्या बांगड्या भामट्यांनी लांबवल्या.

गस्तीचे पोलिस गायब?

महिन्याभरापासून चोरट्यांची एक टोळी पोलिस असल्याची बतावणी करून महिलांचे दागिने लंपास करीत आहे. भामट्यांनी आठ ठिकाणी हातोहात दागिने लांबवले आहेत, मात्र अद्यापही चोरटे पोलिसांच्या हाती लागलेले नाहीत. पोलिस असल्याची बतावणी करून चोरटे गंडा घालत आहेत. यातून पोलिसांची प्रतिमा बदनाम होत आहे, तरीही पोलिसांना चोरटे सापडत नाहीत, त्यामुळे खऱ्या पोलिसांच्या कार्यक्षमतेवर प्रश्नचिन्ह निर्माण झाले आहे. गस्तीवरील पोलिस आहेत तरी कुठे? असा सवाल नागरिकांकडून विचारला जात आहे.

मोबाइल अॅप डाउनलोड करा आणि राहा अपडेट

साड्या चोरणाऱ्या चार महिला अटकेत

November 20, 2017, 5:29 pm

≫ Next: साडविलकरांविरोधात आज तक्रार

≪ Previous: पोलिस असल्याची बतावणी करून दागिने लुटले

$

0

0

म. टा. प्रतिनिधी, कोल्हापूर

खरेदीच्या बहाण्याने साड्यांची चोरी करणाऱ्या चार सराईत चोरट्या महिलांना स्थानिक गुन्हे अन्वेषण शाखेने अटक केले. सिंधू प्रकाश काळे (वय ४५), अमृता प्रमोद लोंढे (३०), वंदना रामचंद्र भवाळ (३२) आणि सुजला उत्तम कांबळे (६०, सर्व रा. राजेंद्रनगर) अशी अटकेतील महिलांची नावे आहेत. तीन नोहेंबर रोजी शिरोळ तालुक्यातील नांदणी येथे चोरी झाली होती. अटक केलेल्या महिलांकडून पोलिसांनी आठ हजार रुपयांच्या साड्या जप्त केल्या आहेत. पुढील तपासासाठी संशयित महिलांना शिरोळ पोलिसांच्या ताब्यात दिले आहे.

शिरोळ तालुक्यातील नांदणी येथे राहणाऱ्या सारिका शामराव काटकर यांचे घराला लागूनच स्वामी समर्थ कलेक्शन हे कापड विक्रीचे दुकान आहे. तीन नोहेंबरला दुपारी दोन ते तीनच्या दरम्यान त्यांच्या दुकानात काही अनोळखी महिला खरेदीसाठी आल्या होत्या. त्या महिलांनी साड्या खरेदी करण्याचा बहाणा करीत दुकानातील किमती साड्या हातोहात लंपास केल्या. महिला निघून गेल्यानंतर हा प्रकार लक्षात येताच काटकर यांनी शिरोळ पोलिस ठाण्यात अज्ञात महिलांविरोधात तक्रार दाखल केली होती. या गुन्ह्याचा समांतर तपास स्थानिक गुन्हे अन्वेषण शाखेकडूनही सुरू होता. तपास करताना स्थानिक गुन्हे अन्वेषण शाखेचे सहायक पोलिस निरीक्षक संजीव झाडे यांना ही चोरी कोल्हापुरातील राजेंद्रनगर परिसरातील सराईत चोरट्या महिलांनी केल्याची माहिती मिळाली. यानंतर पोलिसांनी सिंधू काळे या टोळीप्रमुख महिलेसह अमृता लोंढे, सुजाता कांबळे आणि वंदना भवाळ या चौघींना ताब्यात घेऊन चौकशी केली असता, संशयितांनी गुन्ह्याची कबुली दिली. पोलिसांनी या महिलांकडून कांजीवरम आणि पैठणी अशा आठ हजार रुपये किमतीच्या साड्या जप्त केल्या आहेत. पोलिस हावलदार सुनील कवळेकर, इकबाल महात, शिवाजी खोराटे, प्रल्हाद देसाई, संजय हुबे, वैशाली पाटील, आदींनी ही कारवाई केली.

ताब्यात घेतलेल्या महिला पोलिसांच्या रेकॉर्डवरील सराईत चोरट्या आहेत. त्यांच्यावर विविध पोलिस टाण्यात चोरीचे गुन्हे दाखल आहेत. पुढील तपासासाठी संशयित महिलांना शिरोळ पोलिसांच्या ताब्यात दिले आहे. त्यांच्याकडून आणखी काही गुन्हे उघडकीस येण्याची शक्यता पोलिसांनी वर्तवली आहे.

मोबाइल अॅप डाउनलोड करा आणि राहा अपडेट