ऊसदरासाठी शेतकरी संघटनांनी सुरु केलेले आंदोलन चिघळत चालले असून 'स्वाभिमानी'चे जिल्हाध्यक्ष समाधान फाटे यांच्यासह दोघांची प्रकृती आज चिंताजनक बनली आहे. तोडगा निघाल्याशिवाय माघार घेणार नसल्याच्या भूमिकेवर उपोषणकर्ते ठाम असल्याने प्रशासनाचे धाबे दणाणले आहे.
स्वाभिमानी शेतकरी संघटनेच्यावतीने बाजीराव विहीर येथे ११ नोव्हेंबरपासून जिल्हाध्यक्ष समाधान फाटे यांच्यासह नवनाथ माने आणि चंद्रकांत बागल यांचे आमरण उपोषण सुरु आहे. गेल्या तीन दिवसांपासून उपोषणकर्त्यांची प्रकृती खालावू लागल्याने प्रशासनाने त्यांना रुग्णालयात हलविण्याचा प्रयत्न केला मात्र ऊसदर तिढा सुटल्याशिवाय आंदोलन मागे न घेण्याच्या भूमिकेमुळे प्रशासन हादरले आहे. आज फाटे यांची प्रकृती जास्तच खालावल्याने त्यांना सलायन देण्यास सुरुवात केली असली तरी डॉक्टरांनी मात्र त्यांच्यावर तात्काळ हॉस्पिटलमध्ये उपचार गरजेचे असल्याचे प्रशासनाला सांगितले आहे.
दरम्यान, आज सकाळपासून पुन्हा ऊसदर आंदोलन पेटले असून सोनके येथे लाकडे जाळून स्वाभिमानी शेतकरी संघटनेने चक्का जाम करीत कराड रोड बंद पडला तर टेंभूर्णी रोडवरील भोसेजवळ रविकांत तुपकर यांच्या नेतृत्वाखाली शेकडो शेतकऱ्यांनी चक्का जाम केला. काल रात्री पंढरपूर सातारा रोडवरील बस फोडण्यात आली असून माढा तालुक्यात रिधोरा येथे दोन बसची तोडफोड करण्यात आली आहे. आज सकाळी भंडीशेगाव येथे अकलूज सोलापूर बसवर दगडफेक करीत पेट्रोल टाकण्याचा प्रयत्न झाला मात्र पोलीस वेळीच दाखल झाल्याने अनर्थ टळला. पोलिसांनी स्वाभिमानीचे नेते रविकांत तुपकर यांच्यासह इतर कार्यकर्त्यांना नोटिसा बजावल्याने स्वाभिमानीचे नेते संतप्त झाले असून पोलीस बळावर आंदोलन मोडू देणार नसल्याचा इशारा रविकांत तुपकर यांनी दिला आहे. सोलापूर जिल्ह्यातील कारखाने २००० च्या पुढे दर देण्यास तयार नसल्याने सातारा जिल्ह्यातील कारखानदार आता येथील ऊस नेण्यासाठी प्रयत्न करू लागले असून उपरी येथे एका कारखान्याने २९०० रुपये दर देण्याचे आमिष दाखविल्याचे दत्त नागणे या शेतकऱ्यांनी 'म.टा.'ला सांगितले.
मोबाइल अॅप डाउनलोड करा आणि राहा अपडेट
