म. टा. प्रतिनिधी, कोल्हापूर
पुण्यातील डीएसके ग्रुपमध्ये गुंतवणूक केलेले शेकडो गुंतवणूकदार समोर येत आहेत. अनेकांच्या ठेवींची मुदत संपूनही ठेवींची रक्कम मिळत नसल्याने गुंतवणूकदार हवालदिल झाले आहेत. फसवणुकीची व्याप्ती वाढल्याने अडकलेली रक्कमही वाढण्याची शक्यता आहे. रविवारी (ता. ५) गुंतवणूकदार राजारामपुरी पोलिस ठाण्यात फसवणुकीचे गुन्हे दाखल करणार आहेत.
गेल्या वीस वर्षांपासून कोल्हापुरातील शेकडो गुंतवणूकदारांनी डीएसके फायनान्समध्ये गुंतवणूक केली. एक लाखापासून ते कोट्यवधींची गुंतवणूक करणाऱ्या गुंतवणूकदारांना सुरुवातीला नियमित व्याजाची रक्कम मिळाली. १५ ते १८ टक्के व्याज मिळाल्याने गुंतवणूकदारांचा ओढा डीएसके फायनान्सकडे वाढला. पहिल्या टप्प्यात ६०० गुंतवणूकदार समोर आले आहेत. त्यांचे सुमारे २०० कोटी रुपये डीएसकेमध्ये अडकले आहेत. पुणे आणि मुंबईत डी. एस. कुलकर्णी यांच्या घरासह कार्यालयांवर पोलिसांनी छापे टाकल्याने कोल्हापुरातील गुंतवणूकदारांमध्ये खळबळ निर्माण झाली आहे. शुक्रवारी गुंतवणूकदारांनी पोलिस अधीक्षक संजय मोहिते यांची भेट घेऊन झालेल्या फसवणुकीबद्दल माहिती दिली होती.
गुंतवणूकदार असोसिएशनचे अध्यक्ष बी. डी. किल्लेदार यांनी जिल्ह्यातील सर्व गुंतवणूकदारांना एकत्र येण्याचे आवाहन केले होते. यानुसार रविवारी सकाळी सडेदहाच्या सुमारास सर्व गुंतवणूकदार उद्यमनगर येथे एकत्र येणार आहेत. यानंतर राजारामपुरी पोलिस ठाण्यात एकत्रित गुन्हा दाखल केला जाणार आहे, अशी माहिती गुंतवणूकदारांचे अॅड. सत्यजित पवार यांनी दिली. गुंतवणूकदारांमध्ये निवृत्त शिक्षक, प्राध्यापक, वकील, सरकारी कर्मचारी, व्यापारी आणि डॉक्टरांचाही समावेश आहे. मोठ्या रकमा अडकून पडल्याने गुंतवणूकदारांत कमालीची अस्वस्थता आहे. बहुतांश गुंतवणूकदार वयस्कर आहेत, त्यामुळे फसवणुकीच्या भीतीने गुंतवणूकदारांना धक्का बसला आहे.
कार्यालयांचे भाडे थकीत
डीएसके कंपनीचे उद्यमनगर येथे अलिशान कारचे शोरूम आहे. गेल्या आठ महिन्यांपासून या शोरूमच्या इमारतीचे भाडे थकले आहे. कामगारांचे पगारही दिलेले नाहीत. त्यामुळे कामगारांमध्येही अस्वस्थता आहे. काही कामगार काम सोडून गेल्याचेही सांगण्यात येते.
००००००००००००
मोबाइल अॅप डाउनलोड करा आणि राहा अपडेट