कणेरकरनगर परिसरात मंगळवारी (ता. ३१) पहाटे चोरट्याने निखिल वेळापूरकर (वय ४०, रा. कणेरकरनगर) यांच्या घरात जबरी चोरी केली. चोरट्याचा सुगावा लागताच जागे झालेल्या वेळापूरकर यांनी शेजाऱ्यांच्या मदतीने चोरट्याला पकडण्याचा प्रयत्न केला, मात्र यावेळी वेळापूरकर आणि शेजारी विनायक मांगलेकर हे किरकोळ जखमी झाले. चोरट्याने वेळापूरकर यांच्या घरातून रोख १० हजार रुपयांची रोकड लंपास केली. याबाबत मंगळवारी संध्याकाळी जुना राजवाडा पोलिस ठाण्यात फिर्याद दाखल केली आहे.
जुना राजवाडा पोलिसांकडून मिळालेल्या माहितीनुसार कणेरकर नगरातील पितृऋण या दुमजली बंगल्यात निखिल वेळापूरकर पत्नी आणि दोन मुलांसह राहतात. सोमवारी रात्री ते वरच्या मजल्यावरील बेडरुममध्ये झोपले होते. पहाटे साडेतीनच्या सुमारास त्यांच्या पत्नीला स्वयंपाक घरातील बल्ब सुरू असल्याचे लक्षात आले. हॉलमधून आवाज येत असल्याने त्यांनी पती निखिल यांना उठवले. निखिल हे गॅलरीतून शेजारचे विनायक मांगलेकर यांच्या जिन्यातून खाली गेले. विनायक यांना उठवून त्यांनी स्वतःच्या घराचा दरवाजा बाहेरून बंद केला. कॉलनीतील लोकांना त्यांनी उठवताच चोरट्याला सुगावा लागला, मात्र दरवाजा बंद असल्याने तो आतच अडकला होता. नागरिकांनी दरवाजा उघडताच दबा धरून बसलेल्या चोरट्याने पळ काढला. चोरट्याला पकडण्यासाठी पाठीमागे लागलेले निखिल वेळापूरकर यांनी त्याला पकडलेही होते, मात्र चोरट्याने हुलकावणी दिल्याने ते जमिनीवर पडल्याने जखमी झाले. पाठीमागून पळत आलेले विनायक मांगलेकर हे पाय घसरून पडल्याने त्यांच्या हाताला किरकोळ जखम झाली. दरम्यान, हातातून निसटलेल्या चोरट्याने पळ काढला. चोरट्याने वेळापूरकर यांच्या घरातून कपाटातील रोख दहा हजार रुपये लंपास केले आहेत. जखमींवर खासगी रुग्णालयात उपचार करण्यात आले.
मंगळवारी सकाळी जबरी चोरीची माहिती मिळताच जुना राजवाडा पोलिसांनी घटनास्थळी धाव घेतली. ठसे तज्ज्ञांनी वस्तुंवरील ठसे घेतले आहेत, तर श्वान पथकानेही चोरट्याचा माग काढण्याचा प्रयत्न केला, मात्र शेजारच्या मोकळ्या मैदानापर्यंतच श्वानाने माग काढला. पोलिसांनी अज्ञात चोरट्याच्या विरोधात गुन्हा दाखल केला असून, परिसरातील सीसीटीव्ही फुटेजच्या मदतीने पोलिसांनी चोरट्यांचा शोध सुरू केला आहे.
चोरट्याने केला फराळ
चोरटा सुमारे पंधरा मिनिटे वेळापूरकर यांच्या घरात होता. स्वयंपाक घरातील किचन कट्ट्यावर ठेवलेले दिवाळीचे खाद्यपदार्थही त्याने खाल्ले. लोखंडी कपाटाचे लॉक तोडून त्याने आतील साहित्य विस्कटले होते. घरमालक निखिल वेळापूरकर जागे झाल्यानंतर त्याने दरवाजातून पळ काढण्याचा प्रयत्न केला, पण दरवाजा बाहेरून बंद असल्याने तो अडकला होता. दरवाजा उघडताच तो पळाला.
मोबाइल अॅप डाउनलोड करा आणि राहा अपडेट
