राज्य सरकारने जाहीर केलेली कर्जमाफी मिळण्यास मंगळवारपासून सुरुवात झाली आहे. मात्र, कर्जमाफीच्या माहितीमध्ये तांत्रिक अडचणी येऊ लागल्याने शेतकऱ्यांच्या पदरात पडणारी कर्जमाफी लांबणार असल्याचे स्पष्ट झाले आहे.
तांत्रिक अधिकाऱ्यांच्या मदतीने माहिती दुरुस्तीसह पाठविण्यासाठी मार्ग काढण्याचा प्रयत्न सुरू आहे. सरकारच्या पोर्टलवर पात्र लाभार्थींची यादी दिसत नसल्याने शेतकरी चिंताग्रस्त बनला आहे. पात्र लाभार्थ्यांच्या खात्यावर कर्जमाफीची रक्कम जमा करण्यात येणार होती. प्रत्यक्षात प्रमाणपत्र दिलेले शेतकरी वगळता इतरांची यादीच सरकारच्या संकेतस्थळावरून गायब झाली आहे, या प्रकारामुळे शेतकऱ्यांमध्ये प्रचंड अस्वस्थता आहे.
मुख्यमंत्री देवेंद्र फडणवीस यांनी दिवाळीच्या पहिल्यादिवशी शेतकऱ्यांच्या खात्यावर कर्जमाफीची रक्कम जमा करण्याची घोषणा केली. त्यामुळे शेतकऱ्यांना अपेक्षा वाढल्या होत्या. मात्र, प्रत्यक्षात कर्जमाफीची रक्कम खात्यावर टाकण्यापूर्वीची कोणतीही पूर्वतयारी जिल्ह्यात झालेली नव्हती. जिल्ह्यातील एकाही शेतकऱ्याला सोमवारपर्यंत मुख्यमंत्र्यांच्या घोषणेचा लाभ मिळू शकला नव्हता. सहकारमंत्री सुभाष देशमुख यांनी दिवाळीतील सलग तीन दिवसांचे कारण पुढे केले होते. मंगळवारी जिल्ह्यातील २८ शेतकऱ्यांपैकी २५ जणांच्या कर्जदारांच्या खात्यावर कर्जमाफीची ९ लाख ४८ हजार दोनशे रुपयांची रक्कम जमा झाली. इतर पात्र शेतकऱ्यांच्या खात्यावर बुधवारपासून रक्कम जमा होणार होती. मात्र, प्रत्यक्षात रक्कम जमा झालेली नाही. दुसरीकडे सरकारने संकेतस्थळावर जिल्ह्यातील ज्या शेतकऱ्यांची यादी लाभार्थी म्हणून प्रसिद्ध केली होती, ती यादीच गायब झाली आहे.
कर्जमाफीच्या पाठविलेल्या माहितीमध्ये तांत्रिक अडचणी निर्माण झाल्या असल्याचे सहकार विभागाकडून सांगण्यात आले. जिल्ह्यात शंभर टक्के सोसायट्यांची यादी अपलोड करण्यात आली आहे. परंतु, अनेक संस्थांच्या माहितीमध्ये अडचणी येत आहे. तांत्रिक अधिकाऱ्यांच्या मदतीने अडचणींवर मार्ग काढण्याचा प्रयत्न करण्यात येत आहे. माहिती दुरुस्तीसह पाठविण्याचे कामाला गती देण्याच्या सूचना देण्यात आल्या आहेत, मात्र त्यासाठी जादा कालावधी लागणार असल्याचे दिसत आहे. राष्ट्रीयीकृत बँकापेक्षा जिल्हा मध्यवर्ती बँकेकडून व्यवस्थित माहिती सादर करण्यात आली आहे, परंतु, तांत्रिक अडचणींमुळे कर्जमाफी लांबणार असल्याचे स्पष्ट झाले.
मोबाइल अॅप डाउनलोड करा आणि राहा अपडेट
