म. टा. प्रतिनिधी, कोल्हापूर
एसटी कर्मचाऱ्यांचा चार दिवस झालेल्या संपाचा आर्थिक फटका राज्य मार्ग परिवहन महामंडळाला बसला. कोल्हापूर जिल्ह्याच्या बारा आगाराला चार दिवसांत साडेतीन कोटींचा फटका बसला. सार्वजनिक वाहतुक व्यवस्थेत महत्त्वाचा कणा असलेल्या एसटीची सेवा ऐन दिवाळीत विस्कळित झाल्याने उत्पन्नावर पाणी पडले, शिवाय ग्रामीण भागातील नागरिकांना मोठा त्रास सहन करावा लागला. ऐन दिवाळीत घरी जाणारे नोकरदार अडकून पडल्याने तसेच खासगी वाहनधारकांनी मनमानी पैसे आकारल्याने मनस्तापाला सामोरे जावे लागले.
एसटीच्या कोल्हापूर आगारात ७०० हून अधिक एसटीच्या ताफ्यात आहेत. त्यासह नव्याने दाखल झालेल्या शिवशाहीच्या वीसहून अधिक बसेस दाखल झाल्या आहेत. एसटी महामंडळाच्या कोल्हापूर आगाराला दिवाळी सणातून दरवर्षी ३५ लाखांहून अधिक फायदा मिळतो. १६ ऑक्टोबरच्या मध्यरात्रीपासून कर्मचाऱ्यांनी संपाची सुरुवात केल्याने वाहतूक व्यवस्था कोलमडली चालक, वाहक, वाहतुक निरीक्षक, स्थानक प्रमुख, यंत्रशाळेतील कामगार, विभागीय वाहतूक कार्यालयातील कर्मचारी सहभागी झाल्याने एसटी सेवा थांबली. ऐन दिवाळी सणात प्रवाशांना खासगी ट्रॅव्हल्सचा आधार घ्यावा लागला. कोल्हापूर ते पुण्यासाठी एक हजार आणि मुंबईसाठी दोन हजार रुपये दर मोजावा लागला. दरवर्षी दिवाळीच्या काळात कोल्हापूर ते पुणे, मुंबई, रत्नागिरी, गणपतीपुळे, पावस, चंदगड, आजरासह परिसरात मुंबई पुणेतील चाकरमानी गावाकडे परततात. त्यांच्या सेवेसाठी १५० हून एसटी सेवेसाठी तैनात केल्या होत्या. मात्र संपाची सुरुवात झाल्यास या एसटी आगाराच्या आवारात थांबून राहिल्या. दररोज एसटीला ८० लाखांचा तोटा झाला. नव्याने दाखल झालेली शिवशाही एसटी महामंडळाने एका फेरीपाठीमागे २० हजारांचे उत्पन्न मिळवून देते. संपामुळे शिवशाहीच्या फेऱ्याही थांबल्या. पुणे आणि मुंबई मार्गावर शिवशाही थांबल्याने दिवसाला सरासरी दोन लाखांचा फटका बसला. एसटी स्थानकावरील आयता प्रवासी खासगी ट्रॅव्हल्स चालकांना मिळाला. प्रवाशांनीखासगी बस, टेम्पो ट्रॅव्हलर, काळी पिवळी जीप, मॅटडोर आणि ट्रकने प्रवास केला. जिल्ह्यातंर्गत प्रवासासह लांबच्या पल्ल्यासाठी तिप्पट ते चौपट दर आकारण्यात आले. कोल्हापूर आगाराला झालेला सुमारे साडेतीन कोटींचा तोटा मात्र येत्या काही दिवसांत भरुन काढावा लागणार आहे.
ग्रामीण भागात प्रचंड त्रास
ग्रामीण भागात अनेक ठिकाणी एसटीची बस हाच एकमेव आधार आहे. संपामुळे दिवाळी बाजार आणि अन्य कामांसाठी बाहेर पडणाऱ्यांना प्रचंड मनस्ताप सहन करावा लागला. सरकारी पातळीवर खासगी वाहनांना मुभा दिल्याने वडाप चालकांनी मनमानी पैसे आकारले. गेल्या चार दिवसांत जेवढे लुटता येईल इतके सर्वसामान्य नागरिकाला लुटले. त्यावेळी आरटीओ आणि परिवहनची यंत्रणा डोळ्यावर कातडे ओढून गप्प बसली.
एसटी कर्मचाऱ्यांची तारांबळ
९०० एसटीचे नियोजन
सोमवारी मध्यरात्रीपासून सुरू झालेल्या संपामुळे मध्यवर्ती बसस्थानक, कार्यशाळेत लावलेल्या एसटी बसेस पुन्हा प्रवाशांच्या सेवेत रुजू झाल्या. पहाटे सहा वाजल्यापासून प्रवाशांच्या सेवेत लालपरी रुजू झाली. सोमवारपासून खासगी सेवेचा आधार घेतलेल्या प्रवाशांन सुटकेचा निश्वास टाकला. कोल्हापूर जिल्ह्यातील १२ आगारात सकाळी सहा वाजल्यापासून सेवा सुरू झाली. आगारात सुमारे ९०० हून अधिक एसटी थांबल्या. बारा आगाराच्या ठिकाणीही संप मागे घेईपर्यंत एसटी स्थानकाबाहेर एकही एसटी धावली नाही. महाराष्ट्र एसटी कामगार संघटना, इंटकसह सुमारे पाच हजार कर्मचारी संपावर होते. चालक आणि वाहकांसह संघटनेचे पदाधिकारी असलेले अधिकारी आणि कर्मचारीही संपात सहभागी झाले. प्रत्येक आगाराच्या आवारात संघटनेने आंदोलन सुरू केले होते. आगाराच्या आवारात मंडप टाकण्यात आले. शनिवारी सकाळी संप मागे घेतल्याचा निर्णय झाल्यानंतर मात्र कर्मचाऱ्यांची धावपळ उडाली. यंत्रशाळेत थांबलेल्या एसटीची स्वच्छता आणि सुस्थितीत करण्यासाठी कामगारांची धावपळ उडाली. त्यानंतर एसटी फलाटवर आणल्या. कोल्हापूर ते पुणे, मुंबई, सोलापूर, नाशिक, रत्नागिरी, गणपतीपुळे या लांब पल्ल्याच्या एसटीसह जिल्ह्यातील सुमारे १३०० हून अधिक गावांना सेवा देण्यासाठी सज्ज झाल्या. चालक आणि वाहकांची तारांबळ उडाली. संपात असलेले कर्मचारी सकाळी सहा वाजल्यापासून सेवेत रुजू झाले. संपात सहभागी झालेल्या कर्मचाऱ्यांना कामावर तत्काळ रुजू होण्याच्या सूचना देण्यात आल्या. संघटनेच्या पदाधिकाऱ्यांनी दिलेल्या सूचनांचे पालन करून एसटीचे चालक आणि वाहक तत्काळ कामावर रुजू झाले. लांब पल्ल्याच्या एसटीचे नियोजन करण्यात आले. विभाग नियंत्रक नवनीत भानप सध्या दीर्घ रजेवर आहेत. विभागीय वाहतूक अधिकारी पदाची रिक्त जागा गेली दीड वर्षे रिक्त आहे. प्रभारी कार्यभार सोपविलेल्या अधिकाऱ्यांची नियोजन करताना धावपळ उडाली. विभागीय कार्यालयालही शनिवारी सुटी असल्याने नियोजन करण्यात तारांबळ उडाली. एसटी विभागाकडून संप असला तरी कामगारांचे नियोजन केले जाते. मात्र संपात सर्वच संघटनेचे कर्मचारी उत्स्फूर्तपणे सहभागी झाल्याने परिस्थिती पूर्वपदावर आणण्यासाठी कसरत करावी लागली.
मोबाइल अॅप डाउनलोड करा आणि राहा अपडेट
